Luka 6 - Findel i DeeƁwe Ti Alis i Ron

Deembai i Mwen ti Lafos

¹ Mwen ti Lafos nin, Yeso yis ɗa'at ta saa ti yang i macwa, unai fe i ro ames, si warat hihai i macwai ta ra, sin shinggeri.

² Unai Farisiyawa si lulus si ni, “Ami kin si nggyel ti anggut ya ti masti mai aɗengi, Mwen ti Lafos ya?”

³ Yeso matussi ni, “Hu mbe' tasi Worong i DeeƁwe aɗeng ima ai Devid hu myayus si masi myan ima hwem hanus kwa haa?

⁴ Lang ta Wur i DeeƁwe, zan folok masapai ima a kocokak je si cwai, cu, fa myayus ta hwak.”

⁵ Unai Yeso lakus ni, “Al i Maɗufal a yis mii Deembai i Mwen ti Lafos.”

Maɗufal ima Rai Shokus

⁶ Mwen ti Lafos nin hwak, Yeso lang ta mare yis kofti findel i DeeƁwe. Maɗufal nin yis ta hwak ima ra i ucwa ames shokus.

⁷ Unai Farisiyawa hu som kofiti si anggut hai, sin far ti fiselal ima ɓa si wis Yeso ti mafwashi nin, si shus shishat hai mweret, ɓi si ɗingi ashang ma wa fati ɗufal cala tasi Mwen ti Lafos hai.

⁸ Yeso shang ambe' ames, unai lak maɗufal ima shok na rai ni, “Lukka fit, ha te mangra na mabel i ɗufal shak.” Unai luk fit te mangra ta kyeli.

⁹ Unai Yeso ni, “I ma lulsu, ami ɓin ɗat ɓi ka masi Mwen ti Lafos ya? Ɓi ka mas maɗesi ahun a mafwashi ya? A bum ti mupwet ahun a ɓwashi ya yo ya?”

¹⁰ Unai ɗingus fo shak, ɗak lak maɗufali ni, “Tasa ra ama.” Unai tas rai, wis cala.

¹¹ Unai mulwat ames jurik ti futut, si lang ɓeti ti ɗiyai ames tasi aɗeng ima si wa masi ti Yeso.

Yeso Ben Fe i Muro Ames

¹² Tasi mukonan ani, Yeso lang wa ta gung i fwere ɓa u fwal DeeƁwe, unai kon yis fwal ti DeeƁwe.

¹³ Ti fo i mwen ndai, lai fe i ro ames ta kyel ames, ɗak ben hure mulang apil ta saa yusti, ima kinus asum i fe muro ames. Asumam ames mi.

¹⁴ Siman (ima laiyus ii Pita), Andru nusus i Pita, hu Jemis, hu Jwon, hu Filip, hu Batolomi,

¹⁵ hu Matyu, hu Toma, hu Jemis al i Alfyus, hu Siman ma nadon,

¹⁶ hu Yahuda al i Jakop, hu Judas Iskaryot, ima cu han i Yeso.

Yeso Fa Ɗufal Cala Kofus Shangi

¹⁷ Unai si ɗorkyel tasi anggash hai si te mangra ta kyel mabangi nin, akul hu fe i ro ames hyang. Ɗufal hyang ta ɓwai i Judya, hu Yerushalima, hu ɓwayai i Taya hu Saidon ima sita foi mbai i yiir.

¹⁸ Si yes ɓa si halus, ɓa si wis cala tasi mwatanan ames. Som ima siti rin mafwashi, si wis cala.

¹⁹ Ɗufal hyang si ni gbuk ɓa si ngge'us, ɓurti andok ma mulangya ta lo' ames, yis fasus cala shak.

Taɓak i Disyo'

²⁰ Unai Yeso, ɗing fe i ro ames, ni, “Disyo' si hun som jyel i rin, ɓurti kaitat i DeeƁwe a amu

²¹ Disyo' si hun som hwem mwashi, ɓurti hu wa wis ti kafaf, disyo' si hun som kawa mwashi, ɓurti hu wa musas.

²² Disyo' si hun hai myan ima ɗufal si nggwetu, myan ima si ɓelu ya hu si sya'u, si laiyu ti asum mafwashi, ɓurti Al i Maɗufal.

²³ “Jakak hun hu pipel na mulut fwet, ɓurti mal amu mii mbai ta fit. A fisel tima washash ames si kof som shit ya ta nai.

²⁴ “Mwe sui, hun som i ramwayat, ɓurti ti hu cu naya asu.

²⁵ Mwe sui, hun som i kafaf mwashi, ɓurti hu wa wis ti hwem. Mwe sui, hun ima hu musas mwashi, ɓurti hu wa kikyawat na mulut hu kawa.

²⁶ Mwe sui, hun ima ɗufal sima lak ti maɗesi amui fwet. Angga' ima ai washash ames si mas som i shit i fyaratat ta nai.

Ɓwet Hun Som ima Si Nggwetu

²⁷ “I laksu, hun ima hu halsun, ɓwet hun som ima si nggwetu, mas hun maɗesi tasi som ima si ɓwet ɗingsu kwa.

