Luka 22 - Findel i DeeƁwe Ti Alis i Ron

Judas Cu Han Ɓa Si For Yeso

¹ Myan i Got i Folok Ma kaciwa' Yisti, ima si layani ii Got i Pissihai yes nggas,

² unai mbayai i kocokak hu som kofiti si anggut hai si ka' far ti ngga' ima ɓa si for Yeso ta, ɓurti si myanat ti ɗufal fo.

³ Unai Shatan lang ta Judas wi, ima si laiyus ii Iskaryot, andek ta saa ti fe i ro amesi hure mulang apil.

⁴ Unai Judas wa findel mbayai i kocokak, hu mbayai i som i fwang ti Wur i DeeƁwe, si lak ngga' ima ma wa fasus Yeso ta ra.

⁵ Si pipel na mulwat fwet si ɓetti nyai si wa fa sus cef.

⁶ Yis ɓwet ɓa u fas Yeso, unai far fisel tima ɓa u fas Yeso ta ra ames, myani ɗufal sin ta kyeli kwa.

Yeso Kin si Cu Cwa i Pissihai

⁷ Mwen ti Got i Folok ma kaciwa' Yisti ru, a mwen ti for tutwi i kuna i Got i Pissihai.

⁸ Unai Yeso ro Pita hu Jwon ni, “Ɓu hu ɗi kan cwa i cwai ɓurti Got i Pissihai.”

⁹ Unai si lulus si ni, “Ha ɓweti ɓa ni wa ni ɗak ti kyeli a ta leya?”

¹⁰ Yis nyus, “Hu lang ta ashwai, hu wa shwai hu maɗufal nin yis ti ɗya i ham, kol hun fai asussi wa ta wur ima langta.

¹¹ Hu lak dee mawuri nyai, ‘Makofiti lak ni, “Anggi ahomi ma wa cwai ti cwa i Got i Pissihai ta hu fe i ro ames ya?” ’

¹² Ma wa kofsu ti ahom ta wur i fit nin, ima si ɗak ti. A ta te'i hu wa ɗak sikan ti ɗamami ta.”

¹³ Unai si wa si wis ɗamam tasi ngga' ima Yeso lakus ta, unai si ɗak ti cwa i Got i Pissihai ta kyeli.

Cwa i Dala i Deembai

¹⁴ Myan si mas, unai Yeso te amun akul hu fe muro ames ɓa si cu cwai.

¹⁵ Unai lakus ni, “I ma cwai ti mulut ya ɓa i cu Got i Pissihai amai akul hu hun ɗak i lang woti shum!

¹⁶ Ɓurti i laksu, i wa muhum cwai ti got mai kwa, ɗak mangga i aɗeng mai wis hya ta kaitat i DeeƁwe.”

¹⁷ Unai ha' cunjo i ham i manggɓu', palang ni, “Mat hun hu kaar ɗiyaiyi.

¹⁸ I laksu nyai, nasi mwashi wa wei, i wa muhum woti ham i manggɓu' akul hu hun kwa, na kaitat i DeeƁwe yes tawe.”

¹⁹ Unai ha' folok palang DeeƁwe, nggyal fas ni, “Mai a lo' amen ima i fa ɓursu. Maas huni ati ɓurti mbe'i ti yin.”

²⁰ “A andi hwak, takfai ti cwa i mango, zan cunjoi, ni, ‘Moti cunjoi, a dakwa mamwai i wash amen ima i shuya ɓursu.’

²¹ Shak ta andi, maɗufal ima ma wa cwai ti han amen, u mai ni ma tikul, ni ma cwai na kyel andek.

²² Al i Maɗufal mayus wa wa, fota ngga' ima DeeƁwe lak ta, shak ta andi mwe i maɗufal ima cu han amen.”

²³ Unai si fur luli ta ɗiyai nyai, “Awe ma wa masti mai i maɗengi na saa kanti ya?”

Uɓet Tasi Mbaitat

²⁴ Unai uɓet ti lang ta saa ti fe i ro ames nyai, awe ma wa mute i mbai na saa yusti ya.

