Luka 1 - Findel i DeeƁwe Ti Alis i Ron

Ɓwaiya

¹ Ɗufal hyang si kin hai ɓa si worong findel tasi ɗamam ima si fur na saa kan ti.

² Si worong ta ngga' ima si fanin ta, ta foi som bya' ima si ɗingi ti shishat ames, si lak nin, ɓurti a sin ɗufal ima si fas ro i mba ti findel i DeeƁwe ta ra.

³ Mbai maɗufal dee Tyofilus, ɓurtya i bene ɗamam mii shak, tasi bya' yin wa ti lo, unai ɗatun ɓa i worongai ti andek-andek ta ngga' ima si fur ta,

⁴ ɓurti ɓa ha shang mwawei i ɗamam ima si laka, si wa kiga' ta ngga' ima si kofi ta.

Malu' Lak Ngga' ima Si Wa Al Ti Jwon Mabatisma Ta

⁵ Myan ima Herod yis i makai i Judya, ai sin ti makocok nin, asum ames a Zakarya, ta saa ti kocokaki yis mii ta ɓwai i ɗufal i Abija. Mborsus Uelizabet, yit hwak ti mii ta gung i Eron fota re amet.

⁶ Sin apili si mas mute maɗesi ta mabel i DeeƁwe, si hya aɗeng ima mata anggut shak, hu ɗamam ima si mana ti masi.

⁷ Si wis fe kwa, ɓurti Uelizabet ti ngguriyatut, fut hwak Zakarya hu mborsusi si kaya.

⁸ Mwen nin ndai, ima mii myan i Zakarya ɓa u mas ro i makocok ta Wur i DeeƁwe.

⁹ Ta ngga' ima som kocok si mana ti masi ta, si benus, ta fisel ti hwiti aben ɓa u lang ta Wur i Deembai ɓa u ngyesh yitat mafyongi wa kyel i DeeƁwe.

¹⁰ Myan i ngyesh ti yitat mafyongi si ru, ɗufal shak si shwai ta saikyel sin fwal ti DeeƁwe.

¹¹ Unai malu' i DeeƁwe pwakus hai, te mangra ta ra i ucwa ta kyel i ngyesh ti yitat mafyongi.

¹² Myan ima Zakarya ɗing malu' i DeeƁwe fur ta fisha, myanat ti ka'us.

¹³ Unai malu' i DeeƁwe nyus “Zakarya! Kan ha mwen kwa, DeeƁwe hal kawa ma. Mborsa Uelizabet ti wa al sa al marei, ha wa kinsus asum ii Jwon.

¹⁴ Ma wa mute i ɗama i jakak, hu ɗama i ɗat si ɓwi yes kyel ama, ɗufal hyang hwak si wa jakak akul hu ha, ɓurtya si alus.

¹⁵ Ma wa mute i mbai maɗufal ta wei i DeeƁwe, ma wa woti likit hu ɗama nin ima can kwa fweng, si wa hya sus ti Rin Masapai ta ɗar i nasus.

¹⁶ Ayis ma wa muhumkyel ti ɗufal i Isar'ila hyang wa kyel i Deembai DeeƁwe ames.

¹⁷ Ma wa mutong ta wei ti Deembai, ma wa masti ro ti shak njeng ames ti mbaitat i rin i Iliya, ma wa hatat ti mulwat i hu dee wa kyel i fei. Som ima si njeng ti hai, ma wa hatatus, ɓa si te ti shingat munderei, angga' ima ma wa ɗak ti ɗufal ta, ɓa si te i ɗufal i Deembai ta nai.”

¹⁸ Unai Zakarya lul ta malu'i ni, “I wa masi atini i shang findel mai awei ya? Yin tii kayan, mborsun hwak wilial amet si her ta.”

¹⁹ Unai malu' i DeeƁwe nyus, “Ayin a Gebirel, ima mute mangra ta wei i DeeƁwe, a yis rohun ɓa i findela, i laka muro maɗesi mai.

²⁰ Ɓurti ha fa mwawei nasi findel ima i laka mai kwa, ha wa mute kaciwa' findel yes myan ima findel mai hya. Findel mai a kpak ma wa hya na myan si ru.”

²¹ Ɗufal si shwai Zakarya wet aɗengi lumus fo ya, ɓurti ɓal mute ta wii Wur i DeeƁwe, si mbe' nyai, “Ami shaas mulangya kang ta Wur i DeeƁwe ɗak?”

