Jwon 6 - Findel i DeeƁwe Ti Alis i Ron

Yeso Fa Ɗufal 5,000 Cwa

¹ Takfai ti myan ndyong, Yeso pis Yiir i Galili (Yiir i Tiberyas ndai),

² unai ɗufal hyang si koltifai ames, ɓurti si ɗing ɗama i shok na fo ima ma masti som i mwatan ni.

³ Unai Yeso ɗu tasi afung, te amun ta akul hu fe i ro amesi.

⁴ Myan i Got i Pissihai i Ju yes anggasi.

⁵ Myan ima Yeso ha' shit fit, ɗing ɗufal hyang sin yes kyel ames, lak Filip ni, “Ka wa juwil ti cwa ima u ndok ɗufal mii i ta leya?”

⁶ Yeso lul a ɓurti ɓa u mba Filip kek, ɓurti Yeso tuu shang aɗeng ima ma wa masi ta mulut ames.

⁷ Filip humuskyel ti findel ta ni, “Mwai i ture myarfu' ma wa juwil ti folok ima ma wa ndoksus wisi ndyong ti ndyong kwa.”

⁸ Unai andek ta saa ti fe i ro ames, ma asum Andru, nusus i Siman Pita lak Yeso ni,

⁹ “Al nin mai mati folok hara hu gushe apil. Mii si wa ndok ti ɗufal muhyangi mii haa?”

¹⁰ Yeso lak fe i roi ni, “Lak hun ɗufali si te amun.” Ta kyeli, falan mata hyang, arya ima si te amunan si kol nggal hara.

¹¹ Unai Yeso ha' foloki, kof palang, kaar ɗufal ima si te amuni ngga' ima ndokus ta shak. Masi andi hwak ti gushei.

¹² Takfai tima si cu si kaf, unai lak fe i ro ames ni, “Suɓut hun ngguturai ima si kati, kan hu hon ɓa u rafat kwa.”

¹³ Unai si suɓut ngguturai i foloki si hyai ta cetat hure mulang apil, ii ta folok hara ani ɗufal si cu kat.

¹⁴ Takfai tima ɗufal si ɗing ro i shok na fo ima Yeso masi, si fur nyai, “A aweiyi, a mai mii mashit ima ma yes na naya.”

¹⁵ Yeso yis shang nyai si kin hai ɓa si yes si ha'us ti njeng si fas kaitat, unai si farus wet ɗus tasi anggash hai.

Yeso At si Ham Hai

¹⁶ Ango ti mas, unai fe i ro i Yeso si ɗor wa ta fo i yiir,

¹⁷ kyel ima si lang ta kwang i ham si fur pis ti yiir wa Kapanahum. Mwashi, kyel ti mas maɓing, Yeso tuu yes kwa.

¹⁸ Unai yiiri furus gicik fota wangan ɓurti se manjengi fur ɗafu' ta kyeli.

¹⁹ Takfai ima si tuk kwang i hami i mel ataat ahun a ataat ta ɓwayi ɗak, unai si ɗing Yeso yis muru ta nggas ti kwang i hami, yis ati tasi hami hai, unai fe i ro amesi si mwen fweng.

²⁰ Unai Yeso nyus, “Ayin, kan hu mwen kwa.”

²¹ Unai si ɓwet ɓa si matus ta wii i kwang i hami. Unai abet si ru ta kyel ima si watai.

²² Mwen ti ɓu unai anggum i ɗufal ima si kat ta fit i yiiri si ɗingi nyai, a kwang i ham andek je yis ta kyeli, si ɗingi hwak Yeso lang ta kwang i hami akul hu fe i ro ames kwa, si yus ahwes.

²³ Unai kwangang i ham shini si yes ta Tiberyas, sin mangrai ta kyel ima ɗufal si cu folok ta takfai tima Yeso palang DeeƁwe.

²⁴ Abet suɓut i ɗufali si ɗingi nyai Yeso hu fe i ro ames si ta kyeli kwa, unai si rang ta kwangang i hami wi si wa Kapanahum sin far ti Yeso.

