Luka 23 - Findel i DeeƁwe Ti Alis i Ron

Yeso ta Wei i Pailet

¹ Unai shak suɓuti si lukfit si langti Yeso tawei i Pailet, makunggul i Rom.

² Unai si fur lak ti findelal i tinder nyai, “Ni wis maɗufal mai yis ring ti shak ɗufal aminin ya. Mas wei ti tal ti cef i wufen wa kyel i Makai, yis zan haisus a Kristi, hu makai hwak.”

³ Unai Pailet lul ta Yeso ni, “A ha ha mii makai i som Ju haa?” Yeso matussi ni, “Hei, aɗeng ima ha lak a andi.”

⁴ Unai Pailet lak mbayai i kocokak hu anggum i ɗufali ni, “Yin i wis maɗufal mai ti mafwashi nin kwa.”

⁵ Shak ta andi, si ɓweng sai sin nyai, “Kofiti ames ma ring ti ɗufal na Judya shak. Aɗeng ima ka'i ta Galili u mai ru nanati.”

⁶ Myan ima Pailet hal mai, lul lul ni, “A maɗufal i Galili ani?”

⁷ Myan ima shangi nyai Yeso lang ii ta ta' ti kaitat ti Herod, unai tukus wa kyeli Herod, yis ta Yerushalima.

⁸ Herod pipel na mulut fwet ti ɗing ti Yeso, ɓurti yash yis ɓweti ɗing ti Yeso, kinɓwi ɓa u ɗingus yis masti ɗama i shok na fo ya.

⁹ Unai Herod lulus lulal hyang, Yeso tyos cakat.

¹⁰ Unai mbayai i kocokak hu som kofiti anggut hai sin mangrai ta kyeli, si ɓweng sisai ti njeng fasus mafwashi.

¹¹ Unai Herod hu som i ɓwol ames si totus gbaf hai sin komsus ya. Si ru'us mbai fagin, ɗak si humtus kyel ta kyeli Pailet.

¹² A mweni Herod hu Pailet si mas myatat, ai sin ha' ti wei ti ɗiyai.

Si Lef Yeso Ɓur i Mot

¹³ Pailet lai suɓut i mbayai i kocokak, hu kaya, hu ɗufal shak,

¹⁴ Unai nyus, “Hu kolun maɗufal ima hu ni ma ring ti ɗufal ɓa si njeng na hihai. Mwashi, u mai i benes na wei yuti, i wisus ti mafwashi ima hu lak na hai yusti kwa.

¹⁵ Herod hwak wisus ti mafwashi kwa, ti'us yes kyel aminin hwak. Ngga' ima hu ɗingi ta, maɗufal mai mas ɗama ima ndok si forus kwa.

¹⁶ Ɓurti andi, i wa saramansus i catus ii ra.”

¹⁸ Unai shak si ha' la ta fit ti fo andek, si ni, “Ha' hun nin maɗufal mai ya na ti! Hu ak nin Barabas ii ra!”

¹⁹ (Ai si kin Barabas ta wur i shitam ɓurti njeng ti hai ta ashwai, hu for maɗufal.)

²⁰ Pailet yis ɓweti ɓa u ak Yeso ii ra, unai hum findel ti ɗufali.

²¹ Unai si cuus wei ti taanja hu rafo nyai, “Nggwak hun yus! Nggwak hun yus!”

²² Pailet hum findel mataat ni, “A ɓurti mi ya? Anggi mafwashi maɗufal mai masi ya? Yin i wisus ti mafwashi ima ndok si forus kwa. I wa kini si ndashus, si akus ii ra.”

²³ Unai si tyos mangrai jiir sin yus ta jai kaciwa' nyai reket sin raafo nyai a kpang si nggwakus. Unai si wo hai ames ti raafo.

²⁴ Unai Pailet lef ɓuri ta ngga' ima si ɓweti.

²⁵ Unai kin si ak Barabas ii ra ngga' ima si ɓweti, yis ima wa mano' ta wur i shitam, ɓurti njeng ti hai ta ashwai, hu for maɗufal. Unai Pailet fa Yesoi ta ra ames ngga' ima si ɓweti.

Si Nggwak Yeso Tasi Kunggul

²⁶ Som i ɓwol sin wa ti Yesoi, unai si shwai hu maɗufal nin ima si lai ii Siman, maɗufal i Sairin, yis yes ta ya. Si lyamus si kinus kpang ɓa u ha' Shanggami u koltifai ti Yeso.

²⁷ Ɗufal hyang si kolfai asussi, ta saa yusti shini arofi sin tifai sin kawayai sin gwa'an ti raafo ɓursus.

²⁸ Unai Yeso hatat ta kyel ames, nyus, “A arof i Yerushalima, ka hu kawa ɓursun kwa, kawa hun ɓurti haisu hu femu.