²⁵ Unai Yeso nyus, “Kaya i ramam si masi fota a sin siti mupwet i ɗufal ta ra ames. Ɗak mbayai ima si ti kunggwal i kaitat, si lai haisus ii som i ɗing ti shum i ɗufal.”

²⁶ Ka hun hu te andi kwa. Amui mai, mbai u te fota mavaati, makaitat na saa yuti u te fota yere.

²⁷ Awe ɓin mbaitat ya? A maɗufal ima te amun cwai ti cwa, ahun a yere ma masti ro ya? A maɗufal ima te amun ta kyel i cwai ti cwa kwani? Unai i na saa yuti fota yere ma kolsu cwa.

²⁸ “A hun hu te akul hu yin ti njeng tasi shak shum ima i wo.

²⁹ Fota ngga' ima Deen fan kaitat ta, yin hwak i fu kaitat ti,

³⁰ ɓurti hu cu, hu wo akul hu yin na kaitat amen. Hu wa mute tasi kunggwal, hu wa tot ti gung hure mulang apil i Isar'ila ɓur.

Yeso Lak Ɓwinggil i Pita

³¹ “Siman, Siman! Shatan lul ɓa u mba ha, u cinjaka ya.

³² I fwal DeeƁwe ɓursa, Siman, ɓurti kan fati mwawei a sa ti fur. Myan ima ha humkyel, ha ha' shuna fit ha fas njeng.”

³³ Siman matussi ni, “A Deembai, i fa haisun ɓa i wa mano' akul hu ha, na a mot ku mot akul hu ha!”

³⁴ Yeso nyus, “I laksa, Pita, ha wa ɓwingil sa ataat nyai ha shangun kwa, ɗak korong tutol.”

Mala i Cef, Rukul hu Awal

³⁵ Unai Yeso lul fe muro ames ni, “Myan ima i ro hu kaciwa' cef, hu rukul, hu cwa, hu kpakasak, hu dun ɗama haa?” Si ni, “Ni dun ɗama kwa.”

³⁶ Unai nyus, “Mwashi maɗufal ima mati mala i cef u zan, ta rukuli hwak. Na ha mati awal kwa, ha juwil fagin asa ya ha juwil ti andek.

³⁷ I laksu, a kpang findel mai u hya na hai yunti, ‘Si futus hu som i masti mafwashi.’ Angga'i nai aɗeng ima si worong na hai yunti a kpang u hya. Hei andi, aɗeng ima si worong na hai yunti ma hya mwashi.”

³⁸ Unai fe i ro ames si ni, “Ɗingai, a Deembai, awal mii a apil.” Unai yis nyus, “Ndok andi.”

Yeso Fwal DeeƁwe ta Fwere i Yitat i Mbar

³⁹ Unai Yeso lang ya ta ngga' ima mana ti masani ta, ɗu ta Fwere i Yitat i Mbar, fe i ro ames si wa tifai.

⁴⁰ Myan ima ru ta kyeli, lakus ni, “Fwal hun DeeƁwe ɓurti kandok hu fur ta amba wi.”

⁴¹ Unai yis her ta wei ti sin ndyong, unai shui mafwaran fwal DeeƁwe ni,

⁴² “A Dee, na ha ɓwet, ha'a yun cunjo ti shum moti ya. Shak ta andi, a ti ɓweti amen kwa, hona ɓa u te a ɓweti ama.”

⁴³ Unai malu' ta fit pwak ya ta kyeli ɓursus fas njeng.

⁴⁴ Ɓurti ma hal ti kinggat i shum hyang, hum fwal ti DeeƁwe fwet, taa fota wash yis ndyaf ta fisha.

⁴⁵ Myan ima luk fit ta fwal ti DeeƁwe, unai humkyel ta kyel i fe i ro ames, wisus sin yus ɗarak, lo' ames nungus ɓurti kikyawat na mulwat.

⁴⁶ Unai lulus ni, “Ami kin hu yu ɗarak ya? Luk hun fit hu fwal DeeƁwe ɓurti kandok hu fur ta amba wi.”

