Luka 18 - Findel i DeeƁwe Ti Alis i Ron

Mbor Tima ti Fwal Kaciwa' Kat Ya

¹ Unai Yeso lak fe i ro ames findel i kaani nin, ɓurti ɓa u kofus nyai, ɗat si cu wei ti fwal ti DeeƁwe ngang, kan si ngjwangat kwa.

² Ni, “Ai ta ashwa nin, sin tima tot ti ɓur nin, ima mwen DeeƁwe fo kwa, zan ɗufal a ɗama kwa fweng.

³ Mbor nin tima remet motus yit ta ashwai, tima ti wo wa kyel i ma tot ti ɓuri, ti fwal nyai, ‘Kabuk, ha tottun ɓur i mwawei, ɓurti som i wei ti yin mii.’

⁴ Ha' myan yis yus ɗanggwya. Unai ta takfai yes mbe' wet, lak ɗyus ni, ‘A awei i mwen DeeƁwe fo kwa, i zan ɗufal a ɗama kwa fweng,

⁵ shak ta andi, ɓurti mbor moti ti cu wei ti ɓyolok sun fo ngang, ti honun i wo ham kwa, i wa fyal sut filya ya. Ka ti cu wei ti ɓyolok na ti shan lafos!’ ”

⁶ Unai Deembai ni, “Hal hun aɗeng ima ma tot ti ɓur i fyarat mai lak!

⁷ Unai fwet, DeeƁwe ma wa tot ti ɓur i mwawei si som ames ima benus, ima si kolti kawa ta kyel ames fo' ta reni kwa haa? Ma wa ka'ti nggasus ya haa?

⁸ I laksu, ma wa fyalsus filya ya ti tital ma. Shak ta andi, myan ima Al i Maɗufal humkyel, ma wa wis ti fati mwawei na naya haa?”

Kaani si Mafarisi hu Ma Mat ti Cef i Wufen

⁹ Yeso lak findel i kaani mai wa kyel i ɗufal ima si zan hihai asus nyai sin a munderei, si kom anggum i ɗufali ya. Nyai,

¹⁰ “Ai ɗufal shini apil si rang ta Wur i DeeƁwe ɓa si fwal, andek a Mafarisi, mandeki a ma mati cef i wufen.

¹¹ “Unai Mafarisi luk fit te mangra, fur fwal ti DeeƁwe tasi haisus hai, nyai, ‘A DeeƁwe, i palanga ɓurti yin ima fota anggum i ɗufali kwa. Fota asher, hu som mafwashi, hu som i arak i zuruk. I palanga ɓurti yin ima fota ma mati cef i wufen mai kwa.

¹² I ka'an ti fo ya nasi cwa sa apil saa ti ya, i fayan ti andek ta saa ti hure i shak ɗamam ima i wyasani.’

¹³ “Shak ta andi, ma mati cef i wufen tes mangra ta maleng, nggwes i ha' ti hai fit. Ɓurti kikyawat na mulut, ka' ajin ames yis nyai, ‘A DeeƁwe i ma fwalsa, ɗinga shum asuni, yin a ma masti mafwashi!’ ”

¹⁴ Yeso nyus, “I laksu, ma mati cef i wufen mai, a Mafarisi ani kwa, wis mute manderei ta kyel i DeeƁwe, ɗak humkyel ta wur. Maɗufal ima ha' haisus fit, si wa muɗortus kyel, maɗufal ima ɗor ti haisus ya, si wa ha'sus fit.”

Yeso Kin Fe Muyayi Maɗesi

¹⁵ Ɗufal sin yes ti fe muyayi ames ɓa Yeso u kinus ra hai. Unai fe i ro ames si ɗingi andi, si fur lak ti ɗufali ɓin.

¹⁶ Unai Yeso lai fei ɓa si yes ta kyel ames ni, “Hon hun fe muyayi ɓa si yes na kyel amen. Ka hu shaas kwa. Ɓurti kaitat i DeeƁwe ii musuti ames.

¹⁷ I laksu mwawei, shak maɗufal ima wa' mat kaitat i DeeƁwe fota al al kwa, ma wa mulang ta kwa fweng.”

Mbai Maramwayat

¹⁸ Unai mbai i Ju nin lul ta Yeso ni, “A Makofiti manderei, ami te a kpak ɓa i masi i wis mupwet i myan hu myan ya?”

