Luka 4 - Findel i DeeƁwe Ti Alis i Ron

Shatan Mba Yeso

¹ Yeso humkyel ta Ɗara i Jodan, hya ti Rin Masapai, Rini ha'us wa ti ta ya,

² mas mukonan hure ɓaras Shatan yis mbasus. Na mukonani Yeso cu ɗama kwa, ta anggwe' i mukonani hwem hanus fwet.

³ Shatan nyus, “Na ha mii Al i DeeƁwe, laka afyai mii si hatat i folok.”

⁴ Unai Yeso matussi ni, “Si worong ta kaada i DeeƁwe nyai, ‘Maɗufal pyat ti a cwa kek je kwa.’ ”

⁵ Takfai ti mai, Shatan ha'us wa ti ta kyel masyai nin, ta si al myan, kofus ti kaitat i naya shak.

⁶ Ɗak nyus, “I wa fasa kaitat tasi ɗamam mii ya shak, hu shak mbaitat ames. Ɓurti shak ɗamami si na ra yunti, i wa fati maɗufal ima ɗatun ɓi i fas.

⁷ Ɓurti andi na ha cuun afut, shak ɗamami si wa mute i ama.”

⁸ Yeso nyus, “Si worong ta kaada i DeeƁwe nyai, ‘Ha wa cwai ti afut wa kyel i DeeƁwe ha masus ro ahwesi je.’ ”

⁹ Unai Shatan ha'us wa ti ta Yerushalima kinus ɓa u te mangra tasi mbet i hai Wur i DeeƁwe. Ɗak nyus, “Na ha a al i DeeƁwe, jika kyel nanati.

¹⁰ Si worong ta kaada i DeeƁwe nyai, “ ‘DeeƁwe ma wa kinti som lu' ames si fwanga ndere.

¹¹ Si wa fwangsa ya ti ra ames, ɓurti kan ha pa sai ya ta si afung hai kwa.’ ”

¹² Unai Yeso lakus ni, “Si lak ta kaada i DeeƁwe nyai, ‘Kan ha mba Deembai DeeƁwe ama kwa.’ ”

¹³ Myan ima Shatan mbit amba ames ya shak, unai hon Yeso i myan ndyong, yes myan ima ma wa wis ti kyel nin ta.

Yeso Fur Ro Ames ta Galili

¹⁴ Yeso humkyel ta Galili ti mbaitat i Rin Masapai, findel ames nggu' ashwai shak.

¹⁵ Kof ɗufal shangi ta mare i Ju, ɗufal shak si fas ngye.

Si Nggwes Ti Yeso ta Nazaret

¹⁶ Unai Yeso wa ta Nazaret, kyel ima ngye ta. Wa lang ta mare i Ju, Mwen ti Lafos ngga' ima mana ti maasani ta. Unai luk fit ɓa u mbe' ta kaada i DeeƁwe.

¹⁷ Unai si fas kaada i Ishaya mashit, unai ɓui wis kyel ima si worong si ni.

¹⁸ “Rin i Deembai mana hai yunti, ɓurti benun, ɓa i lak muro maɗesi wa kyel som i jyel, rohun ɓa i wa i lak waki i ra wa kyel i som ima sima mano', hu wis ti ɗing ti kyel i som ima si manzyau, rohun ɓa i cat som ima si mbo'sus,

¹⁹ hu ɓa i lak myan i abum i Deembai si ru.”

²⁰ Unai nggi' kaada i worongi ya, fa maro ta mare ya, ɗak tehus amun. Shak ɗufal ima si ta marei, si shuhus shishat hai,

²¹ unai lang lakus nyai, “Mai findel ima si worong ta kaada i DeeƁwe hya, fota ngga' ima hu hali ta.”

²² Shak ɗufal si lak maɗesi ames, si shok na fwai ɓurti findelal ima laki ɗatus ta si ɓwi hai. Unai si lul ta ɗiyai si ni, “Awinoo! Mai ali, a al i Josep kwaa?”

²³ Unai Yeso lakus ni, “Angga' nai, i shangi hu wa kaan sun ti findel i kaani nyai, ‘A ma fati manda, buma haisa tawe! Aɗeng ima ni hali ha masi ta Kapanahum, masai na ashwa ama.’ ”

²⁴ Unai Yeso cu wei ti findel nyai, “I laksu mwawei, si fai mashit i DeeƁwe ngye ta ashwa ames kwa.

