Jwon 8 - Findel i DeeƁwe Ti Alis i Ron

Mbor Tima Si Ka'ut Hu Mak

¹ Unai Yeso wa ta Anggash i Yitat i Mbar.

² Tamwen hwak hum kyel ta Wur i DeeƁwe. Shak ɗufal si yes kyel ames, te amun yis kofsus ti.

³ Unai som i kofti si anggut hu Farisiyawa si yes ti mbor nin tima si ka'ut hu marei nin sin arak i zuruk, si kinut ta saa yusti.

⁴ Ɗak si lak Yeso si ni, “A Makofiti, si ka' mbor moti yit arak i zuruk.

⁵ Anggut i Mosis ni ɓa ka hwyai musut i arof mii ti afyai, ka fwar ya. Ha ha ni amiya?”

⁶ Si mas mai lui ɓa si mbahus, ɓurti ɓa si wisi si langtus ta kyel i ɓur. Unai Yeso ni mwa' worong ti worong ta fisha ti foti ra asus.

⁷ Myan ima si cu wei ti masti Yeso lulal, unai luk fit nyus, “Shak maɗufal ima mas mafwashi kwa, u tong hwisut ti afung.”

⁸ Unai Yeso hum muni mwa' worong ti worong ta fisha.

⁹ Myan ima si hali andi, si hon kyeli ti andek-andek, mutong tasi mbayaiyi, si hon Yeso ta kyeli hu mbori yit yus mangra fo.

¹⁰ Unai Yeso luk fit lulut ni, “A mbor, si mii leya? Ɗeng lefush ɓur hai kwa haa?”

¹¹ Ti nyus, “A Deembai, ɗeng lefun ɓur hai kwa.” Unai Yeso ni, “Yin hwak i lefush ɓur hai kwa. Shish yush wa, mwashi yes wei kan shi hum masti mafwashi kwa.”

A Yeso Mii Kweneng i Naya

¹² Unai Yeso hum findel ti ɗufal ni, “Ayin a kweneng i nayai. Shak maɗufal ima makoltifai asun ni ma wa ɗa'ati at ta maɓing wi kwa, ma wa wis ti kweneng i mupwet.”

¹³ Unai Farisiyawa si lak Yeso si ni, “Ha lak ti findel si hai sa hai, findel amai mati mwawei kwa.”

¹⁴ Yeso humuskyel ti findel ta ni, “Na i lak findel si haisun hai, i lak ti a mwawei, ɓurti i shang kyel ima i lang ta, hu kyel ima i ma wa ta. Hun hu shang mai aɗengi na hai yunti kwa.

¹⁵ Hu tot ti ɓur a ti ɗingi i ɗufal. Yin i tot ti ɓur si ɗeng hai kwa.

¹⁶ Na yin wa tot ti ɓur, tot ti ɓur amen a mwawei, ɓurti i ma ahweni kwa. Deen ima rohun, ma akul hu yin.

¹⁷ Ta anggut amu si worong ta nyai, na ɗufal apil si lak findel ii ma andeki kof a mwawei.

¹⁸ Yin i lak ti findel si haisun hai, Deen ima rohun ayis mii mapili.”

¹⁹ Unai si lulus si ni, “Dya hi mii leya?” Unai Yeso humuskyel ti findel ta ni, “Hu shangun kwa, hu shang Deen kwa. Naɗin hu shangun, naɗin hu shang Deen hwak.”

²⁰ Yeso lak findel mai myan ima yis kofti shangi ta nggas ti kyel ima si kyanan ti mal i Wur i DeeƁwe ta. Shak ta andi, ɗeng ka'us kwa, ɓurti myan ames tuu ru kwa.

²¹ Unai Yeso hum laksus ni, “I ma yun wa, hu wa farsun, hu wa mot ta wii i mafwashani amu. Kyel ima i ma wata, hu wa mba ti wa wet.”

²² Mai kin som Ju si lul nyai, “Ma wa for ti haisus ya ani? Ayis kin ma nyai, kyel ima i wa ta hu wa mba ti wa wet haa?”

²³ Unai cu wei ti nyai, “Hun hu mii na fisha, yin i lang ii ta fit. Hun hu mii naya moti, yin i mii naya moti kwa.

²⁴ Ayis kin i nyu hu wa mot ta mafwashani amu wi. Na hu fa mwawei nyai ayin ima i ni i mii yin yi kwa, hu wa mot ta mafwashani amu wii gɓwum.”

²⁵ Unai si lul ta Yeso si ni, “A ha aweya?” Yeso humuskyel ti findel ta ni, “Ayin i mii ima i laku tii tasi bya'.

²⁶ I mati ɗamam hyang ima i wa laki si hun hai, i lefu ɓur hai. Shak ta andi, i lak ti aɗeng ima i hali ta kyel i yis ima rohun, aɗeng ima i hali ta kyel ames i wa lak ti naya.”

²⁷ Si shangi nyai ma findel a si Dees hai kwa.

²⁸ Yeso nyus, “Myan ima hu ha' Al i Maɗufal fit, a myani hu wa shangi nyai ayin yi. Hu wa shangi nyai i maas ɗama ti mbaitat i haisun kwa, i lak ti aɗeng ima Dee kofun ti je.

²⁹ Yis ima rohun ma akul hu yin, hon nun ahwen kwa, ɓurti ngang i masti aɗeng ima ɗatus si ɓwi hai.”

³⁰ Myan ima Yeso yis lak ti ɗaman mii, ɗufal hyang si fa mwawei si yis hai.