¹⁹ Yeso lulus ni, “Ami kin ha laisun ii manderei ya? Ɗeng a manderei kwa, a DeeƁwe je.

²⁰ Ha shang aɗeng ima anggut i Mosis lak, ‘Ka ha mas arak i zuruk kwa, ka ha for maɗufal kwa, ka ha shir shir kwa, ka ha vo fai i fyarat kwa, Faha dya hu nasa ngye.’ ”

²¹ Maɗufali lak ni, “Shak ɗamam mii i cu wei ti masus ta si myan ima yin ɗiri i ali.”

²² Myan ima Yeso hal mai, lakus ni “Mwashi a ɗama andek je kat. Juwila shak ɗamam ima hati ya, ha kaar som jyeli ya, ha wa wis ti sufat ta fit. Ɗak ha yes, ha kolfai asuni.”

²³ Myan ima hal mai findeli, rafat mulut ya, ɓurti ramwayat fwet.

²⁴ Yeso ti ɗing ti maramwayati ni, “Ma wa mute ti shum som ima si ti ramwayat si wis mulang ta kaitat i DeeƁwe!

²⁵ Ti mwawei, ma wa ɓin ti mbwesh ɓa rukumi ti lang ta swai i twen, hu ima ɓa maramwayat u lang ta kaitat i DeeƁwe.”

²⁶ Som ima si hal mai si lul lul si ni, “Na andi, awe ma wa wis ti bum ya?”

²⁷ Unai Yeso nyus, “Ta kyel i maɗufal ma wa mas kwa, ma wa mas ta kyel i DeeƁwe.”

²⁸ Unai Pita ni, “Ni hon shak aɗeng ima ni mati, ni koltifai asai.”

²⁹ Yeso matussi ni, “I laksu mwawei, shak maɗufal ima hon wur, hon mborsus, hon shunus, hon dee hu naa, hu fe, ɓurti kaitat i DeeƁwe,

³⁰ ma wa wis ti ɗamam hyang na naya ti kwai moti, hu waya tima ti yes, ma wa wis ti mupwet i myan hu myan.”

Yeso Hum Lak ti Findel i Mot Ames

³¹ Unai Yeso haar fe i ro ames hure mulang apili si wa ta ɓwaiyi, nyus, “U mai ka muɗu wa Yerushalima moti. Shak ɗamam ima som shit si worong nasi yin, Al i Maɗufal hai, si wa hya.

³² Si wa fasun ta ra i ramam ya. Si wa gbafsun ya, si sya'un, si tufun lyau hai, si saraamun, ɗak si forun ya.

³³ Mwen mataat i wa mulukfit ta fiyai.”

³⁴ Fe roi, si shang ɗama nasi hai i findel ima Yeso ma laki mai kwa. Aɗengi fotus fo, si ka' aɗeng ima malaki kwa fweng.

Manzyau ma Fwal Wis Ɗing ti Kyel

³⁵ Myan ima Yeso ru ta nggas ti Yeriko, manzyau nin yis amun ta foi fisel, yis fwal ti fwal ta.

³⁶ Myan ima manzyauwi hali ɗufal hyang sin musa ta fiseli, unai lul ni, “Ami ma wa na fisel mai kwai ya?”

³⁷ Si nyus, “A Yeso i Nazaret ma musana.”

³⁸ Unai lai lai ti a ambas ni, “Yeso! Al i Devid, ɗinga shum asuni!”

³⁹ Ɗufal ima sin ta wei si lakus ɓin ɓa u te cakat. Fota si dala a yafi taanja ti la mbai fwet, yis nyai, “Al i Devid, ɗinga shum asuni!”

⁴⁰ Yeso kat mangra, ni ɓa si yestus ta kyel ames. Myan ima yesta nggas yusti, Yeso lulus,

⁴¹ “Ami ha ɓweti ɓa i masai ya?” Unai manzyauwi lak ni, “A Deembai, i ma ɓweti ɓa i ɗing kyel.”

⁴² Unai Yeso nyus, “Mat ta ɗing ti kyel, fati mulut ama kina ha wis cala.”

⁴³ Fo abet wis ɗing ti kyel, kolfai ti Yeso, yis ha' ti asum i DeeƁwe fit. Myan ima ɗufal si ɗingi, sin hwak shak si fa DeeƁwe mbaitat.