Luka 15 - Findel i DeeƁwe Ti Alis i Ron

Kaani si Tutwi Tima ti Fot

¹ Mwen nin ndai, som i mati cef i wufen hu “som mufwashani” si yes ɓa si hal aɗeng ima Yeso ma laki.

² Unai Farisiyawa hu som i kofti anggut si rumung nyai, “Maɗufal mai zan haisus i mwes i som mufwashani sin cwai ti cwa akul.”

³ Unai Yeso lakus kaani mai,

⁴ “Na ɗeng amu yis ti tutwai ndik andek, ɗak nin andek ti fotut ta saa. Ma wa honti hure karfu' tau karfu'i, u wa far ti tima ti foti yes myan ima wis sut hoo?

⁵ Na wisut, ma wa jakak u ha' ta si jakala,

⁶ u wa ti wur. Ɗak lai myayus hu som i mute akul u nyus, ‘Yehun hu von masti jakak, ɓurti i wis tutwi tima ti fot.’

⁷ I laksu, si wa jakak ta fit tasi maɗufal andek ma mafwashi ima fwal shwaiya, ɓin som muɗesi hure karfu' ta karfu'i ima si far shwaiya kwa.

Kaani Si Cef ima Fot

⁸ “Ahun na mbor nin yit ti cef i ugbwirik mupeli hure, ɗak andek fot ta saa, ti wa hol ti man ti fyal wuri ya ti far yes myan ima ti wisi kwa haa?

⁹ Na ti wisi, ti wa lai ti myayut i mute akul ti nyus, ‘Yehun hu von masti jakak, ɓurti i wis cef amen ima fot.’

¹⁰ I laksu ma wa mute ii ɗama i jakak i som lu' i DeeƁwe myan ima ma mafwashi andek hatat.”

Kaani Si Al ima Fot

¹¹ Yeso cu wei ti findel ni, “Ai maɗufal nin yis ti fe apil muryai.

¹² Al mavaati lak dees ni, ‘A dee, i ɓweti ɓa ha fan kop amen na saa ti sufat ama.’ Unai dee hi kar fe ames sufati ya.

¹³ “Takfai ti mukonan vaat, al mavaati suɓut ɗam ames shak lang wis ashwa nin ta maleng. Ta kyeli, for sufat amesi ya si roi gbya' akul hu fe i se.

¹⁴ Takfai tima for sifati ya shak, unai hwem manjengi ndak ta ashwai shak, unai lang jyel.

¹⁵ Unai wa far ro ta kyel i maɗufal nin ta ashwai, yis maɗufali tukus ta kyel ima nggish ames si ta, ɓa u fayus cwa.

¹⁶ Far ɓa u cu cwa i nggishi ta wet, ɗeng fas kwa fweng.

¹⁷ “Ɗak ambe' ames humkyel ta lo' ndere, unai ni, ‘Wa', som i ro i deen ta wur sima gwishil ti cwa, ɗak ima wa mot ti hwem nati!

¹⁸ I wa honti kyel mai i wa kyel i deen i nyus, A dee, i mas DeeƁwe mafwashi, i masai hwak.

¹⁹ I ndok ɓa si hum laisun ii al ama kwa. Kina na ɓa i te fota andek na saa ti som i ro ama.’

²⁰ Unai lang ka' fisel wa kyel i dees. “Myan ima yis ɗiri ta maleng dees ɗingus, ɗing shum ames, unai lang ti tital wa vupus ti jakak.

²¹ “Unai ali nyus, ‘A dee, i mas DeeƁwe mafwashi i masai hwak. I ndok ɓa si hum laisun ii al ama kwa.’

²² “Unai dees lai yarai ames ni, ‘Yehun kang ti fagin muɗesi hu ru'us si, hu kinus shitam ti foti ra, hu ru'us kpakasak.

²³ Ka' hun randong maɗesi malo' ani hu lef, ka ɗi got ka jakak.

²⁴ Ɓurti al amen mai ai motus, u mai pwet, ai fotus, u mai humkyel.’ Unai si fur ɗiti gotti.

²⁵ “Si myani, al mambai ames yis ta yang. Humkyel ru ta nggas ti wur, unai hali sin cut ti agwir ta lang ti adori.

²⁶ Unai lai andek ta saa ti yaraiyi, lulus ami ma wa na wuri ya.

²⁷ Yerei matussi ni, ‘A nusa mavaati humkyel, unai dya kin si lef randong maɗesi malo' ani, ɓurti nusa humkyel na wur cala ɗyokokok.’

²⁸ “Unai al mambaiyi mas futut fwet nggwes i mulang ta wuri. Unai dees lang ya, fwalus ɓa u ka agung u lang ta wuri.

²⁹ Unai lak dees ni, ‘Ɗingai, shak wilyal ima yin masa ro fota yere, kaciwa' i nggwen ti ro nin ima ha kinun masi. Shak ta andi ha fan foti shiken nin ɓa i lef i ɗiti got hu myayun kwa.

³⁰ Shak ta andi, myan ima al ama mai humkyel, yis ima wa cu sufat ama ya ta kyel i afwar hu arof fe i se, ha lefus randong maɗesi malo' ani!’

³¹ “Unai dees nyus, ‘A al amen, ha ma akul hu yin ngang, shak aɗeng ima i mati, ama.

³² Ɗat ka jakak, ɓurti nusa mai ai motus mwashi pwet, ai fotus mwashi humkyel.’ ”