Yeso a Folok Ma Fati Mupwet

²⁵ Ti wisus ta fit i yiiri, si nyus, “A makofti shangi ha yes nati atami ya?”

²⁶ Unai Yeso humuskyel ti findel ni, “I laksu mwawei, hu farsun a ɓurti hu ɗing ɗamam i shok na fo ima i masus kwa, a ɓurti hu cu folok ani hu kafti.

²⁷ Ka hu kin hai si far ti cwa ima rwaat kwa, far hun cwa ima ma fati mupwet i myan hu myan, ima Al i Maɗufal ma wa fasu. Ɓurti a tasi Al i Maɗufal hai DeeƁwe nggwak asum asus i hai, kof nyai, ɓwet aɗeng ima ma masi.”

²⁸ Unai si lulus nyai, “Ni wa masi atini ni mas roha i ma DeeƁwe ma ɓweti ya?”

²⁹ Yeso humuskyel ti findel ni, “Aɗeng ima DeeƁwe ma ɓweti ɓa hu masi a yis nai hu fa mwawei wa kyel i maɗufal ima rous.”

³⁰ Unai si humus luli nyai, “Anggi aɗeng i shok na foi ha wa masi ɓa ni ɗingi ni fa mwawei wa kyel ama ya? Ha wa masti amiya?

³¹ Si deemukan i ɓele si cu mana ta ya, fota ngga' ima si worong ta nyai, ‘Fas folok ta fit ɓa si cu.’”

³² Unai Yeso nyus, “I laksu mwawei, a Mosis fu folok ta fit kwa, a Deen mafayansu folok i mwawei ta fit.

³³ Ɓurti folok i DeeƁwe a yis ima ɗwar ta fit u fa mupwet na naya.”

³⁴ Unai si nyus, “A Dee, nasi mwashi wa wei, Faha nin musut i folok mai.”

³⁵ Unai Yeso lakus ni, “Ayin a folok i mupwet. Maɗufal ima yes kyel amen ma wa muhumkyel ti hwem kwa, maɗufal ima fa mwawei yes kyel amen ma wa muhum halti myaf kwa.

³⁶ Fota ngga' ima i laku ta, hu ɗingun, shak ta andi, hu fa mwawei kwa.

³⁷ Shak ɗamam ima Deen fan si wa yes kyel amen, maɗufal ima yes kyel amen, i wa nggasus ya kwa.

³⁸ I ɗor ta fit ɓa i mas a ɗama i haisun kwa, a ɓurti ɓa i mas a aɗeng ima yis ima rohun.

³⁹ Aɗeng ima yis ima rohun ɓwet ɓa i masi, a yis nai kan i fot andek ya na saa ti shak ɗamam ima fan kwa, a ɓurti ɓa i luktus fit mwen ti dala.

⁴⁰ Ɓurti aɗeng ima Deen ma ɓweti ayis nai, shak maɗufal ima ɗing Ali, fa mwawei si yis hai, mati mupwet i myan hu myan, yin i wa ha'sus fit mwen ti dala.”

⁴¹ Unai som Ju si fur rumung si Yeso hai ɓurti ni, “Ayin a folok ima ɗor ta fit.”

⁴² Si ni, “Ka nyai ahun a Yeso, al i Josep, ima ka shang dees hu nasus wa? Ɗak ami kin mwashi ma nyai, ‘I ɗor ta fit’ ya?”

⁴³ Yeso humuskyel ti findel ta ni, “Hon hun rumung ti ɗiyai amu.

⁴⁴ Ɗeng ndok u yes kyel amen kwa, na yis ima rohun dulus tawe. Yin hwak i wa ha' ti maɗufal fit mwen ti dala.

⁴⁵ Si worong ta kaadaha i som i shit, nyai, ‘A DeeƁwe ma wa kofsus shangi shak.’ Shak maɗufal ima hal Deen, wis shangi ta kyel ames, yes kyel amen.

⁴⁶ Ɗeng tuu ɗing Deehi kwa, yis ima yes ta kyel i DeeƁwe, a yis je ɗing Deehi.

