Luka 20 - Findel i DeeƁwe Ti Alis i Ron

Mbaitat i Yeso

¹ Nin mweni ndai, Yeso yis kofiti ta Wur i DeeƁwe, yis mba ti ɗufal muro maɗesi, unai mbayai i kocokak, hu som kofiti si anggut hai, akul hu kaya i Isra'ila si yes kyel ames.

² Si lulus nyai, “Laka nin ati nggi mbaitat ti ha maas ti ɗamam mii ya. Awe fa mai mbaitati ya?”

³ Yeso matussi ni, “Yin hwak i wa lulsu lul. Lak huna,

⁴ batisma ti Jwon, ii ta fit ahun ii ta kyel i ɗufal ya?”

⁵ Si mas uɓet ɓatasin, si ni “Na kani ‘Yes ii ta kyel i DeeƁwe,’ ma wa lul u ni, ‘Ami kin hunggyu i fati mwawei ta hai yusti ya?’

⁶ Ma kani, ‘I ta kyel i ɗufal,’ shak ɗufal mii si wa hwyayan sikan ti afyai, ɓurti shak asussi si fa mwawei nyai Jwon Mabatisma a mashit.”

⁷ Ɓurti andi si nyus, “Ni shang kyel ima lang ta kwa.”

⁸ Yeso ni, “Yin hwak i wa laksu ti mbaitat ima i ti masti ɗamam mii kwa.”

Kaani Ti Som i Mahan

⁹ Yeso cu wei ti lak ti findel i kaani nyai, “Ai maɗufal nin lai yang ti manggɓu', unai u kin yangi ta ra i shini som i makoki, ɗak wis ɗa'at i myan hyang.

¹⁰ Myan i karati manggɓu' ru, unai ro yere ames ɓa si wa kyel i som i mahani, ɓa si fas manggɓu'i ta. Unai som i makoki si ndashus si ti'us ra ashoki.

¹¹ Hum tuk ti yere nin hwak, yes, som i makoki si ndashus, si fas shusho, si ti'us ya ra ashoki.

¹² Hum tuk ti mataati, si masus afolal, si hwitus ya ta saikyel fweng.

¹³ “Unai mayangi ni, ‘Mwashi i wa masti amiya? I wa ro ti al amen ɗwyat ima i ɓwetus fwet, ashang si fas mbaitat!’

¹⁴ “Myan ima som ima si makoki si ɗingus, si lak ɗiyai nyai, ‘Awinoo! Ma cwai ti kop i deehi mai ru ti haisus. Ka for ya, ɓurti ɓa ka cu kop i sufati ti hai sikan.’

¹⁵ Unai si zan si hwitus ya ta saikyel ti yangi, si forus ya. “Ami mayangi ma wa masti som makoki ani ya?

¹⁶ Ma wa yes u fwarus ya, u fa shini yangi ya.” Myan ima som si hali andi si ni, “DeeƁwe u ngga ani ya ta maleng!”

¹⁷ Unai Yeso ɗingus fo nyus, “Ami findel i kaada i DeeƁwe ani malaki ya? “ ‘Afung tima som i ta' si zan a ɗama i gbya', ayit ti ɓin anggumi shak.’

¹⁸ Shak maɗufal ima fur tasi afung mai, ma wa dyashan, maɗufal ima afungi ti furus hai, ma wa ɓissus ya.”

Tal Ti Cef i Wufen

¹⁹ Som kofiti si anggut hai, hu mbaiyai i kocokak si masi ɓa si ka'us tasi myani, ɓurti si shangi nyai Yeso ma lakti kaani mai tasi sin ɗi. Shak ta andi si mwen ɗufali fo.

²⁰ Unai si kinus shit hai fwet, si tuk som i mufot ima si kof haisus fota a som ima si ti mwawei, ɓurti ɓa si wis aɗeng ima si ka'us ti, si fa ta ra i makunggul ɓa u totus ɓur.

²¹ Som ima si tukus i mufoti si mas Yeso lul si ni, “A makofiti, ni shangi aɗeng ima ha laki hu aɗeng ima hama kofiti mai, a mwawei. Ni shangi ha mati ɓwet ti hai kwa, ha kofti fisel ti DeeƁwe tasi mwawei hai.