²² Myan ima lang ya, katus cakat kaciwa' findel ti ɗufal, unai si mbe' ta mulwat nyai, nan ɗing ɗama, ɓurti si ɗingi langus findel ti ra, cu wei ti mute mgbwing.

²³ Myan ima mukonan i ro ames si hya ta Wur i DeeƁwe mbit, humkyel ta wur.

²⁴ Takfai ti mukonan ndyong mborsus Uelizabet ti kaf haar, unai ti vo haisut ta wur i ture hara kaciwa' mulangya, nyai,

²⁵ “Aɗeng ima DeeƁwe masuni na kayaat amen mai, ɗing shum a suni unai ha'un shusho ya na saa ti ɗufal.”

Si Lak Ngga' ima Si Wa Al Ti Yeso Ta

²⁶ Uelizabet yit ti haar ture taan, DeeƁwe ro malu' ames Gebirel wa ashwa ti Galili ta ta' ti Nazaret,

²⁷ wa kyel yamwan nin ti wom, tima ti wa kunggo ti Josep, ma gung i Devid, asum amet a Uryam.

²⁸ Malu' i DeeƁwe pwakut hai nyut, “I ma too', shima ti aweng fwet! DeeƁwe ma akul hu shish.”

²⁹ Ti hal ti mai findeli, Uryam ti tirim fwet ti mbe' nyai anggi musut i too'i mai ya.

³⁰ Unai malu' i DeeƁwe nyut, “A Uryam, kan shi mwen kwa, shi wis mbai aweng ta kyel i DeeƁwe.

³¹ Shi wa kaf ti haar shi al al marei, shi wa kinsus asum ii Yeso.

³² Ma wa mute i mbai maɗufal fwet, si wa laisus ii Al i Mambaitat. Deembai DeeƁwe ma wa fasus kunggul ti kaitat ti Dees Devid.

³³ Ma wa masti kaitat si wur i Jakop yes myan hu myan, kaitat asus ti wa mute ti nggwe' kwa.”

³⁴ Uryam ti lul ta malu' i DeeƁwe nyai, “Yin tima wa' i shang marei, ma wa mute atini i kaf haar ya?”

³⁵ Malu' i DeeƁwe nyut, “Rin Masapai ma wa muɗor shush hai, mbaitat i Makaitat ma wa vo shush ya. Ɓurti andi yis Al masapai ima shi wa ali mai, si wa laisus ii Al i DeeƁwe.

³⁶ U mai muti gung ashush Uelizabet hwak ti ti haar, ai yit yut ii ngguri, mwashi tima ti haar ture taan.

³⁷ Ɓurti ɗama nin ɓyan njeng i DeeƁwe kwa.”

³⁸ Unai Uryam ti ni, “I mii yere ti Deembai. Shak aɗeng ima ha lak, u te ta andi.” Unai malu' i DeeƁwe wis.

Uryam Ti Wa Too' ti Uli

³⁹ Mukonani Uryam ti sinzam ɗam, ti ka' fisel ti wa ashwa i Juda ta' ti fwere,

⁴⁰ ti lang ta wur i Zakarya ti to' Uelizabet.

⁴¹ Ti hal ti too' i Uryam, al ima mata ɗar i Uelizabet ro kyel, unai Uelizabet ti hya ti Rin Masapai.

⁴² Ti lak findel ti la mbai nyai, “A shish shi ɓin wis ti maɗesi na saa ti arof shak, al ima shi wa ali mai maɗesi mayus hai!

⁴³ Shak ta andi, anggi musut i awengi i mati ima nasus ti Deembai ti yes too' sun ya?

⁴⁴ Ti hal ti too' amesh, ali na ɗar yunti ro kyel ti jakak.

⁴⁵ Maɗesi wa kyel amet tima ti fa mwawei nyai, Deembai ma wa hya ti shak ɗamam ima lakut.”

Ador ti Uryam

⁴⁶ Unai Uryam ti ni, “Mupwet asun ti ha' ti Deembai fit,

⁴⁷ rin amen jakak ɓurti DeeƁwe a Mabum amen.

⁴⁸ A ɓurtya mbe' ti yin yere asus tima yin a ɗama kwa. Nasi mwashi yes wei shak waya si wa laisun ii mbor tima ti wis maɗesi,

⁴⁹ ɓurti Manjeng maas mbai ɗama ɓu sun, asum asus ti ti sapa.