⁴⁷ I laksu mwawei, shak maɗufal ima fa mwawei si yin hai, mati mupwet i myan hu myan.

⁴⁸ Ayin a folok ma fati mupwet.

⁴⁹ Hu deemu i ɓele si cu mana ta ya, shak ta andi, si mwat.

⁵⁰ Folok ima ɗor ta fit mai, shak maɗufal ima cu folok mai ma wa mot kwa.

⁵¹ Ayin a folok i mupwet ima ɗor ta fit. Shak maɗufal ima cu folok mai, ma wa mupwet na i myan hu myan. Mai foloki a lo' amen ima i wa fai ɓurti mupwet i naya.”

⁵² Unai som Ju si lang uɓet manjengi ti ɗiyai ames, nyai, “Maɗufal mai ma wa masi atini u fa lo i lo' ames ka cu ya?”

⁵³ Unai Yeso nyus, “I laksu mwawei, na hu cu lo i lo' i Al i Maɗufal, hu wo wash ames kwa, hu ti mupwet ta wii yuti kwa.

⁵⁴ Shak maɗufal ima cu lo i lo' amen, wo wash amen mati mupwet i myan hu myan, i wa ha'sus fit mwen ti dala.

⁵⁵ Ɓurti lo i lo' amen a cwa mwawei, wash amen a ɗama i woi mwawei.

⁵⁶ Shak maɗufal ima ma cwai ti lo i lo' amen, yis woti wash amen ma wa mupwet na wii yunti, yin ta wii yusti.

⁵⁷ Fota ngga ima Dee mapweti rohun, a ɓursus i mupwet na, angga'i nai hwak maɗufal ima cuun ii fo i cwa ames, ma wa mupwet na ɓursun.

⁵⁸ Ayin a folok ima ɗor ta fit. Si deemu i ɓele si cu mana, si mwat, shak ta andi, maɗufal ima cu mai foloki ma wa mupwet na yes myan hu myan.”

⁵⁹ Yeso lak mii ɗamami shak a myan ima yis kofti shangi ta mare ta Kapanahum.

A Rin Fai Mupwet

⁶⁰ Ti hali andi, hyang ta fe i ro ames si ni, “Mai findeli mati shum, awe ma wa mati ya?”

⁶¹ Ti shangi nyai fe i ro ames si rumung si findel amesi hai, Yeso nyus, “Mai findeli rafatu mulwat ya ani?

⁶² Atini na hu ɗing Al i Maɗufal yis muɗu yis yus wa ta kyel ima yesta ya?

⁶³ A Rin fai mupwet, lo' mati mbaitat i ɗama kwa. Findel ima i laku a Rin hu mupwet.

⁶⁴ Shak ta andi, shini na saa yuti si fa mwawei kwa.” Tasi bya' Yeso shang ima si fa mwawei kwa, hu ima ma wa mengsus.

⁶⁵ Unai Yeso nyus, “Ayis kin i laku nyai, ɗeng ndok u yes kyel amen kwa, na a Dee fas njeng i yes kwa.”

⁶⁶ Takfai tima Yeso lak mai i findeli, unai hyang ta saa ti fe i ro ames, si humuskyel takfai si hatus tifai, si hon koltifai ames.

⁶⁷ Unai Yeso lul ta hure mulang apili ni, “Hu ɓweti hu honun hwak ani?”

⁶⁸ Siman Pita humuskyel ti findel ta ni, “A Deembai, ni wa wa a kyel i we ya? A ha hati findel ma fati mupwet i myan hu myan.

⁶⁹ Nin ni fa mwawei, ni shangi hwak nyai a ha a Masapai i DeeƁwe.”

⁷⁰ Unai Yeso humuskyel ti findel ta ni, “I benu hure mulang apil kwaa? Andek na saa yuti a Shatan.”

⁷¹ (Ma findel si a Judas al i Siman ta ta' ti Iskaryot, ɓurti shak ta ngga' ima ma andek ta saa ti hure mulang apili ayis ma wa juwilsus ya.)