Luka 19 - Findel i DeeƁwe Ti Alis i Ron

Yeso Lai Zakka

¹ Yeso lang ta Yeriko yis musa ta ashwai.

² Unai mbai nin ta saa ti som i mati cef i wufen, ma asum i Zakka, yisyi a maramwayat.

³ Kin hai maɓweti u ɗing awe mii Yeso ya, a mute ii ngguturi amesi shas ɗing ti Yeso, ɓurti ɗufal si ɓal fwet.

⁴ Unai tital wa ta wei, ɗu tasi musya ti makambong nin, ɓa u ɗing Yeso ɓurti ma wa musa ta fisel andi.

⁵ Myan ima Yeso ru ta kyeli, unai ha' shit fit lakus ni, “A Zakka, ɗorakyel kang! A kpak i wa wur yati kwai.”

⁶ Zakka ɗorkyel kang, shwai Yeso ti pipelat na mulut.

⁷ Myan ima shak ɗufal si ɗingi andi, si lang totti findelal i haar nyai, “Ɗing huni, ɗorkyel ta wur ima masti mafwashi ani!”

⁸ Unai Zakka luk fit, lak Deembai ni, “Halai a Deembai, i wa kaar ti ramwayat amen apil i fa som jyel ɓwai andek. Na ai i muk ɗeng, i wa talsus sa ɓaras.”

⁹ Unai Yeso lakus ni, “Kwai bum yes na wur mai, ɓurti yis hwak a al i Ibirai.

¹⁰ Ɓurti Al i Maɗufal yes ɓa u far u bum som ima si fot.”

Kaani si Cef i Woor

¹¹ Sin saa ti hal ti findelal mai, Yeso cu wei ti laksus findel i kaani, ɓurti mata nggas ti Yerushalima, ɗufal sin kintiɓwi nyai kaitat i DeeƁwe ma wa yes fo abet.

¹² Unai Yeso nyus, “Ai mbai maɗufal nin wa ashwa nin ta maleng ɓa si no'us kaitat, ɗak humkyel.

¹³ Te mulang, lai yarai ames hure, fas cefaf ima ndok roi ture ataat-ataat nyus, ‘Mas hun ro i woor ti cefaf mii, yes myan ima i humkyel.’

¹⁴ Ɗufal i mashwa amesi si nggwetus, si ro som shini ti muro takfai tima wis, nyai, ‘Ni ɓwet ɓa mai maɗufal u te ii makai aminin kwa.’

¹⁵ “Shak ta andi, si no'us kaitati, humkyel ta wur. Unai kin si laiyus shak yarai ames ima ai fas cefaf ɓa u lulus fo, ɓa u shang aɗeng ima si wisi ta si cefaf ima fasi.

¹⁶ I bya' yes ni, ‘A Dee, i wis mawet hure tasi pam andek ima ha fan.’

¹⁷ Unai maɓwai amesi nyus, ‘Awindee, yere amen manderei! Ngga' ima ha mas mwawei ta si ɗama mandyongi hai, i fa mbaitat i ashwaha hure.’

¹⁸ Yere mapili yes ni, ‘A Dee, i wis mawet hara ta si pam andek ima ha fan.’

¹⁹ Maɓwai amesi nyus, ‘I fa mbaitat i ashwaha hara.’

²⁰ “Nin yerei yes ni, ‘A Dee, mata pam andek ama. I no' ya na ɗam wi i foti.

²¹ Ɓurti i myanat sa fo, ɓurti mute sa ti ti shum, I shangi ha matani, ta kyel ima wa' ha kin ta, ha karatani, ta kyel ima wa' ha lai ta.’

²² Unai maɓwai amesi nyus, ‘I wa totsa, ɓur ti findel ima lang ya na fo ama. Ha ya ii yere mafwashi! Ha shangi nyai ima ti shum i shangi, maɓwet ti mal fwet, i karat aɗeng ima wa' i lai.

²³ Na ha shangi andi, ami sha ha ɓa ha wa, ha kinun cef amen ta wur i cef, ɓurti myan ima i humkyel, i wis al mashu ham nin i hai kwa ya?’

