Kolosiyawa 3 - Findel i DeeƁwe Ti Alis i Ron

Anggut Ɓurti Mute i Sapai

¹ Shak ta muluk fit amu hu Kristi, kin hun mulwat amu tasi ɗamam i kyel fit, kyel ima Kristi ma amun ta ra i ucwa i DeeƁwe.

² Kin hun ambe' amu tasi ɗamam i kyel fit, a ɗamam i naya kwa.

³ Hun hu mot, ɗak mupwet amu mwashi mata mufot wi hu Kristi, saa ti DeeƁwe.

⁴ Myan ima Kristi, ima a yis mii mupwet amu pwak ya, hun hwak hu wa mupwak ya akul hu yis ta cinjangat ames.

⁵ For hun shak aɗeng ima mii naya ya, fota arak i zuruk, hu ro i ruɓun, hu gwel, hu ambe' mafwashi, hu ɓweti hai ima a yis mii koltifai ti harkyel.

⁶ A ɓurti mii, futut i DeeƁwe ma wa yes.

⁷ Hu mana ɗa'at tasi fiselal ima ai ani, tasi mupwet ima ti hu masi.

⁸ Mwashi a kpang hu ha' haisu ya ta shak ɗamam mii, futut, hu mulut, munggwya ti ɗiyai, hu rafat ti asum ya, hu findelal i gbya' ta fwai amu.

⁹ Kan hu lef ɗiyai fyaratat hai kwa, ɓurti hu shu mute amu mawili ya ta ro amesi,

¹⁰ hu ru' mute mamwayi, ima humkyel ii mamwayi ti shangi i matɗing i Malan sus.

¹¹ Mwashi ka mati mute i matgwyakan saa ti Girik ahun a ma Ju, ma mukwen ahun a ma kaciwa' mukwen, mwalmwat ahun a fe i se, yere ahun a mute i cati i ra kwa. A Kristi mii shak, ta wii i shak.

¹² Ɓurti andi, fota ngga' ima DeeƁwe ɓwetu, benu ɓa hu te ii som ames musapai, vo hun haisu ya ti ɗing ti shum, bum, munung, murak ti hai, hu ka'ti agung.

¹³ Ka' hun mulut ti ɗiyai, shuhun shak mafwashi ima hu mas ɗiyaiyi ya. Shuhun ya fota ngga' ima Deembai shuhui ya ta.

¹⁴ Tasi hai ɗamam mii shak, vo hun haisu ya ti matɓwet, ima no'us shak ta kyel andek ndere.

¹⁵ Hon hun mute cala i Kristi u mas kaitat ta mulwat amu, ɓurti hun a lo' andek, si laiyu ɓa hu te cala. Kof hun palang.

¹⁶ Hon hun findel i Kristi, u wis kyel mute ta wii yuti ndyas, hun kofiti, hun lak ti ɗiyai ti shak piris, hu tong nakwai, hu ha' ti adorai i rin hu i kofti palang ta mulwat amu, wa kyel i DeeƁwe.

¹⁷ Shak aɗeng ima hu masi, ii ta findel ahun ii ta masi, mas huni shak saa ti asum i Deembai Yeso, hun fati palang wa kyel i DeeƁwe Dee ta kyel ames.

Anggut i Wur i Som Koltifai

¹⁸ A arof, fahun haisu ta kyel arya amu, mai a kiga' ta kyel i Deembai.

¹⁹ A arya, ɓwet hun arof amu, kan hu ha'us ti ɓin kwa.

²⁰ A fe, hal hun hu dee tasi ɗamam shak, fota ngga' ima Deembai maɓweti ta.

²¹ A hu dee, kan hu kin fe amu futut kwa, si wa wisti njeng i fwaran kwa.

²² A yarai, hal hun hu dee i wur amu si shak ɗamam, ka hu masi a myan ima si kinsu shit hai je, ɓa hu kinus jakak kwa. Mas huni ti mulut mwawei, hu myanat ti Deembai fo.

²³ Shak aɗeng ima ha masi, masa ro i hai ti shak mulut ama, fota ha ma mas tya Deembai yi, a maɗufal kwa.

²⁴ Ɓurti ha shangi nyai, ha wa mat ti kop ta kyel i Deembai ii fo i sai muro. A Deembai Kristi hu masus ro.

²⁵ Shak maɗufal ima mas mafwashi, si wa talsus ɓurti mafwashi ames, kaciwa' ɓweti hai.