Luka 10 - Findel i DeeƁwe Ti Alis i Ron

Yeso Ro Som Hure Pyoron ta Apili

¹ Takfai ti andi, Deembai ben shini som hure pyoron ta apili, kar tus ɗufal apil-apil, si tong ta wei wa ta ashwaha hu kikyal ima yis haisus ma ɓweti wa ta.

² Unai lakus ni, “Karati ma hyang, ɗak som i roi si toos. Ɓurti andi fwal hun mayangi ɓa u tuk som i ro si masus karati.

³ Hun wa! I ro hu fota fe i tutwai ta saa ti ambal.

⁴ Ka hu ha' mala, hu rukul, hu kpakasak kwa, ka hu to' ɗeng ta fisel kwa.

⁵ “Shak wur ima hu lang ta hu tong nyai, ‘Cala ti matwis na wur mai!’

⁶ Na maɗufal ma ɓwet ti cala yis ta wuri, cala tima hu yesti ti wisus, na awet unai ti humu hai ɗamamu.

⁷ Tehun ta wur ani, hu cu, hu wo shak aɗeng ima si fu, ɓurti te a kanggang si tal maro shum i ro ames.

⁸ “Shak ashwa tima hu lang ta, na si matu, cuhun shak aɗeng ima si fu.

⁹ Hu fa ɗufal cala ta ashwai, hu nyus, ‘Kaitat i DeeƁwe yes na nggas ti hun.’

¹⁰ Shak ashwa tima hu lang ta ɗak si nggwetu, hu lang ya ta saa ti fisel i mashwai hun nyai,

¹¹ ‘Ɓura i mashwa amu ima ni haar na sisai hwak ni tabwatui ya. Shang huni nyai kaitat i DeeƁwe yes na nggas ti hun!’

¹² I laksu, mwen ima Yeso ma wa yes, ma wa mute ti mbwesh si Sodom hu musut i mashwa ani.

¹³ “Mwe ashushi, Korazin! Mwe ashushi, Betsaida! Naɗin ɗamam i shok na fo ima si masus na yuti, a sin si masus ta Taya hu Saidon, naɗin ti si hatat ti ɓele, si te amunan ti arom i shaat hu afut ta hihai.

¹⁴ Mwen i tot ti ɓur, DeeƁwe ma wa ɓin ti ɗing ti shum i Taya hu Saidon ta si hun hai.

¹⁵ “Hu shish Kapanahum, shi ɗingi nyai si wa ha' shush fit ani? Wayou! Si wa tuk shush muɗor wa man.

¹⁶ “Shak maɗufal ima halu, ayin halun. Shak maɗufal ima nggwetu, nggwetun ayin. Maɗufal ima nggwetun yin, nggwes ti ayis ima roon.”

Muhumkyel i Som Hure Pyoron ta Apili

¹⁷ Myan ima som hure pyoron ta apili si humkyel ti jakak, si nyus, “A Deembai, rin mafwashani hwak si mwen nin fo ɓurti asum ama.”

¹⁸ Unai Yeso matussi ni, “I ɗing Shatan ndak ta fit fota nzilwit i bara.

¹⁹ I fa hu andok i ati si ɗamafwashi hu mategereng, ɓa hu ɓin njeng i shak mbaitat i Shatan, kaciwa' ɗama wisu.

²⁰ Shak ta andi, ka hu jakak nyai rin mafwashi si mwenu fo kwa, jakak hun ɓurti si worong asumam amu ta fit.”

Yeso Pipel Na Mulut

²¹ Tasi myani, Yeso hya ti pipelat na mulut ta wii i Rin Masapai ni, “I palanga, a Dee, Deembai i fit hu naya, ɓurti ha fot ti ɗamam mii ta kyel i som shingat hu shangi, ha kofti fe muyayi. Andi a Dee, a aɗeng ima ɗata nai.”

²² “Deen fan ɗamam shak na ra amen. A Deehi je shang Ali, ayis Ali hwak je shang Dee hi, sin hu som ima Ali ben ɓa u kofti Dee hi.”