²⁵ “I laksu mwawei nyai, ai arof ima arya ames si mwatus sin ta Isar'ila hyang tasi myan i Iliya. A tasi myani fit mavohus, i wil ataat ta ture taani kaciwa' foon, hwem ndak ta si ta'i hai ti ambas.

²⁶ Shak ta andi, DeeƁwe ro Iliya ta kyel i nin ta saa asus kwa, rohus ta kyel i mbor nin je, tima remet motus ta ashwa i Zerefat ta ta' i Saidon.

²⁷ Andi hwak, ai ɗufal hyang sin ta ta' ti Isar'ila ti mwatan i fukut i lo', tasi myan i Ilaisha mashit i DeeƁwe, shak ta andi andek ta saa yus ti wis njeng fota Na'aman maɗufal i ta' ti Sirya kwa.”

²⁸ Shak ɗufal ima si mata wii i marei ti hal ti mai i findeli, si mas futut ti ambas.

²⁹ Unai si rangya sin kpongkpongsus sin wa ti ta si mbelet i manggorong ima fiyai ima si ta' tasi ashwai ames i hai. Si wa ɓa si tukus ta si manggorongi.

³⁰ Shak ta andi, ɓak kyel ta saa yusti sin ɗyang sus fo, wis fisel asus.

Maɗufal Nin Ma Rin Mafwashi

³¹ Unai wa ta Kapanahum, ashwa nin ta Galili, Mwen ti Lafos, yis kofsus ti.

³² Si shok na fwai ti hal ti ɗamam ima laki, ɓurti findel ames mati mbaitat.

³³ Ta marei, maɗufal nin ima mati rin mafwashi yis ta kyeli hwak, gu' raafo ti ambas,

³⁴ ni, “Mwe! Ha far sinin ti amiya, a Yeso i Nazaret? Ha yes ɓa ha fwaar nin ya haa? I shanga, ha a Masapai i DeeƁwe!”

³⁵ Yeso ti ambas lak rin mafwashi ni, “Teha cakat! Langa ya na wii yusti!” Unai rin mafwashi i yi, ha' maɗufali hwiti ya ta fisha ta wei i ɗufal shak, ɗak lang ya kaciwa' masus afol.

³⁶ Shak ɗufali aɗengi lumus fwai ya, unai si lak ɗiyai si ni, “Anggi musut i kofiti mai ya? Ti mbaitat hu njeng, maɗufal mai, lak rin mufwashi ɓa si rangya, angga'i nai si rangya!”

³⁷ Aɗeng ima Yeso masi mai, kin findel ames nggu' kikyal ya shak.

Yeso Fa Ɗufal Hyang Cala

³⁸ Unai lang ya ta marei, wa wur i Siman. Wa wis kaasus ti Siman Pita yit raki ti mwatan yit yut nzam, unai si lak Yeso tirim amet.

³⁹ Unai wa te mangra nggas ti kyel ima ti raki ta cinggir, lak mwatani ɓin ɓa u lang ya, unai mwatani lang ya ta lo' amet. Fo abet ti luk fit, ti shwaiyus, ti ɗihus cwa.

⁴⁰ Myan ima ɓwe ti te wa ndak, ɗufal si yes ti som ima si ti mwatanan, unai Yeso kinus ra hai ti andek-andek fas cala shak asussi.

⁴¹ Unai rin mafwashi hwak sin murangya ta lo'a' i ɗufali hyang, sin raafo, nyai, “A ha a Al i DeeƁwe!” Unai Yeso lakus ɓin shaas findel, ɓurti si shangi yis a Kristi.

Yeso Lak Findel i DeeƁwe ta Mare

⁴² Mwen ti ɓu, unai Yeso lang ya wis ta ya ta kyel ima ɗeng mata kwa. Ɗufal si farus, si wisus, si hum ɓweti ɓa si honus u wa kyel nin hwak kwa.

⁴³ Unai nggwes, lakus ni, “A kpang i wa i lak muro maɗesi i kaitat i DeeƁwe ta anggum i ashwahai hwak, ɓurtya aɗeng ima si ron ɓa i yes i masi mai.”

⁴⁴ Unai wa yis lak ti findel i DeeƁwe ta mareha i Judya shak.