Si Ka' Yeso

⁴⁷ Yis saa ti findel, ɗufal si pwakus hai. A Judas Iskarioti andek ta saa ti hure mulang apili, yis ta wei kofsus fisel. Unai hyer ta nggas ti Yeso ɓa wo kapak ames ti to'.

⁴⁸ Unai Yeso lulus ni, “Judas, a ha hama fati Al i Maɗufal ti woti kapak haa?”

⁴⁹ Myan ima fe i ro i Yeso si ɗing aɗeng ima ma wa mufur, si ni, “A Deembai, ɓa ni mas ro ti awal aminin haa?”

⁵⁰ Unai andek ta saa yusti fet mwal ti ucwa ti yere i mbai i makocok ya.

⁵¹ Yeso matussi ni, “Hona! Ka hu hum maas ti mai kwa!” Unai ngge' mwal ti maɗufali, fas cala.

⁵² Unai Yeso lak mbayai i kocokak, hu mbayai i som i ɗing ti Wur i DeeƁwe, hu kaya, ima si yes ɓursus, nyus, “Ami kin hu yes ka' sun ti awal i ɓwol ta gundulal i yitat, fota yin a asher ya?

⁵³ Ngang ima akul hu hun ta wii Wur i DeeƁwe, ami kin hu ka' sun. Mwashi a myan amu hu i kaitat i maɓing.”

Pita Ɓwinggil Shang ti Yeso

⁵⁴ Unai si ka'us, si watus ta wur i makocok mbai. Pita kolfai ta maleng.

⁵⁵ Myan ima si lu' man ta taya i wuri sin hali akul, Pita hwak te amun ta saa yusti.

⁵⁶ Yamwan nin tima ti mii yere ti ɗing Pita amun ta fo i man, ti ɗingus fo ɗak ti ni, “Maɗufal mai hwak ma akul hu Yeso!”

⁵⁷ Pita ɓwingil nyut, “Halshii! Yin i shangus kwa.”

⁵⁸ Takfai ti andi, maɗufal nin ɗingus ni, “Ha hwak a andek ta saa yusti.” Unai Pita matussi ni, “Halai! Ayin kwa.”

⁵⁹ Takfai ti shitam andek nin yes ɓweng sai ni, “A awei, maɗufal mai ma akul hu Yeso, ɓurti yis a ma Galili.”

⁶⁰ Pita matussi ni, “Halai! I shang aɗeng ima ha laki kwa fweng!” Myani yis saa ti findel, unai korong tutol.

⁶¹ Deembai hatat tifai ɗing Pita fo. Unai Pita mbe' findel ima Deembai lakus ni, “Ha wa ɓwingil sa ataat nyai ha shangun kwa, ɗak korong tutol.”

⁶² Unai lang ya ta saikyel kawa fwet.

Si Mas Yeso Gbaf Hai

⁶³ Som ima si fas ro i ɗing ti Yeso, si lang masus gbaf hai si ndashus.

⁶⁴ Si vos shishat ya, si nyus, “Laka nin findel i mashit! Awe paha ya?”

⁶⁵ Si lakus findelal i gbaf hai hyang.

Yeso ta Wei i Suɓut i Kaya

⁶⁶ Ti ɓwai i mwen, Suɓut i Kaya si shwai, hu mbaiyai i kocokak, hu som kofiti si anggut hai, unai si yes ti Yeso ta mabel ames.

⁶⁷ Si lulus nyai, “Laka nin, a ha ha mii Kristi haa?” Yeso matussi ni, “Na i laku, hu wa fati mwawei kwa.

⁶⁸ Na i lulu lul, hu wa laksun ti kwa.

⁶⁹ Nasi mwashi yes wei, Al i Maɗufal ma wa mute ta ra i ucwa i DeeƁwe mambaitat.”

⁷⁰ Unai shak asussi si lulus nyai, “A ha mai, ha mii Al i DeeƁwe haa?” Unai matussi ni, “Hu lak kiga', ayin.”

⁷¹ Unai si ni, “Anggi findeli hu ɓweti hu hali hwak ya? Ka hali ta fo ames ndai.”