²³ Unai hatat ta kyel i fe i ro ames lakus ahwesi cakat ni, “Hu wis maɗesi hun ima hu ɗing ɗamam mii ti shishat amu.

²⁴ I ma laksu, som i shit hu som i kaitat hyang, si ɓyat naɗin si ɗing aɗeng ima hu ɗingi mai, si wis ɗingi kwa. Si ɓyat ɓa si hal aɗeng ima hu hali mai, si wis hali kwa.”

Kaani si Maɗufal Manderei i Samarya

²⁵ Manderet nin luk fit ti lul ɓa u mba Yeso. Lulus ni, “A Makofiti, i wa masi atini i wis mupwet i myan hu myan ya?”

²⁶ Unai Yeso matussi ni, “Ami worong i anggut i Mosis lak ya? Ha mbe' ti mai atini ya?”

²⁷ Maɗufali ni, “ ‘Ɓweta Deembai DeeƁwe ama ti mulut asa shak, ti mupwet ama shak, ti njeng ama shak, hu ambe' ama shak’ Hu, ‘ɓweta som ima hu ɗiyai nggas fota haisa.’”

²⁸ Yeso lakus ni, “Angga'i nai, ha lak a kiga'. Masai andi, ha wa mupwet.”

²⁹ Maɗufali, yis ɓweti ɓa u kof nyai yis a maɗufal manderei, lul ta Yeso ni, “Ayis awe a maɗufal ima ma nggas ti yin ya?”

³⁰ Yeso matussi ni, “Ai maɗufal nin lang ta Yerushalima yis muɗor wa Yeriko. Unai ndak ta rai asher, si ka'us ti ɗam ames, si ndashus fwet, si honus ta fo i mot.

³¹ Makocok nin sa ta fiseli, ti ɗing ti maɗufal ima si ndashi, sas ta ɓwai, wis.

³² Andi hwak, maɗufal nin ta gung i Livai ima si ro ta Wur i DeeƁwe, yes ta kyeli ɗingus yis umushnggang, yis hwak sas ta ɓwai, wis.

³³ Unai maɗufal nin i Samarya, yis wa ɗa'at, ru ta kyel ima maɗufali mata, ti ɗingsus, ɗing shum asussi.

³⁴ Wa kyel ames, sas afolali ya ti mbar hu ham i manggɓu', ɗak nwa'usi ya, ha'us kin ta si njaki asus, watus ta wur i mwalmwat nin, te ta, yis ɗingsus fo.

³⁵ Mwen ti ɓu, unai ha' cef i ro i mukonan apil fa mawuri nyus, ‘Bumana maɗufal mai, na i humkyel, i wa talsa aɗeng ima ha foor tasi hai i aɗeng ima i fa.’ ”

³⁶ Ta dala, Yeso lul ta mandereti ni, “Na saa ti ɗufal ataat mii, ha ɗingi awe ma anggasi ti maɗufal ima ndak ta ra i masher ani ya?”

³⁷ Mandereti ni, “A maɗufal ima ɗing shum asussi.” Unai Yeso lakus ni, “Ha hwak ɓwa ha masi andi.”

Yeso Wa ta Wur i Umata hu Uryam

³⁸ Yeso hu fe i ro amessi sin hai ma'at si ru ta foti ashwa nin, kyel ima mbor nin tima asum amet a Umata, ti matus ta wur amet.

³⁹ Umata ti mati tusut nin, mu asum Uryam, tima ti te amun ta nggas ti Deembai, yit hal ti findelal ames.

⁴⁰ Yit Umata, a ro i cwa ha'ut mulut ya, unai ti wa kyel i Yeso ti ni, “A Deembai, ha mu' ti ngga ima tusun ti honun ti ro i ɗiti cwa ahweni kwa? Laka yut ti yes ti bumun!”

⁴¹ Unai Deembai matuti ni, “A Umata, a Umata, shima tirim ti amiya? Shi mu' si ɗamam hai hyang.

⁴² A ɗama andek je ɗat naɗin shi tirim i hai, ayis ɓin ɗat, Uryam ti ben aɗeng ima ɓin ɗat, ɗeng ma wa ka'sut ti kwa.”