Luka 2 - Findel i DeeƁwe Ti Alis i Ron

Ngga' ima Si Al Yeso Ta

¹ Ta mukonan ani, Makai Agostus, makai mbai i naya fa anggut nyai, ɓa si wa si mbe' ɗufal shak ima si mata kaitat ti Rom.

² Mai, ayis mii ambe' i bya' ima si masi myan ima Kwirinyus yis i makunggul i ta' ti Sirya.

³ Unai shak ɗufal si wa ashwaha ames ɓa si mbe'us.

⁴ Unai Josep hwak lang ta Nazaret ta ta' ti Galili, ɗu ta Betelehem ashwa i Devid ta ta' ti Judya, ɓurti mii ta gung i Devid.

⁵ Wa akul hu Uryam, yamwan ti wom asus ɓa si mbe'us. Myani ti kat ndyong i al.

⁶ Sin ɗiri ta Betelehem, unai myan i al amet ndok.

⁷ Ti al al i mala amet, ti nggi' ta kwaa', ti kin ta kwang wi, ɓurti si dun ahom i muɗorkyel i mwalmwat ta ashwai.

Som i Ɗing ti Ɗam hu Som Lu' i DeeƁwe

⁸ Ta ɓwai i ashwai, som i ɗing ti ɗam shini sin ta, sin kwanan ta ya, sin ɗing ti tutwai ames ta.

⁹ Malu' i DeeƁwe pwakus hai, unai cinjangat i mbaitat i Deembai matkof ta kyeli, myanat ka'us fwet.

¹⁰ Unai malu' i DeeƁwe nyus, “Ka hu mwen kwa! I kolu muro maɗesi, ima ma wa kinti ɗufal shak si jakak fwet.

¹¹ Kwai si alu Mabum ta ashwa i Devid, ayis mii Kristi Deembai.

¹² Mai ma wa kofsu nyai, findel mai a awei, hu wa wisi si nggi' ali ta kwaa', yis raki ta kwang wi.”

¹³ Fo abet som i ɓwol i fit hyang si pwak ya akul hu malu' i DeeƁwe, si tong nakwai nyai,

¹⁴ “Mbaitat wa kyel i DeeƁwe ta fit, mute cala na naya, wa kyel i ɗufal ima maɗesi i DeeƁwe ma akul hu sin.”

¹⁵ Myan ima som lu' i DeeƁwe si honus si humuskyel ta fit, unai som i ɗing ti ɗami si lak ɗiyai nyai, “Ka wa Betelehem ka ɗing aɗeng ima fur amai, ima Deembai lakan ti.”

¹⁶ Unai som ɗing ti ɗami si ka' fisel kaang si wa si wis Uryam hu Josep, si ɗing ali hwak yis ɗarak ta kwang wi.

¹⁷ Myan ima si ɗing ali, si but findel ima si hali ta si ali hai.

¹⁸ Unai shak ɗufal si shok na fo ti hal ti aɗeng ima som i ɗing ti ɗami si lak.

¹⁹ Unai Uryam ti kin ɗamam mii shak ta mulut, yit maas ti ambe' i hai.

²⁰ Som ɗing ti ɗami si humkyel ta ɗing ti ali, sin jakak, sin lak ti adorai i ha' ti asum i DeeƁwe fit. Shak ɗamam ima si hali ta fo i malu' i DeeƁwe, si ɗingi ti shishat ames, si hya ta ngga' ima si lakus ta.

Si Kin Yeso Asum

²¹ Mwen mumyarfu', myan si ru ɓa si masus mukwen, unai si kinus asum ii Yeso ta ngga' ima malu' i DeeƁwe lak ta, kaciwa' ti ti kaf haar ames.

Si Wa Ti Yeso Kofti Palang Wa Kyel DeeƁwe

²² Myan si ru ɓa si sapa haisus ya, ta ngga' ima anggut i Mosis lak ta, unai Josep hu Uryam si wa ti ali ta Yerushalima, ɓa si kof palang wa kyel i Deembai.

²³ Fota ngga' ima mata worong i anggut i Deembai nyai, “Shak al marei i mala, si sapa hus ya, si fa Deembai.”

²⁴ Si fa mal ɓa si lyaf, ta ngga' ima anggut i Deembai lak ta, “mali a gurgutaha i wur apil, na andi kwa, si fa boɓwob apil.”

Simyon Lak Findel i DeeƁwe Si Lyauwi Hai

²⁵ Ai maɗufal nin yis ta Yerushalima, asum ames a Simyon, a maɗufal manderei ima mwen DeeƁwe fo. Ma kintiɓwi ɓa u ɗing mwen ima DeeƁwe ma wa bum ti Isar'ila. Rin Masapai ma akul hu yis.

