Luka 11 - Findel i DeeƁwe Ti Alis i Ron

Yeso Kofti Ngga' i Fwal ti DeeƁwe

¹ Mwen nin ndai, Yeso yis fwal ti DeeƁwe ta kyel nin. Ti kat ya ames, andek ta saa ti fe i ro ames nyus, “A Deembai, kofa nin ti ngga' ima ni fwal DeeƁwe ta, fota ngga' ima Jwon Mabatisma kofti fe i ro ames ta.”

² Yeso nyus, “Na hun fwal ti DeeƁwe hu ni, “ ‘Deeminin, asum asa ti te ti sapa, kaitat ama u yes.

³ Faha nin cwa i mufi aminin ngang.

⁴ Shwa nin mafwashi aminin ya, fota ngga' ima ni shwayan ti shak ima si mas nin mafwashi ya. Kan ha hon nin ni ndak ta ra i mamba kwa.’ ”

⁵ Unai kaanus findel nin nyai, “Si ni na ɗeng amu yis ti mwes nin, ɗak wis fai sai fo' ti fwal nyai, kabuk a mwen hofa na folok ataat,

⁶ ɓurti mwen nin mai yes ɓwai men, ta kyel i ma'at, i yun kaciwa' cwa ima ɓa i fas.

⁷ Ɗak si ni, myai u findel ta ɗom i marak nyai, ‘Ka ha burukun kwa, ɓurti tii vo fo i mahom amen ya, ni nin akul hu fe amen na kyel i marak. I wa mukon ɓushwat fasa ɗama kwa.’

⁸ I ma laksu, na ni ma wa muluk fit u fas foloki ɓurti myatat kwa, shak ta andi ma wa ɓushwat u fas shak aɗeng ima ma ɓweti ɓurti mwesi cu wei ti fwali kaciwa' shusho.

⁹ “I ma laksu ndai, fwal hun si wa fasu, far hun hu wa wisi, kunggwak hun si wa ɓwai sui ya.

¹⁰ Shak maɗufal ima fwal si wa fasus, shak maɗufal ima far ma wa wisi, shak maɗufal ima kunggwak si wa ɓwaisussi ya hwak.

¹¹ “Awe amu, na al ames lul folok u fas afung ya? Ahun na lulus gushe u fas ɗamafwashi ya?

¹² Ahun na lulus ho' hu fas mategereng ya?

¹³ Hun ɗufal ima hu yu ii mufwashi hu shang fati fe amu ɗam muɗesi. Atini Deemu i kyel ta fit ma wa fati som ima si lulus Rin Masapai kwa ya?”

Yeso Hu Ba'alzabul

¹⁴ Yeso ngga rin mandu' mafwashi ya ta lo' i maɗufal nin. Myan ima rin mafwashi hon maɗufali, unai maɗufali lang findel. Aɗengi fa ɗufal shok na fo.

¹⁵ Shak ta andi, shini ɗufali si ni, “Ma nggati rin mafwashi mii ti a andok i Ba'alzabul, makai i rin mufwashi.”

¹⁶ Shini, si ɓweti ɓa si mba hus ti lul nyai, ɓa u kofus ɗama i shok na fo nin ta fit.

¹⁷ Ɓurti Yeso shang ambe' ima si ti ta mulut, unai nyus, “Na kaitat matkar u zan wei ti ɗyus, kaitat andi ti wa yashna kwa. Andi hwak na wur ti matkar ti zan ti wei ti ɗyut hwak ti wa mufur.

¹⁸ Na Shatan kar ɗyus apil, atini kaitat ames u te mangra ya? I lakti mai findeli ɓurti hu ni i nggati rin mafwashi ya ti a mbaitat i Ba'alzabul.

¹⁹ Na i nggati rin mafwashi ya ti a mbaitat i Ba'alzabul, fe amu si nggai ya ti anggi rini ya? Ɓurti andi, a si mai si wa totsu ɓur.

²⁰ Na i nggati rin mafwashi ya ti a Rin i DeeƁwe, kof ndai kaitat i DeeƁwe ru na saa yuti.

²¹ “Na maɗufal manjengi yis ti ɗam i ɓin i fwang ti wur ames, ɗam i wur ames ma wa mute cala.

²² Na ɗeng ima ɓinus njeng, rus hai ti ɓin ɗak ɓin njeng ames, unai u ka'us ti shak ɗamam amessi, u haar u kaar som amesi ya shak.

²³ “Shak maɗufal ima ma akul hu yin kwa ma a nadon ti yin, maɗufal ima suɓutuni kwa, a ma ɓasanti ya.”

²⁴ Yeso cu wei ti laki nyai, “Na rin mafwashi lang ya ta maɗufal wi, ma wa ati ta kikyal mushoki yis far ti kyel i lafos. Na wisi kwa, unai u ni, ‘I wa muhumkyel ta wur ima i lang ya ta.’

²⁵ Na humkyel u wisi ma si fyal wuri si ɗak ti ya,

²⁶ ma wa muhumkyel u wa u lai shini rin mufwashi pyoron ima si ɓinus yis wuwish, si yes si rang ta lo' i maɗufali, si kin ii wur ames. Ta dala maɗufal ani ma wa rafat u ɓin ngga' ima ai yis ta tasi bya'.”

Maɗufal ima Si Kinus Maɗesi

²⁷ Yeso yis ɗiri lak ti mai findeli, mbor nin ta saa ti ɗufali ti findel ti ambas ti ni, “Disyo' mata si mbor tima ti ala, ti no'a ta mas amet ha ngye.”