²⁹ Ɓurti myan si yes ima ɗufal si wa nyai, ‘Disyo' arof ima wa' si al, si ngguriyatus, ima wa' fe si wo fufwaf ames!’

³⁰ A myani, “ ‘Ɗufal si wa nyai anggashash, “Fwaar hun nin hai!” Si wa lak ti fwereha nyai, “vo hun nin ya!” ’

³¹ ‘Na ɗufal si mas mai aɗengi myan ima gung i yiti yit ii muɗyayi, si wa masi atini myan ima ti shokut ya?’ ”

³² Unai si wa ti shini ɗufal apili ima si mas mafwashi, ɓa si forus akul hu Yeso.

³³ Myan ima si kol ta kyel ima si lai ii “Kyasas i Hihai” unai si nggwakus si kunggul hai, akul hu som ima si mas mafwashi, andek ta rai ucwa mandeki ta rai ukutyal.

³⁴ Unai Yeso ni, “A Dee, shwa yusi ya, ɓurti si shang aɗeng ima si masi kwa.” Unai si kar arom amesi, ta fisel ti hwiti aben.

³⁵ Ɗufal sin mangrai sin ɗingi, som i kaitat si gbafus ya, sin nyai, “Bum shini, hon hun u bum haisus, na ni yis a Kristi i DeeƁwe, ima si Ben!”

³⁶ Som i ɓwol hwak si yes si gbafus ya, si ti'us ham i manggɓu' macani.

³⁷ Si nyus, “Na ha mii makai i Ju, buma haisa.”

³⁸ Si nggwak worong ta fit i hai ames, ima ni, “MAI A MAKAI I JU.”

³⁹ Andek ta saa ti asher ima si nggwakus, masus findel i gbya', nyai, “A ha ha mii Kristi kwa haa? Buma haisa, ha bum nin hwak!”

⁴⁰ Asher mapili lakus ɓin ni, “Ha mwen DeeƁwe fo kwani? Si lefa ɓur kiga' hu yis hoo?

⁴¹ Si lef kun ɓur a kiga' ɓurti ku muhum ti aɗeng ima ku masi. Anggi mafwashi mai maɗufali masi ya?”

⁴² Unai yis ni, “A Yeso! Mbe'a ti yin myan ima ha ka' kaitat ama!”

⁴³ Unai Yeso nyus, “I laksa mwawei, kwai ha wa mute akul hu yin ta Wur i Fit.”

Mot i Yeso

⁴⁴ Sai i ren, maɓing vo wufen ya shak, yes shitam ataat ti ango.

⁴⁵ Ɓwe ti nggwet i fati kweneng. Fagir ima si voti wii kyel i Wur i DeeƁwe hwak, matkar apil.

⁴⁶ Yeso taanja ti la mbai ni, “A Dee i fa rin amen ta ra ama.” Myan ima lak mai, dul lafos i dala.

⁴⁷ Mbai i som ɓwol, ɗing ɗamam ima si fur, fa DeeƁwe mbaitat ni, “Aweii maɗufal mai a ma manderei!”

⁴⁸ Myan ima ɗufal shak ima si suɓut ɓa si ɗingi ti shishat ames ɗamam ima ma wa, si shu ra ta hihai ames, si humkyel ti kikyauwat na mulwat.

⁴⁹ Unai shak ɗufal ima si shang Yeso, shak ta arof ima si kolfai asussi ta Galili, si te mangrai ta maleng sin ɗingi.

Lai i Yeso

⁵⁰ Maɗufal nin ma asum Josep, ima ma andek ta saa ti Suɓut i Kaya. A maɗufal manderei, ma myanat ti DeeƁwe fo,

⁵¹ ima nggwes ti ka'ti man ima si masi tasi i Yeso hai. A maɗufal i Judya ta ashwa i Arimatya, yis shwaiti yes i kaitat i DeeƁwe.

⁵² Wa kyel i Pailet fwalus ɓa si fas funat i Yeso.

⁵³ Unai jak funati kyel, ɗak nggi'us ta wii i lukul wi. Wa kin ta fiyai ima si yong ta ɗafyai wi, ima wa' si lai ɗeng ta.

⁵⁴ A Mwen ti Sinzam ti kyel hu Mwen ti Lafos ti kat vaat ɓa si furi.

⁵⁵ Arof ima si kolfai ti Yeso ta Galili, si kolfai ti Josep si ɗing fiyaiyi, hu ngga' ima si kin funat i Yeso ta.

⁵⁶ Si humkyel ta wurai si ɗak ti ɗamam mafyongi hu mbarai mafyongi i fyali. Si fi wur ɓa si hya anggut ti Mwen ti Lafos.