Luka 24 - Findel i DeeƁwe Ti Alis i Ron

Muluk Fit i Yeso ta Fiyai

¹ Tamwen wititit mwen ti bya', arofi si har ɗamam mafyongi ima si ɗak ti, si wa ti ta fiyaiyi.

² Si wisi afungi mati si tuk ya ta foi fiyaiyi,

³ myan ima si rang ta, si far funat i Deembai Yeso wet.

⁴ Sin ɗiri ambe'a' tasi aɗeng mai, fo abet ɗufal shini apilal sin ti faginan mapelani syak, si te mangrai nggas ti sin arofi.

⁵ Myanat ka'us fwet si ni mwa' si shu i mafwaran shishat ames ta fisha, unai ɗufali si nyus, “Ami kin hu far ti mapweti na saa ti som ima si mot ya?

⁶ Mana kwa, tu luk fit! Mbe' hun ti aɗeng ima laku myan ima yis ɗiri akul hu hun ta Galili.

⁷ Ni, ‘A kpang si fa Al i Maɗufal ta ra i som mufwashi, si nggwakus tasi shanggam hai, mwen mutaat u luk fit ti mupwet.’ ”

⁸ Unai arofi si mbe' findel amesi.

⁹ Myan ima si humkyel ta fiyaiyi, si lak shak ɗamami wa kyel i fe muro ames hure mulang andeki hu anggumi.

¹⁰ Arof ima si lak fe muro amesi, a hu Uryam ta Magdala, hu Ujwana, hu Uryam nasus ti Jemis, hu shini arof ima si wa tikul.

¹¹ Shak ta andi, si nggwes i fati mwawei, ɓurti si zan findel amesi fota a findel i gbya'.

¹² Shak ta andi, Pita lang rwa' ti tital, wa ta kyel i fiyaiyi, ni mwa' ɗing kyel ta wii, ɗing arom ima si laiyus tii. Unai humkyel yis mbe' ti aɗeng ima furi.

Ta Fisel i Wa Imawus

¹³ Yit mweni hwak, shini apil ta saa yusti si lang ta hwen ima si lai ii Imawus, maleng amet ta Yerushalima kol mel pyoron.

¹⁴ Sin findel ti ɗiyai ta si shak ɗamam ima si fur.

¹⁵ Myan ima sin saa ti findeli sin mataa si ɗamam mii hai, unai Yeso yes wisus, si cu wei ti ɗa'at tikul.

¹⁶ Shak ta andi, si vos shishat ya kan si shangus.

¹⁷ Yeso lulus ni, “A findel i mi hu laki na fisel hun ti ɗa'at ya?” Si te mangrai jiir, si kof kikyawat na mulwat.

¹⁸ Andek ta saa yusti ma asum Kilyopas, lulus ni, “A ha je ha mii mwalmwat na Yerushalima haa? Ɗamam ima si fur nasi wufeni mukonan mii ha shangi kwani?”

¹⁹ Yeso lulus ni, “Anggi ɗamami ya?” Si nyus, “A ɗamam ta si Yeso i Nazaret hai. Yis a mashit, findel hu roha ames si mati mbaitat ta wei i DeeƁwe hu ɗufal shak.

²⁰ Mbayai i kocokak hu kaya si fas ta ra ɓa si lefus ɓur i mot, si nggwakus.

²¹ Ai nin kintiɓwi nyai ayis ma wa bum ti Isar'ila. U mai kwai, mukon mataat moti ti mufur i ɗamam mii nasi wufeni hai.

²² Andi hwak, shini arof aminin ni si lak nin ɗama i shok na fwai. Si ɗik wa ta fiyaiyi tamwen wititit kwai,

²³ si wa si far funat amesi ta wet. Si humkyel si lak nin nyai, si ɗing som lu' i DeeƁwe ima si ni mati mupwet.

²⁴ Myayus aminin shini si wa ta fiyaiyi si wisi ta ngga' ima arofi si lak ta, a yis kek si ɗingus kwa.”

²⁵ Yeso nyus, “Kai! Hun halyang, ami kin hu tiɗya na mulwat si fati mwawei tasi aɗeng ima som shit si lak ya?