²⁸ Yeso mati ni, “Andi kwa, disyo' ɓin mute tasi ɗufal ima si hal findel i DeeƁwe, si hyai ta.”

Ɓweti Ɗing ti Ɗama i Shok Na Fo

²⁹ Myan ima ɗufal si cu wei ti suɓut ta kyel ames, unai Yeso nyus, “Waya moti a mufwashi fwet. Si far ti a ɗama i shok na fo, si wa kofsut ti ɗama kwa, a ɗama i shok na fo i Jona je si wa kofsut ti.

³⁰ Fota aɗeng ima ai wis Jona te i ɗama i kofi ta Nineva, angga'i nai Al i Maɗufal ma wa mute ii ɗama i kofi na waya moti.

³¹ Mwen ti tot ti ɓur, mukai ti Sheba ti wa nyai hun som i myan mii hu masi ndere kwa, ti yes ta kyel ma maleng fwet ɓa ti hal findel i shangi i Solomon. Ɗeng mai nati ima ɓin Solomon, ɗak hun, hu nggyu i halsus.

³² Som i Nineva si wa muluk fit mwen i tot ti ɓur si ni, hun ɗufal i myan mii hu ti mwawei kwa, ɓurti si fwal shwaiya myan ima Jona lakus findel i DeeƁwe. Mwashi maɗufal ima ɓin Jona ta mai.

Kweneng i Lo'

³³ “Ɗeng lwa' man ɗak tos u vo ya ti kwang kwa, ma wa kini tasi kwetleng, ɓurti ɓa ɗufal si ɗing kwenengi.

³⁴ Shishat ama a kweneng i lo'. Na shishat ama sin ndere, lo' ama shak mati kweneng, na shishat ama sin ndere kwa, shak lo' ama mayus wa mute ta maɓing wi.

³⁵ Ɓurti andi, tehun ndere ashang kan kweneng ima hu mati mayus ii maɓing.

³⁶ Na lo' ama shak yisti kweneng kaciwa' nin ɓwaiyi yis ti maɓing, unai u cinjangya shak fota ngga' ima man ti mukof ti kwaf kweneng ta.”

Mwe taan

³⁷ Myan ima Yeso mbit findeli, Mafarisi nin lai Yeso ta wur ames ɓa si cu cwa. Unai wa te amun ɓurti cwai ti cwai.

³⁸ Farisiyawa si ɗing Yeso wop cwai ti cwa kaciwa' sati ra ya fota ngga ima som ames si maasi ta, unai aɗengi fas shok na fo.

³⁹ Unai Deembai nyus, “Hun Farisiyawa hu sahan ti fai i cunjoha hu ɓyalang amu ya, ɗak wii amu hyas ti anggut i ɓwet ti hai hu mafwashi.

⁴⁰ A halyang i ɗufal! Hu shangi nyai a DeeƁwe mas takfaiyi ta wiiyi shak kwani?

⁴¹ Naɗin hun wa fati som i jyel ɗamam ima hu ti, naɗin ɗamam amu shak u te ti sapai.

⁴² “Mwe sui, hun Farisiyawa! Hu fai DeeƁwe andek ta saa ti hure i ɗamam muyayi ima si shwayani ta cwa fota shukon. Shak ta andi, hu nggyu i masti mwawei hu matɓwet i DeeƁwe. Mas hun mbaiyai i ɗamam mii kaciwa' honti muyaiyi hwak.

⁴³ “Mwe sui, hun Farisiyawa! Hu ɓal ɓweti si fu kikyal i mute i mbaitat ta mare i Ju, sin too' su ti fati mbaitat ta shak kikyal ima ɗufal si ta.

⁴⁴ ‘Mwe sui! Hu yu fota fiyai ima si yus tandalang ima ɗufal si at i hai kaciwa' shangi.’ ”

⁴⁵ Unai andek ta saa ti som kofiti si anggut hai lak Yeso nyai, “A makofiti, na ha lak mai findeli, ha se' nin hwak.”

⁴⁶ Yeso matussi ni, “Mwe sui, hun som kofiti si anggut hai! Hu kin ɗufal zan ti kol manggahi, ima mati shum i ha'i, hun haisu hu nggyu kinti foti ra ɓa hu bumus.

⁴⁷ Mwe sui, hu ta' fiyai i som i shit ima ai kaya amu si fwaar.

⁴⁸ Kof ndai hu ɓwet aɗeng ima kaya amu si masi, si fwaar som i shit, hun hu ta' fiyaiyi.

⁴⁹ Ayis nai piris i DeeƁwe ni, ‘I wa ro su ti som i shit hu fe muro. Si wa for ti shini, si fa shini shum.’

⁵⁰ Ɓurti andi, si wa kofti som i waya ti kwai ya ɓurti som i shit ima si fwar ta si ɓele,

⁵¹ tasi wash Ebel yes wash Zakarya, ima si fwar ta saa ti hutum hu kyel i kuna. Andi, i ma laksu, hun ɗufal i waya ti kwai, si wa lul ti wash ames ta kyel amu.

⁵² ‘Mwe asui, hun som kofiti si anggut hai! Hu ndash kwap i shangi ya, hu nggyu i mulang ta, hu sha shini mulang ta hwak.’ ”

⁵³ Myan ima Yeso hon kyeli, som kofiti si anggut hai hu Farisiyawa si fur buruksus, sin farsus ti fo hu lulal tasi ɗamam hai hyang,

⁵⁴ si kinɓwi ashang u lel findel nin ya ɓa si wisi si ka'us.