Luka 3 - Findel i DeeƁwe Ti Alis i Ron

Jwon Mabatisma Ɗak Yeso ti Fisel ta

¹ Ta si wil ma hure mulang hara i kaitat i makai mbai i Rom, Makai Tiberyus, myani Pontyus Pailet yis ii makunggul ta Judya. Herod yis i makaitat i Galili, nusus Filip yis i makaitat ta ɓwai ima ashwa i Iturya hu Trakonitis. Lisanyas yis i makaitat i Abilene.

² Anas hu Kayafas sima amun ta si hai kunggul i kocok. Tasi myani findel i DeeƁwe yes tasi hai i Jwon, al i Zakarya ta ya.

³ Unai Jwon wa ta kikyal i nggas ti Ɗara i Jodan, yis mba ti findel i hatat, ɓa si mas ɗufal batisma i shwaiti mafwashani ames ya.

⁴ Ishaya worong, “La ti ɗeng mashit ma findel ti njeng nyai, ‘ɗak hun ti Deembai fisel ta, ɓuhun yus fiselal ya si wa mangrai.

⁵ Shak fisha ima mata kikyel, si wa mandus, si wa taral ti shak fwereha hu anggashash ya, fiselal ima si lwyash si wa matas, fiselal ima si ti humam, si wa hatat i mulusani.

⁶ Shak ɗufal si wa ɗing ti abum i DeeƁwe.’ ”

⁷ Jwon lak suɓut i ɗufal ima si yes ɓa u masus batisma, unai nyus, “Hun ɗamafwashi shini! Awe nyu ɓa hu tital ta futut ima ma yes ya?

⁸ Mas hun aɗeng ima ɓa u kof hu wis ashen i mulwat, hu humkyel ta kyel i DeeƁwe ɓurti wis ti shwaiya. Kandok hu mbe' ta mulwat nyai deeminin a Ibirai. I laksu DeeƁwe mati mbaitat ima u hatat ti afyai mii si te ii fei i Ibirai.

⁹ Tu kin gaya' tasi gungai i yitat hai, ɓurti shak yit tima wa' ti fa ma'al maɗesi, u tel ya u hwiti ya ta man wi.”

¹⁰ Unai shak ɗufali si lulus nyai, “Ni wa masi atini ndai mwashi ya?”

¹¹ Unai Jwon lakus ni, “Maɗufal ima mati faginan apil, u fa ima wa' mati andek, maɗufal ima mati cwa, u fa som ima si ti jyel.”

¹² Som i mati cef i wufen hwak si wa ɓa u masus batisma, unai si lulus nyai, “A dee makofiti, ni wa masi atini ya?”

¹³ Unai lakus ni, “Ka hu mat ɗama tasi aɗeng ima si ni hu mat kwa.”

¹⁴ Som i ɓwol hwak si lulus nyai, “Nin hee, ami ni wa masi ya?” Unai nyus, “Ka hu ka' ɗufal ti cef ames ti njeng kwa, ka hu lak fyarat ta si ɗeng hai kwa, ka' hun mulut ti aɗeng ima si talsu.”

¹⁵ Ɗufali si kintiɓwi fwet, shak asussi si lang mbe'i ta mulwat nyai ahun a Jwon mii Kristi.

¹⁶ Unai Jwon nyus, “Yin i masu batisma ti ham, ɗeng ma yes ima ɓin nun mbaitat, i ndok i hwetus mwinggi' i kpakasak ames ya kwa. Ayis ma wa masu batisma ti Rin Masapai hu man.

¹⁷ Ka' kaɓor ta ra ames, ma wa viti macwa ames, u suɓut cwai, u shu ta hot ames, ɗak ngyesh mwii yi ya ti man ima fwat kwa.”

¹⁸ Ti findelal i tapi hyang, Jwon lak ɗufal Muro Maɗesi i DeeƁwe.

¹⁹ Nin aɗeng ima Jwon masi lak Makai Herod ɓin, ti kunggo ti Uhirodya mbor ti nusus Filip hu ɗamam shini mufwashani ima masus.

²⁰ Unai Herod dala rafat ti ɗat i aɗengi ya ti nyai, ɓa si ka' Jwon si vo ta wur i shitam.

Batisma i Yeso

²¹ Ta takfai tima si mas ɗufal shak batisma, unai mas Yeso batisma hwak. Myan ima Yeso te fwal ti DeeƁwe, unai fit maɓu ya.

²² Rin Masapai ɗorus hai fota ngga' ima gurguta ti ta. Unai si hal la nin ta fit yit nyai, “Mai a Al amen, ima i ɓwetsus, i mati pipelat na mulut ɓursus.”

Manzor i Gung i Yeso

²³ Myan ima Yeso tong ro ames yis ti wilyal hure ataat na naya. Ɗufal si ha'us, a al i Josep, Josep a al i Heli.

²⁴ Heli a al i Matat, Matat a al i Livai, Livai a al i Melki, Melki a al i Janai, Janai a al i Josep.

²⁵ Josep a al i Matatyas, Matatyas a al i Emos, Emos a al i Nahum, Nahum a al i Esli, Esli a al i Nagai.

²⁶ Nagai a al i Maat, Maat a al i Matatyas, Matatyas a al i Semeyin, Semeyin a al i Josek, Josek a al i Joda.

²⁷ Joda a al i Jwonan, Jwonan a al i Resa, Resa a al i Zarubabel, Zarubabel a al i Shaltyel, Shaltyel a al i Neri.

²⁸ Neri a al i Melki, Melki a al i Addi, Addi a al i Kosam, Kosam a al i Elmadam, Elmadam a al i Er.

²⁹ Er a al i Joshuwa, Joshuwa a al i Elyezer, Elyezer a al i Jorim, Jorim a al i Matat, Matat al i Livai.

³⁰ Livai a al i Simyon, Simyon a al i Juda, Juda a al i Josep, Josep a al i Jonam, Jonam a al i Elyakim.

³¹ Elyakim a al i Melya, Melya a al i Mena, Mena a al i Matata, Matata a al i Natan, Natan al i Devid.

³² Devid a al i Yese, Yese a al i Obed, Obed a al i Bowaz, Bowaz a al i Salmon, Salmon a al i Nashon.

³³ Nashon a al i Aminadab, Aminadab a al i Ram, Ram a al i Hezron, Hezron a al i Feres, Feres a al i Juda.

³⁴ Juda a al i Jakop, Jakop a al i Aizik, Aizik a al i Ibirai, Ibirai a al i Tera, Tera a al i Nahor.

³⁵ Nahor a al i Serug, Serug a al i Reu, Reu a al i Peleg, Peleg a al i Eba, Eba a al i Sala, Sala a al i Kenan.

³⁶ Kenan a al i Afakshad, Afakshad a al i Shem, Shem a al i Nowa, Nowa a al i Lamek.

³⁷ Lamek a al i Metusela, Metusela a al i Enok, Enok a al i Jared, Jared a al i Mahalalel, Mahalalel a al i Kenan.

³⁸ Kenan a al i Enosh, Enosh a al i Set, Set a al i Damu, Damu a al i DeeƁwe.