²⁶ Rin Masapai lakus ni ma wa mot kwa, na ɗing Kristi i Deembai tawe.

²⁷ Rin Masapai ha'us kolus ta Wur i DeeƁwe. Myan ima dees hu nasus si lang ti Yeso ta, ɓa si masus aɗeng ima si mana ti maasani ta ngga' ima anggut i Mosis lak ɓa si masi,

²⁸ unai Simyon mat ali ta ra ames, palang DeeƁwe, nyai,

²⁹ “Deembai, fota ngga' ima ha lak ta, mwashi ɓa yere ama u wa u lafos cala.

³⁰ Shishat amen si ɗing abum ama,

³¹ ima ha fa na shishat i ɗufal shak,

³² kweneng ɓa ha kof haisa wa kyel i ramam, cinjangat wa kyel som ama Isar'ila.”

³³ Dee hu nasus ti ali, si shok na fo nasi ɗamam ima Simyon lak na hai i ali.

³⁴ Unai Simyon kinus maɗesi hai, lak Uryam nasus ti ali nyut, “Al mai ma wa kinti mufur hu muluk fit i ɗufal hyang na Isar'ila, ma wa mute i ɗama ima DeeƁwe kof, ima ɗufal hyang si yus wa ɗanggwya ti.

³⁵ Mai aɗengi ma wa kinti ambe' i mulut ames u kof ya. Mangga' i al mai ma wa han shush ta ti ambas, fota si tor shush tasi mulut ti awal.”

Uhanatu ti Lak Findel i DeeƁwe Si Lyauwi Hai

³⁶ Ai, mushit nin mu asum Uhanatu, al ti Fanuel ta gung i Asha. Ti mute i kunggo i wilial pyoron je,

³⁷ re amet motus. Wilial amet a hure myarfu' tau ɓarasi. Ti hwan Wur i DeeƁwe kwa, yit a mu cwai ti DeeƁwe afut fo' ta reni yit ka'ti fo ya ɓurti fwal ti DeeƁwe.

³⁸ Nasi myan mai, ti lang ta kyel ima si mata, yit ha' ti asum i DeeƁwe fit, yit findel hwak tasi yis ali, wa kyel i ɗufal ima si shwaiti DeeƁwe u fa Yerushalima mute i haisut.

Josep hu Uryam Si Humkyel ta Wur Ames ta Nazaret

³⁹ Myan ima Josep hu Uryam si mbit masti ɗamam shak ima anggut i Deembai lak, si humkyel ta wur ames ta ashwa i Nazaret ta Galili.

⁴⁰ Unai ali ngye yis ti njeng, hya ti piris, hu maɗesi i DeeƁwe ma akul hu yis.

Yeso hu Som i Kofti Anggut i DeeƁwe

⁴¹ Shak wilyali, dees hu nasus si wayan Yerushalima ɓurti Got i Pissihai.

⁴² Myan ima yis ti wil hure mulang apil, si wa kyel i Gotti, ta ngga' ima si mana ti ta.

⁴³ Myan ima si mbit Got i Pissihai, si ka' fisel i wa wur, shak ta andi Yeso katus ya ta Yerushalima, kaciwa' shangi i dees hu nasus.

⁴⁴ Si ni ashang ma akul hu anggum i som ima si fi ati tikul, ango ti mas unai si lang farsus ta saa ti gung ames hu myayus,

⁴⁵ si ɗingus kwa. Ɓurti andi, si humkyel ta Yerushalima ɓa si farus ta.

⁴⁶ Takfai ti mukonan ataat si wisus ta Wur i DeeƁwe, yis amun hu som i kofti anggut i DeeƁwe, yis halsus yis masus lulal hwak.

⁴⁷ Shak som ima si halus si shok na fo, ti musut i shangi ima kof, hu ngga' ima humuskyel ti findelal ta.

⁴⁸ Myan ima hu dees hu nasus si ɗingus, aɗengi lumus fo ya, unai nasus ti nyus, “A al amen, a ɓurti mi ha mas nin mai aɗengi ya? Dya hu yin ni tirim fwet, ni ka' farsa wet.”

⁴⁹ Unai lakus ni, “Hu faarsun ti amiya? Hu shangi nyai ɗat ɓa i te ta wur i Deen kwani?”

⁵⁰ Findel ima lakus, tes hai ti maɓing.

⁵¹ Unai luk fit, kolfai asussi si wa Nazaret akul, yis hal ti findel i dees hu nasus. Unai nasus ti kin ɗamam mii shak ta mulut amet.

⁵² Unai Yeso ngye ya na lo' ta pirisi, yis wis ti matɓwet i DeeƁwe ta i ɗufali hwak.