Fe i Ibirai

³¹ Unai Yeso lak som Ju ima si fa mwawei wa kyel ames si, ni, “Na hu cu wei ti ɗamam ima i kofu ti, hun a fe i ro amen i mwawei.

³² Hu wa shang ti mwawei, mwawei ma wa fasu mute i haisu.”

³³ Unai si humuskyel ti findel si ni, “Nin a gung i Ibirai, ai ti ni te ii yarai i ɗeng kwa. Ami kin ha nyai ni wa wis ti mute i haisinin ya?”

³⁴ Unai Yeso humuskyel ti findel ni, “I ma laksu mwawei, shak ma masti mafwashi a yere i mafwashi.

³⁵ Yere mati kyel i mute ta wur vit kwa, al i wur mati kyel i mute ta wur vit.

³⁶ Ɓurti andi, na Ali fu mute i cati ii ra, hu wa wis ti mute i cati ii ra fweng.

³⁷ I shangi hun a fe i Ibirai. Shak ta andi, hu far ti fisel ima ɓa hu forun, ɓurti hu mat findel amen kwa.

³⁸ I ma laksu aɗeng ima i ɗingi ta kyel i Deen, hun hu masti aɗeng ima hu hali ta kyel i Dyou.”

³⁹ Unai si humuskyel ti findel ta si ni, “Ibirai a deeminin.” Unai Yeso humuskyel ti findel ta ni, “Naɗin a hun a fe i Ibirai, naɗin hu nin wa masti ɗamam ima yis Ibirai masi.

⁴⁰ Fota angga' ima mata, hu muni gɓwuk ɓa hu forun, maɗufal ima i laku mwawei ima i hali ta kyel i DeeƁwe, Ibirai mas musut i ɗamam mii kwa.

⁴¹ Ɓurti andi hu masti aɗeng ima Deemu ma masi.” Unai som Ju si ni, “Nin a fe i se kwa. A DeeƁwe kek je mii Deeminin.”

⁴² Yeso nyus, “Naɗin DeeƁwe a dyou, naɗin hu ɓwetun, ɓurti i lang ii ta kyel i DeeƁwe, yin mai nanati mwashi. I yes a ɓurti haisun kwa, a DeeƁwe rohun.

⁴³ Ami kin hu shang aɗeng i ma i laki kwa ya? A ɓurti hu hal ti aɗeng ima i laki kwa.

⁴⁴ Hu mii ta kyel i deemu Shatan, hu ɓyaat masti aɗeng ima ma ɓweti. A ma for ti ɗufal tasi bya', ka' mwawei kwa, ɓurti mati mwawei ta wii yusti kwa. Shak myan ima yis lak ti fyarat ma kofti a angga'i mute ames, ɓurti yis a ma fyarat, dee i fyarat.

⁴⁵ Unai ɓurti i lak ti mwawei, hu nggyu i fati mwawei yes kyel amen.

⁴⁶ Awe amu wisun ti mafwashi ya? Na i lak ti mwawei, ami kin hu fa mwawei yes kyel amen kwa ya?

⁴⁷ Yis ima mii DeeƁwe hal findel i DeeƁwe. Aɗengi ma kin hu hali kwa, a ɓurti hu mii DeeƁwe kwa.”

Yeso Ɓin Ibirai

⁴⁸ Ju si humuskyel ti findel si ni, “Ni lak a kiga' kwaa, ima ni a ha a maɗufal i Samarya, ima mati rin mafwashi kwaa?”

⁴⁹ Yeso humuskyel ti findel ta ni, “I ti rin mafwashi kwa. I ha' ti a Deen ta fit, hun hu komsun ya.

⁵⁰ I fati haisun ngye kwa. Aɗeng ma fari, a yis a ma tot ti ɓur.

⁵¹ I laksu mwawei, shak maɗufal ima mas ro ti findel amen ma wa mot kwa fweng.”

⁵² Unai som Ju si nyus, “A mwashi ni shangi hati rin mafwashi. Ibirai hu som i shit si mwat, unai ha ha ni, ‘Shak maɗufal ima mas ro ti findel amen ma wa mot kwa fweng.’

⁵³ Ha ma ɗingi ha ɓin deeminin Ibirai ani? Yis mot, som i shit hwak si mot. Ha ma ɗingi ha aweya?”

⁵⁴ Yeso humuskyel ti findel ta ni, “Na i ha' haisun ta fit, ha' ti haisun ta fit mii fo i ɗama kwa. Maɗufal ima ma ha'sun fit a Deen, ima hu nyai, ‘A DeeƁwe amu.’

⁵⁵ Hun hu shangus kwa, yin i shangus. Naɗin i ni i shangus kwa, naɗin i te ii ma fyarat fota hun. U mai i shangus i masti aɗeng ima lak.

⁵⁶ Dyou Ibirai jakak fwet nyai naɗin u wis ɗing ti myan amen, yis ɗingi, unai jakak.”

⁵⁷ Unai som Ju si lak Yeso si ni “Ti ha kol will hure hara kwa, ɗak ha nyai ha ɗing Ibirai haa?”

⁵⁸ Yeso nyus, “I ma laksu mwawei, kaciwa' ti si al Ibirai, ai yin na.”

⁵⁹ Myan ima Yeso lak findel mai, unai si haar afyai ɓa si hwyaiyus ti. Unai Yeso fotus, ɗak langus ya ta Wur i DeeƁwe.