Kolosiyawa 2 - Findel i DeeƁwe Ti Alis i Ron

¹ I ma ɓweti hu shang ngga' ima i makutuk ɓursu, hu som i Lawudikya, hu shak som ima i wisus ti haisun kwa.

² Ɓweti amen, ɓa si fas njeng i mulut, si te andek saa ti matɓwet, ɓa si te ti ramwayat i piris shak, ɓa si shang kinggyongat i DeeƁwe, a yis mii Kristi ndai.

³ Shak ramwayat i piris hu shangi, si fot ti ta wii yusti.

⁴ I laksu mai kan ɗeng dangu ti uɓet mumyai nin kwa.

⁵ Shak ta muni wet amen na kyel amu na lo' wii, i ma akul hu hun na rin, i jakak ɓa i ɗing ngga' ima hu sinzam haisu ta, hu ngga' ima hu te mangra tasi fati mulut amu si hai Kristi.

Mupwet Mamwai Ta Kristi Wii

⁶ Ɓurti andi, ngga' ima hu mat Yeso Kristi fota Deembai ta, tehun ta wii yusti andi,

⁷ hun masti sisyar, hun ngye ta wii yusti, hun njeng tasi fati mulut fota ngga' ima si kofu ti ta, ɗak palang hya u rangya.

⁸ Ɗing huni hwak, kan hu hon ɗeng u hat tu ii yarai ti pang ti findelal i gbya' hu dang kwa. Ɗamam mii si yes ii ta kofiti i maɗufal hu fiselal i shingat i naya, fo ima si mas i Kristi.

⁹ Mupwet i DeeƁwe hya shak ta lo' i Kristi wi,

¹⁰ ɗak si fu hya i mupwet ta Kristi wi, ima a yis a hai tasi shak andok hu mbaitat.

¹¹ A ta wii yusti hwak, si masu mukwen si zanu mute mafwashi ya. A tasi mukwen ima ɗufal si masi ti ra kwa, a mukwen ima Kristi masi.

¹² Si laiyu akul hu yis, ta fisel ti masu batisma, hu zansu fit akul hu yis ta fisel ti fati mulut saa ti andok i DeeƁwe, ima zanus fit ta mot wi.

¹³ Myan ima ai hun ii funat ta saa ti mafwashani kaciwa' mukwen i rin, DeeƁwe hat tu ii mupweti saa ti Kristi, yis shwai sikan mafwashi amukan ya shak.

¹⁴ Fot mafwashi ima si worong na hai kanti ya ta kaada wi, ima ma ha' ti wei ti kan, zan ya nggwak tasi shanggam hai.

¹⁵ Cu uges si andok hu mbaitat, fas shusho rasman tasi shanggam hai.

¹⁶ Ɓurti andi, kan hu ɓwet ɓa ɗeng u totu ɓur tasi cwai hu woi kwa, ahun a tasi got i koltifai, got i ture mamwai ahun a Mwen ti Lafos.

¹⁷ Mii a mashilim i ɗamam ima si wa yes, mwaweiyi a Kristi.

¹⁸ Kan hu hon ɗeng u muku ti fyaratat i munung hu cwai ti afut i som lu' kwa. Musut i maɗufal mai nggwak ajin, yis pang ti findelal si ɗamam ima ɗingi. Ambe' mafwashi ames kyanus ngye na hai.

¹⁹ Unai si matkar hu Kristi ima a yis a hai i lo'i. Kristi fa lo'i shak njeng, ɗak ka' nggwaha hu sisyari akul ɓa si ngye ta ngga' ima DeeƁwe masi ta.

²⁰ Hu mot hu Kristi ɗak fu mute laja ta fiselal i shingat i naya moti. Ami kin hu muhum koltifai asuti ya? Hu fa hai si kaitat amet, fota.

²¹ “Kan hu ka'i kwa, kan hu hali kwa, kan hu ngge'i kwa.”

²² Mii ɗamami shak si rafaat, ɓurti a kofiti i ɗufal kek.

²³ Musut i anggutat mii, si mati matɗing i shingat, ɓurti si kinti ɗufal koltifai fwet, fyaratat i munung ames, hu kofti lo' ames ya. Shak ta andi, si far ngga' ima ɓa si cu uges tasi mute mafwashi ames wet.