²⁴ “Unai lak som ima si mangrai ta kyeli nyus, ‘Mat hun cefi ya ta ra ames, hu fa ima wis hure ani i hai.’

²⁵ “Unai si nyus, ‘A dee, yisyi mati hure kuɓa!’

²⁶ “Maɓwaiyi nyus, ‘I ma laksu, shak maɗufal ima mati ɗama, si wa fa sus hyang i hai. Maɗufali ma mati kwa, al i maɗeng ima matii si wa mati ya.

²⁷ Som ima si nggwetun mii, ima si ɓwet ɓa i te ii makai ames kwa, yehuntus nati hu fwaar ya na wei yunti.’ ”

Yeso Lang ta Yerushalima

²⁸ Takfai tima Yeso lak kaani moti, cu wei ti kinti hai wa Yerushalima.

²⁹ Myan ima ru ta nggas ti Betafaji hu Betani ima si ta wei ti fwere ima si lai ii Anggash i Yitat i Mbar, ro fe i ro ames apil nyus,

³⁰ “Ɓu ta hweng muwei andi, na hu ru ta, hu wa ɗing ti al i njaki nin ima wa' si langi mano' ta foi fisel. Hwet hun ya hu yes ti nati.

³¹ Na ɗeng lul ni, ‘Ami kin hu hwet ti njakii ya?’ Hu nyus, ‘Deembai ma ɓweti.’ ”

³² Fe i roi si wa si wis njakii ta ngga' ima Yeso lakus ta.

³³ Sin saa ti hweti ti al ti njakii ndai, unai som i njakii si lulus nyai “Ami kin hu hweti ali njaki ya?”

³⁴ Si nyus, “A Deembai ma ɓweti.”

³⁵ Si kol Yeso al ti njakii, si mbwet faginan ames si gwa' tasi al ti njakii hai, ɓa Yeso u langi.

³⁶ Yis saa ti ati, unai ɗufal si cu wei ti wash ti faginan ames ta fisel.

³⁷ Myan ima ru ta kyel ima fisel ti ɗor ta Fwere i Yit i Mbari, unai shak suɓut i som koltifai ames, si lang jakak, fati DeeƁwe mbaitat ti njeng ɓurti shak ɗamam i shok na fo ima si ɗingi.

³⁸ Sin nyai, “Disyo' ma akul hu makai ima yes ta saa ti asum i Deembai!” “Mute cala ta fit, mbaitat wa kyel i DeeƁwe.”

³⁹ Unai shini Farisiyawa ima si ta saa ti ɗufal wi si lak Yeso si ni, “A Makofiti, laka fe i ro ama ɓin!”

⁴⁰ Unai matussi ni, “I laksu, na mii si te cakat, afyai mii si wa jolok i jakak.”

Yeso Kawa Ta Si hai i Yerushalima

⁴¹ Myan ima ru ta nggas ti Yerushalima, ɗingi kawa ɓursut,

⁴² unai ni, “Naɗin hu shang aɗeng ima kwai ma wa kolsu cala, u mai mwashi si fotuti fo.

⁴³ Myan si yes ima som ima si ha' ti wei ti hun, si wa ta' ti kyel i muɗu tasi bang amu, som ɓwol si wa nggarsu ya ta ɓwayai shak ti ɓwol.

⁴⁴ Si wa dyashan ti hihai amu ya na fisha, hun hu femu na wii bang amu. Si wa honti afung nin si nusus hai kwa, ɓurti hu shang mwen ima DeeƁwe ma wa yes u bumu kwa.”

Yeso Sapa Wur i DeeƁwe Ya

⁴⁵ Unai Yeso lang ta wii Wur i DeeƁwe fur nggati som woor ya.

⁴⁶ Nyus, “Si worong nyai, ‘Si wa lai ti wur amen ii wur i fwal ti DeeƁwe’ hun hu hat ti ii ‘ton i asher.’”

⁴⁷ Shak mukonani, yis kofiti ta Wur i DeeƁwe. Unai mbayai i kocokak, hu som kofiti si anggut hai hu mbayai i mashwa si far fisel ɓa si forus ya.

⁴⁸ Shak ta andi, si wisi kwa, ɓurti suɓut i ɗufali si ɓweti halti findel ames fwet.