²⁸ Kin hun maɗesi tasi som ima si sya'ansu, hu fwal DeeƁwe ɓurti som ima si fa su shum.

²⁹ Na ɗeng paha na kapak i ucwa, hatata yus ti mapili hwak. Na ɗeng yis ɓweti kolsa ta wur i ɓur ɓa u mata godo ama ya, hona yus fagin asa hwak.

³⁰ Maɗufal ima fwala, Faha yus. Na ɗeng ha'a ɗama ya, kan ha nyus ɓa u humatikyel kwa.

³¹ Masa ɗufal aɗeng ima ha ɓweti si masai.

³² “Na hu ɓwet a som ima si ɓwetu je, awe ma wa palang su ya? Som masti mafwashi hwak si ɓyat som ima si ɓwetus.

³³ Na hu mas maɗesi wa kyel i som ima si masu maɗesi je, awe ma wa palang su ya? Som masti mafwashi hwak si masi andi.

³⁴ Na hu fa ɗufal wufer ti kintiɓwi nyai si yu wa mu humtikyel, awe ma wa palang su ya? Som masti mafwashi hwak si hwaf ɗiyai ti kintiɓwi nyai si yus wa mu humtikyel nggya-nggya.

³⁵ Ɓwet hun som ima si nggwetu, mas hun yus maɗesi, fahun wufyar kaciwa' kintiɓwi nyai si yu wa muhum ti kyel. Ati andi hu wa wisti maɗesi hyang, ti masi andi kof nyai, hun a fe i Mambaitat, ɓurtya yis a ma masti maɗesi tasi ɗufal ima wa' si palang, hu som i mulwat mufwashani.

³⁶ Ɗing hun shum i ɗufal fota ngga' ima Dee amu ta fit, ɗyang shum i ɗufal ta.

Ka Hu Tot Ɗeng Ɓur Kwa

³⁷ “Ka hu tot ɗeng ɓur hai kwa, ɓurti ka DeeƁwe totu ɓur. Ka hu nggul ɗeng ya kwa, ɓurtya kan DeeƁwe nggulu hun ya hwak. Shuhun ɗufal mafwashani ames ya, DeeƁwe ma wa shwaisu mafwashani amu ya.

³⁸ Fahun ɗufal mal, DeeƁwe ma wa fasu mal hwak. Hu wa mati kyalak sin mbwa' ani, si roi yis waya, si shuhi ta makuku. Ti ɓeleng tima hu mba ɗufali, a ti yit ɓelengi DeeƁwe ma wa mbasui ta hwak.”

³⁹ Unai Yeso kaanus findel nin ti lul nyai, “Manzyau ma wa shang ti kofti manzyau ti fisel haa? Shak si yus wa ndakan ta kwal wi, kwa haa?

⁴⁰ Mafar ti shangi ɓyan makofsus ti shangi kwa, shak ta andi, na kofus ti ndere, ma wa mute fota makofsus tii.

⁴¹ “A ɓurti mi ha ɗing ti al ture ta shit i nusa, ha nggwya i tirim si mbai i kunggul i yit ima mata shit yati?

⁴² Atini ha wa lak ti nusa nyai, ‘A nusun, hona i re'a al turei ya ta shit ama,’ myan ima ha ta mbai kunggul amai gung ta shit kaciwa' ɗingi ya? Ha magbaf! Tonga re' ti kunggul ya ta shit yati tawe, ɗak ha wis ɗing ti kyel ndere ha re' al ture ya ta shit i nusa ya.

Yit hu Ma'al Amet

⁴³ “Gung ti yit muɗesi ti fai ma'al mafwashi kwa, angga'i nai hwak gung ti yit mufwashi ti fai ma'al maɗesi kwa.

⁴⁴ Ka shang gung ti yit a ti musut i ma'al ima ti fai. Ɗufal si taang ma'al i makambong ta yit ti mburuk kwa, ahun al i manggɓu' ta yit ti aren kwa.

⁴⁵ Maɗufal manderei lang ya ti ɗamam maɗesi ta mulut ames, maɗufal mafwashi lang ya ti ɗamam mafwashi ta mulut ames. Ɓurtya aɗeng ima hya ta mulut i maɗufal, ayis lang ya ta fo ames.

Ta' i Halyang hu i Som Shingat

⁴⁶ “Ami kin hu laiyan sun ii ‘Deembai, Deembai,’ ɗak hu nggyu i masti aɗeng ima i laku ya?

⁴⁷ I wa kofsu ti musut i maɗufal ima yas kyel amen yis hal ti aɗeng ima i laki, yis ti masti ro.

⁴⁸ Ma fota maɗufal ima te wa ta' ti wur, tong ɓor ti kyel ii manggyongi wis kambar. Shu mahuhur tasi kambari hai, myan ima foon yes ɗara hya, ham wa nggok si wuri hai, ɗama wis wuri kwa, ɓurti ta' wuri ndere.

⁴⁹ Som ima si hal findel amen ɗak si nggwes i masti ro ti, si yus fota maɗufal ima ta' wur si ndik fisha kaciwa' mahuhur. Myan ima foon yes, ham kukol yes nggwal wuri ya, har ya fweng.”