⁵⁰ Gwa' som myanatsus fo ashur ames, ta waya wa waya.

⁵¹ Maas ɗamam mbayai i lum na fo ti kon ames, ɓaas ti som i ngye na hihai ima si mati ta wii mulwat ames.

⁵² Jak mbayai i kaya ya ta si kunggul i kaitat ames, ha' som ima si rak ti hai fit.

⁵³ Hya som hwem ti gwishil ti ɗamam maɗesi, ngga som i ramwayat ya ra ashoki.

⁵⁴ Bum yere ames Isar'ila, mbe' ɓa u kof voti ashur

⁵⁵ wa kyel i Ibirai hu washash ames myan hu myan, ta ngga' ima lak washash aminin ta.”

⁵⁶ Uryam ti te akul hu Uelizabet i ture ataat ɗak ti humkyel ta wur amet.

Si Al Jwon Mabatisma

⁵⁷ Myan si ru, Uelizabet ti al al marei.

⁵⁸ Som ima si mute si ɗiyai wi, hu som gung si hali nyai Deembai masut maɗesi, vot ashur, si yes si wisut si jakak tikul.

⁵⁹ Mwen ima ali hya mukon mumyarfu', si yes ɓa si masus mukwen, sin ɓweti kinsus asum ii Zakarya, asum i dees.

⁶⁰ Unai nasus tini, “Andi kwa! Naɗin ka kinus asum ii Jwon.”

⁶¹ Unai si nyut, “Ɗeng mati asum mai na gung amu kwa.”

⁶² Unai si findel dees ti ra, ɓa u lakus ti asum i ali.

⁶³ Findelus ti ra nyai ɓa si kolus caɓalang i worong, unai worong ni, “Asum ames a Jwon.” Shak ɗufal ima si ta kyeli, aɗengi lumus fwai ya!

⁶⁴ Fo abet alis ames hwet ta fo, unai lang findel, yis jakak, yis ha' ti asum i DeeƁwe fit.

⁶⁵ Myanat ka' ɗufal shak, ɗufal si but findel mai ta ashwaha i ta' ti Judya.

⁶⁶ Shak ɗufal ima si hal findeli, si kin ta mulwat, sin nyai, “Al a mai ma wa mute i mi ya?” Ɓurti ra i Deembai ma akul hu yis.

Zakarya Ha' DeeƁwe Fit ti Ador

⁶⁷ Unai Zakarya dees i Jwon hya ti Rin Masapai, lak findel i DeeƁwe ni,

⁶⁸ “Ka fa Deembai mbaitat, DeeƁwe i Isar'ila, ɓurti yes ɓa u mas ɗufal ames bum u dumus ya.

⁶⁹ Fa kan Mabum manjengi ta wur i yere ames Makai Devid,

⁷⁰ fota ngga' ima ai lak ta ta fo i som shit som sapa, wilyal hyang ima si lang ta,

⁷¹ ma wa bum sikan ta ra i som ima si ha' kan ti wei, hu ta ra i shak ɗufal ima si nggwe ti kan.

⁷² Angga' ima vo hu demukan ashur ta nai mbe' ti findel i kintiɓwi masapai ames,

⁷³ findel ima ai shiɗat hu demukan Ibirai, ma wa fasikan,

⁷⁴ ma wa bum sikan ta ra i som ima si ha' kan ti wei. U fa kan njeng ɓurti kan ka cu afut ti myanat kwa,

⁷⁵ ka cu afut ta fisel ti sapa hu mute manderei ta mabel ames shak myan i mupwet amukan.

⁷⁶ ‘Ha a al amen, si wa laisa ii mashit i DeeƁwe Mambaitat, ha wa mutong ta wei ti Deembai ɓurti ɓa ha ɗak ti fisel ɓur sus.

⁷⁷ Ha wa lak ti ɗufal ames ngga' ima si wa wisti abum ta, ta fisel ti shwaiti mafwashi ya.

⁷⁸ Ɓurti ɗing ti shum i DeeƁwe amukan, kweneng i bum ta fit yes kyel amukan, kof kan kweneng,

⁷⁹ kof kweneng tasi ɗufal ima si mute ta maɓing wi hu ima si ta manjiling i mot, kof kan ti fisel ti wis ti cala.’ ”

⁸⁰ Unai Jwon ngye, luk fit ti njeng ta saa ti rin. Mas mute asus ta ya, yes myan ima fur ro ames, kof haisus ta ɗufal i Isar'ila wii.