²⁶ A kpang Kristi u wo shum nasi ɗamam mii hai, ɗak lang ta mbaitat ames, kwa haa?”

²⁷ Yeso furi tasi worong i Mosis, yes shak som shit, ɓus shishat ya tasi shak Worong i DeeƁwe ima si lak ta hai yusti.

²⁸ Myan ima si kat ndyong ti hwen ima si wa ta, Yeso masi fota mayus cwai ti wei ti ɗa'at.

²⁹ Si fwalus fwet si ni, “Kona na, ɗak wasan ha wa, ɓurti ɓwe ti ndak, fo' ti mas.” Unai matus hei, si wa tikul.

³⁰ Myan ima si te amun tikul hu sin, unai zan folok palang DeeƁwe, nggyalti kaarussi.

³¹ Fo abet shishat ames si maɓu ya. Myan ima si kinus asum, nzelekus ta kyel ames.

³² Unai si lul ta ɗiyai si ni, “I mbyar kwa! Mulwat amukan si cu kan myan ima yis findel sikan ta fisel, hu ngga' ima ɓukan shang ti Worong i DeeƁwe ta!”

³³ Si ni kabuta ta fisha muhumkyel ta Yerushalima. Si wa si wis fe muro hure mulang andeki, hu shini ɗufali, si suɓut ta kyel andek.

³⁴ Si nyus, “Awei! Deembai luk fit, pwak Siman hai hwak.”

³⁵ Unai ɗufal apili si lak aɗeng ima wisus ta fisel, hu ngga' ima si kinus asum si shangi a Yeso myan ima nggyal folok ɓa u kaarussi.

Yeso Pwak Fe Ro Ames Hai

³⁶ Myan ima sin saa ti mba ti findelali, Yeso ti haisus pwakus hai te mangra ta saa yusti ɗak nyus, “Cala asu!”

³⁷ Myanat ka'us si aro i lo', sin nyai si ɗing tya malu'.

³⁸ Lakus ni, “Ami kin hu myanat fwet ya? Ami kin hu ma mulut apil-apil ya?

³⁹ Ɗinghun ra hu sisai amen. Ayin ti haisun! Ngge' huna hu hali, ɓurti malu' mati lo hu kyasas kwa, ngga' ima hu ɗingi i mati.”

⁴⁰ Myan ima lak mai, kofus ra ta sisai amesi.

⁴¹ Si fa mwawei kwa ɓurti pipelat na mulut hu shok na fo, Yeso lulus ni, “Hu mati ɗama i cwai nin nanati haa?”

⁴² Si fas gushe ima si ɗi,

⁴³ unai mat cu ta shishat yusti.

⁴⁴ Lakus ni, “A findelal ima i laku mii, myan ima ai kan tikul. Shak ɗamam ima si worong na hai yunti ta Anggut i Mosis, hu i Som Shit, hu i Nakwai, a kpang si hya.”

⁴⁵ Unai ɓus mulwat ames ya ɓa si shang Worong i DeeƁwe.

⁴⁶ Lakus ni, “Aɗeng ima si worong mai, Kristi ma wa woti shum, u luk fit ta fiyai mwen mutaat.

⁴⁷ Si wa mba ti findel i hatat, hu shwaiti mafwashi ya ti asum amen, wa kyel i ramam shak, furi ta Yerushalima.

⁴⁸ A hun hu wa lak ti ɗamam mii.

⁴⁹ I wa tuksu aɗeng ima Deen lak ni ma wa tuksui. Tehun na Yerushalima tawe, yes myan ima mbaitat ta fit ma wa muɗor su hai.”

Yeso Wa Fit

⁵⁰ Myan ima langtus ya ta si tur i Betani, haar ra ames ta fit kinus maɗesi.

⁵¹ Yis saa ti kinsus maɗesi ndai, honus ta kyeli si zanus ya wa fit.

⁵² Unai si cus afut ɗak si humkyel ta Yerushalima ti pipelat na mulwat fwet.

⁵³ Si cu wei ti mute ta Wur i DeeƁwe sin ha' ti asum i DeeƁwe fit.