²² A kiga' ɓa ka tal cef i wufen wa kyel i Makai mbai, ahun awet ya?”

²³ Yeso ɗing shingat i fyarat ames ya nyus,

²⁴ “Kof huna ti cefi. A mashilim i we hu asum i we mana si hai i cefi ya?” Si nyus, “Ii Makai.”

²⁵ Unai Yeso lakus ni, “Fahun Makai aɗengi ma mii Makai, hu fa DeeƁwe aɗeng ima mii DeeƁwe.”

²⁶ Si pwan ɓa si ka'us ta kyeli, ɓurti aɗeng ima lak ta saa ti ɗufal wi. Findel ima lak lumus fo ya, si te cakat.

Lul Tasi Muluk fit ta Fiyai

²⁷ Shini Sadukiyawai ima si ni na ɗufal si mot si wa muluk fit kwa,

²⁸ si yes si mas Yeso lul si ni, “A makofiti, anggut i Mosis worong ni, na maɗufal mot hon mbor na kaciwa' si al tikul, te a kpak ɓa nusus u katut ɓurti ɓa si wisus fe.

²⁹ Mwashi, ta wur i maɗufal ma fe muryai pyoron, mambaiyi mas kunggo motus kaciwa' si al hu mbori.

³⁰ Mapili kat mbori,

³¹ mataati hwak katut, yis hwak motus kaciwa' si al tikul. Kol ima shak pyoroni ima si kunggot si mwatus kaciwa' si al tikul.

³² Anggwe' asut, mbori hwak ti motut.

³³ Myan ima ɗufal mii si luk fit ta mot wi, ti wa mute ii mbor ti we ta saa ya? Ɓurti shak asussi pyoroni si kunggot.”

³⁴ Yeso nyus, “Som i waya moti si makunggo, sin kunggoi ya.

³⁵ Som ima ɗat ɓa si wis kyel ta saa ti waya ani, ima si muluk fit ta mot ta fiyai wi, si wa kunggo kwa, si wa kunggoi ya kwa.

³⁶ Si wa muhum mot kwa, ɓurti si wa mute fota som lu'. Sin a fe i DeeƁwe, ɓurti ima si luk fit ta mot wi.

³⁷ Na si mangga' mai, Mosis hwak kof nyai ɗufal ima si mwat si wa muluk fit ta mot wi, findel kukwish tima ti cu man, lai Deembai, ‘DeeƁwe i Ibirai, i Aizik, i Jakop hwak.’

³⁸ Ayis a DeeƁwe i som ima siti mupwet, ii ma si mot kwa, ɓurti andi ta kyel ames shak asussi si ti mupwet.”

³⁹ Unai shini som kofiti si ni, “A Makofiti, ha lak a ndere!”

⁴⁰ Nasi mai findeli, si hum wis ti njeng ɓa si lulus lul nin kwa fweng.

Awei Kristi a Al i Devid Ha?

⁴¹ Unai Yeso lakus ni, “Ami kin si ni Kristi a al i Devid ya?

⁴² Yis Devid ti haisus lak ta Kaada i Nakwai ni. “ ‘Deembai lak Deembai amen ni, “Teha amun na ra i ucwa amen,

⁴³ Yes myan ima i wa hatat ti som i ha' ti wei ti ha ii kyel i kinti sisai amma.” ’

⁴⁴ Yeso lakus ni, Devid laiyus ni, ‘Deembai.’ Atini si ni yis a al ames ya?”

Yeso Ti' Ɗufal Ra Tasi Mangga' i Som i Kofti Anggut

⁴⁵ Yeso lak fe i ro ames ta wei i ɗufal shak ni,

⁴⁶ “Mas hun mute ti shingat wa kyel som kofiti si anggut hai. Si ɓwet sok ti mbayai i faginan sin ati ti, si ɓwet ɓa ɗufal si to'us ta kyel i woor, si ɓwet ɓa si wis kikyal i mute maɗesani ta mareha, hu kyel i mute maɗesani ta kikyal i got.

⁴⁷ Si ɓal muk ti arof ima arya ames si motus. Na sin fwal ti DeeƁwe si mas fwali ii masyai, si masi fota sima fwali ti mwawei. A musut mii si wa totsus ɓur manjengi.”