Kolosiyawa 1 - Findel i DeeƁwe Ti Alis i Ron

¹ Kaada moti ii ta kyel Pool, mamuro i Yeso Kristi ti matɓwet i DeeƁwe hu nusikan Timoti,

² wa kyel i som sapai hu shunukan ima si hya findel ta saa ti Kristi, ima si ta Kolosi. Mal maɗesi hu mute cala u te akul hu hun ta kyel i DeeƁwe Deemukan.

Palang hu Fwal

³ A ngang ni ma kofti palang wa kyel i DeeƁwe, Dees i Deembai Yeso Kristi, shak myan ima ni fwal ɓursu,

⁴ ɓurti ni hal njeng i fati mulut amu saa ti Yeso Kristi, hu matɓwet ima hu mati si som sapai shak.

⁵ Fati mulut hu matɓwet mai, si ngye tasi kintiɓwi ima si ɗaku ti ta fit, ima ti hu hali ta saa ti findel i mwawei,

⁶ Muro Maɗesi ima yesu hai mai, tu nggar shak naya ya. Tima fati macwa ti kikyali hu shen ti mupwet, fota ngga' ima shen mupwet asu tasi mwen ima hu hali tasi bya', ɗak hu shang mal maɗesi i DeeƁwe i mwawei.

⁷ Hu hali ta kyel i malis amukan Epafaras, mas ro akul hu kan ɓurti Kristi, yis a ma hya ti findel ɓursu.

⁸ Yis hwak lak nin matɓwet amu ta saa ti Rin.

⁹ A aɗeng ima kin nai, tasi myan ima ni hal findel tasi hun hai, ni hon fwal ɓursu kwa, nin fwal ti DeeƁwe ɓa u hya hu ti shang ti aɗeng ima maɓweti, ta fisel ti piris saa ti rin ames ka'i ta hai.

¹⁰ Ni fwal ɓa hu wis mute manderei i Deembai, ɓa u ɗatus ta shak fiselali, hun shen ti mupwet amu ta saa ti ro maɗesi, hun ngye tasi shangi i DeeƁwe.

¹¹ Naɗin hu wis njeng ti shak andok ames, ɓa hu rwish fwet hun ka'ti agung, hun jakak,

¹² hun palang ti Dee ima fu andok i mat ti kop i som sapai ta kaitat i kweneng.

¹³ Yis ha' kan man hai ta kaitat i maɓing, kol kan na kaitat i Al ima ɓwetus,

¹⁴ ii tasi yis hai ka wis cati ii ra, si shukan mafwashani ya.

Mbaitat i Kristi

¹⁵ Kristi a mashilim i DeeƁwe ima si ɗyangus kwa, hu Al i bya' ta shak ɗamam ima DeeƁwe lan.

¹⁶ Ii ta fisel ames DeeƁwe lan ɗamam shak, ima si ta fit, hu ima si mana si ndik fisha, ima ka ɗyangus hu ima ka ɗyangus kwa, a kunggul, ahun a kaitat, ahun a andok, ahun a mbaitat, shak mii si lan ii ta kyel ames ɓursus.

¹⁷ Kaciwa' ti si lan shak ɗamam, ai yis na. Ayis ti haisus ka' ɗamami shak ta kyel andek.

¹⁸ Ayis a hai i lo', ima ii som koltifai, a yis ii bya', hu Al i mala ta saa ti ima si mot, ɓa u te ii mambaitat ta saa ti ɗamam shak.

¹⁹ A ɗingi i DeeƁwe ɓa Ali u ha' lakan ames.

²⁰ Ii ta fisel i Yeso, DeeƁwe taɓak ɗamam shak yes kyel ames, a ɗamam i naya ahun ii kyel ta fit, fa cala ta fisel i wash ima shuya tasi shanggam hai.

²¹ Ai hun ti maleng ta kyel i DeeƁwe, hun ha' ti wei ti yis ta mulwat amu ɓurti ɗamam mafwashani ima hu masi.

²² Mwashi DeeƁwe taɓaku ta fisel ti mot i Al ames na lo' wi rasman, ɓa u ti'u ti sapa ta mabel ames, kaciwa' mafwashi, u zanu ya ta se' wi.

²³ Cuhun wei ti fati mulut ti njeng, hu te mangra kaciwa' muher ya tasi kintiɓwi ima hu hali tasi Muro Maɗesi. A Muro Maɗesi ima hu hali hu ima si lak shak naya mai, ima ayin Pool i te ii yere amet.

Ro i Pool ɓurti Som Koltifai

²⁴ Mwashi i jakak ɓurti shum ima i wo ɓursu, i hya to na lo' amen, hu shum ima Kristi wo ɓurti lo' ames, a som koltifai ndai.

²⁵ I te ii maro ima DeeƁwe no' uni, fan ɓa i ti'u findel i DeeƁwe nggya-nggya.

²⁶ Aɗeng ima ai si fot ti tasi ɓele hu waya, a mwashi si kofti som sapai.

²⁷ DeeƁwe maɓweti ɓa Ramam si shang ramwayat hu cinjangat i kinggyongat mai, Kristi ta wii yuti, a kintiɓwi i cinjangat.

²⁸ Ayis kin ni mba ti findel i Kristi wa kyel i shak ɗufal, nin zulsus mwal, nin kofsus ti shak piris, ɓa ni ti'us ndyas, ta saa ti Kristi.

²⁹ Ayis kin i mas ro, yin makutuk ti shak njeng ames, ima mas ro ti andok na wii yunti.