Kolosiyawa 4 - Findel i DeeƁwe Ti Alis i Ron

¹ A som wur, fahun yarai amu aɗeng ima mandere hu mwawei, ɓurti hu shangi hun hwak hu ti Mawur ta fit.

Findelal Muwei

² Fahun haisu ta saa ti fwal, hu te mweret hun kofti palang.

³ Fwal hun ɓur sinin hwak, ɓa DeeƁwe u ɓu nin kwap ya ɓurti muro, ɓa ni mba findel manggyongi i Kristi, ima kin i ma mano'.

⁴ Fwal hun ɓa i mba ndere, tasi ngga' ima ɗat ɓa i masi ta.

⁵ Tehun ti shingat ta saa ti som ima si kaciwa' koltifai, mas hun ro ti shak myan ima hu mati.

⁶ Hon hun findelal amu ngang u hya ti maɗesi, ɓa si hal mimyat ames, ɓurti ɓa hu shang ngga' ima hu yus wa muhumkyel ti lulal ames ta shak.

Too' i Dala

⁷ A Tikikus ma wa laksu shak findelali na hai yunti. Yis a nusikan i ho', mamuro manderei, hu maro akul hu kan saa ti Deembai.

⁸ I ma ti'sus ta kyel amu ɓa hu shang aɗeng ima wis nin, ɓa hu wis njeng i fwaran hwak.

⁹ Ma yes akul hu nusikan Onisimus manderei, ima ma andek ta saa asu. Si wa laksu shak ɗaman ima si mufur nanati.

¹⁰ Aristakus ima ni ta mano' tikul, ma ti'su too', a andi Mak masi, a nusus i Barnabas. (Ai hu mat findelal tasi yis hai. Na yes kyel amu, mat hu yus ra apil.)

¹¹ Yeso, ima si lai ii Justus, yis hwak ma ti'su too'. A ɗufal ataat mii je a Ju, ta saa ti som i ro ɓurti kaitat i DeeƁwe, si fan njeng i fwaran.

¹² Epafaras, andek ta saa asu, a yere i Yeso Kristi, ma ti'su too'. Ma makutuk ngang fwal ɓursu, ɓa hu te mangra si shak aɗeng ima DeeƁwe ma ɓweti, hu kaya ya kaciwa' myanat.

¹³ Ayin a shit i ro manjengi ima ma masi ɓursu, hu ima si ta Lawudikya, hu Hirapolis.

¹⁴ Luka mwes amukan i ho', ma fati manda, hu Dimas si tuksu too'.

¹⁵ Fahun too' amen wa kyel i shunukan ima si ta Lawudikya, hu Unimfa, hu som koltifai ima si shwai ta wur amet.

¹⁶ Takfai tima hu mbe' kaada moti, ni hun gbuk hu ɗingi si mbe' ta wei i som koltifai i Lawudikya hwak, ɗak hu humkyel hu mbe' kaadai ta Lawudikya.

¹⁷ Lak hun Akibus nyai, “Ɓa ɗingi nyai, pun ro ima Deembai fas.”

¹⁸ Yin Pool, i worong su too' mai ti ra amen. Mbe' hun, i mata mano'. Mal maɗesi i DeeƁwe u te akul hu hun.