Jwon 4 - Findel i DeeƁwe Ti Alis i Ron

Yeso hu Mbor Nin ta Samarya

¹ Farisiyawa si hali nyai, Yeso ma wis ti fe i ro ames yis masus batisma hyang si ɓin i Jwon.

² (Ai a Yeso yis masti batismai ti haisus kwa, a fe i ro ames.)

³ Myan ima Deembai wis shangi nyai Farisiyawa si hali, unai hon Judya humuskyel ta Galili.

⁴ Tyos hai kpang ɓa u sata Samarya.

⁵ Unai ru ta nin ashwai ta Samarya ima si lai i Saikar, ta nggas ti kyel ima ai Jakop fa al ames Josep hweer.

⁶ Hum i ham manggyongi i Jakop mata kyeli. Myan ima kyel ti han Yeso ti ɗa'at, unai tyos amun ta foi humi. Aɗeng mai fur asai ren.

⁷ Unai mbor nin al ti Samarya ti wa nang ti ham, unai Yeso nyut, “Fashina ham ta ɓa i wo.”

⁸ (Som koltifai ames ai si lang ta wii i ashwai ɓa si juwil cwa.)

⁹ Unai moti Samarya ti lak Yesoi ti ni, “Ami kin ha maɗufal i Ju ha lul ti ham i woi na kyel amen, yin mbor ti Samarya ya?” (Ɓurti ɗama fwat som Ju hu Samarya kwa.)

¹⁰ Unai Yeso humut kyel ti findel ni, “Naɗin shi shang mal i DeeƁwe, hu maɗufal ima ma nyai shush, ‘Fashina ham i wo,’ naɗin shi yus wa fwali yis ma wa fashush ham i mupwet.”

¹¹ Unai mbori ti nyus, “A Dee, hati ɗam i nang ti ham kwa humi kinggyong. Ha wa wisti ham i mupwet aleya?

¹² Ha ha ɓin deeminin Jakop ima hon nin hum i woti ham na, yis haisus wo na hu fe ames hu sufat ames haa?”

¹³ Yeso humut kyel ti findel ta, ni, “Shak maɗufal ima wo ham mai ma wa muhum halti myaf hwak.

¹⁴ Shak maɗufal ima wo ham ima i fas ma wa muhum halti myaf kwa fweng. Ham ima i fasi ma wa mute i ham, yis ɓwirikya fati mupwet i myan hu myan.”

¹⁵ Unai mbori ti nyus, “A Dee, Faha na ham ani, ɓurti ka i hum halti myaf kwa, ɓurti kan i hum yes nang ti ham nanati kwa.”

¹⁶ Unai Yeso nyut, “Ɓwish shi lai re amesh hu yes nanati akul.”

¹⁷ Unai ti humuskyel ti findel ta tini, “I ti re kwa.” Unai Yeso nyut, “Shi lak mwawei, ima shini shiti re kwa,

¹⁸ ɓurti mwawei ayis nai, shi kunggo arya hara, ima hu akul mwashi a re amesh kwa. Aɗeng ima shi lak mwashi i mwawei!”

¹⁹ Unai mbori ti nyus, “A Dee, i ɗingi ha a mashit.

²⁰ Hu Demukan i ɓele si fwal DeeƁwe nasi afung mai, ɗak hun Ju hu ni a ta Yerushalima ɗat ka fwal DeeƁwe ta.”

²¹ Unai Yeso humut kyel ti findel ta ni, “A mbor, fashi mwawei, si aɗeng ima i laki, myan ma yes ima ɗufal si wa fwal ti Dee nasi afung mai, hu i Yerushalima kwa.

²² Hun ɗufal i Samarya hu fwal ti aɗeng ima hu shangi kwa, nin, ni shang aɗeng ima ni fwali, ɓurti abum yes ii ta kyel i som Ju.

²³ Myan si yes, u mai ti si yes, ima som i fwal i mwawei si wa fwal ti Deembai saa ti Rin hu mwawei, ɓurti a sin a musut i som i fwal i mwawei ima Deembai ma fari.

²⁴ DeeƁwe a Rin, som i fwalsus a kpang si fwalsus ta saa ti Rin hu mwawei.”

²⁵ Unai mbori ti ni, “I shangi Kristi ma yes ima si nitus a Kristi. Na yes ma wa piris sikan ɗamam shak.”

²⁶ Unai Yeso nyut, “Yin ima i findel ti shish mai, ayin ima ii yisyi.”

Fe i Ro si Hum Kyel

²⁷ Tasi myan ima sin hai findel ndai, unai fe i roi si hum kyel, si shok na fwai ti ɗingsus yis findel hu mumbori, ɗeng ames wis njeng ɓa u lul nyai, “Ami shi ɓweti ya,” ahun u lulu nyai, “Ami kin ha findel ti yit ya?” kwa.

²⁸ Unai mbori ti hon ɗya amet ta kyeli ti wa ta wii i ashwai ti lak ɗufal ti ni,

²⁹ “Yehun, hu ɗing maɗufal ima lakun shak ɗamam ima i masi! Ahun ayis mii Kristi ya?”

³⁰ Unai ɗufal si rangya ta ashwai si ka' fisel wa kyel ames.

³¹ Saa ti andi, fe i ro ames si nyus, “Makofti shangi, cwa ɗama.”

³² Unai nyus, “I mati cwa nin ima i wa cwai, ima hu shang ɗama ii hai kwa.”

³³ Unai fe i ro amesi si lul ta ɗiyai nyai, “Ahun ɗeng kolus cwa ya?”

³⁴ Unai Yeso ni, “Cwa amen ayis nai, i mas aɗeng ima mata mulut i yis ima rohun, i mbit ro ames.

³⁵ I ni ahun hu ni, ‘Kat ture ɓaras ɓa myan i karat ti cwa u mas wa?’ I laksu ha' hun shit fit hu ɗing yangang ndere, ti si nung, si ndok karati.

³⁶ Ma karati ma wisti mwat ames, mwashi ma karat ti macwa i mupwet i myan hu myan, ɓurti ɓa ma layi hu ma karati si pipel na mulut akul.

³⁷ Na kyel mai, laki nyai, ‘Ɗeng lai ɗeng karat’ a mwawei.

³⁸ I ro hu ɓa hu karat aɗeng i ma wa' hu mas ro i hai. Shini si mas rai, ɗak hun hu cwai ti mwat i shum amesi.”

Ɗufal Hyang ta Samarya si Fa Mwawei

³⁹ Ɗufal hyang ta ashwa ti Samarya, si fa mwawei ɓurti findel ima mbori ti lak nyai, “Lakun shak ɗamam ima i masi.”

⁴⁰ Myan ima ɗufal i Samaryai si yes kyel i Yeso, si fwalus ɓa u te ta akul hu sin, unai mas mukon apil ta ashwai.

⁴¹ Ɗufal hyang si fa mwawei ɓurti findel i Yeso.

⁴² Unai ɗufal i Samaryai si lak mbori si ni, “Mwashi ni fa mwawei a ɓurti aɗengi ma shi lak kek kwa, a ɓurti nin hwak ni hali ti haisinin, ni shangi awei nyai, maɗufal mai a Mabum i naya.”

Yeso Fa Al i Mbai Nin Cala

⁴³ Takfai ti mukon apili, Yeso lang ta Samarya ka' fisel wa Galili.

⁴⁴ (Ai Yeso ti haisus tuu lak nyai, “Si ɗyang mashit ti ɗat ta ashwa ames kwa.”)

⁴⁵ Myan ima ru ta Galili, unai ɗufal i Galili si matus ra apil, ɓurti sin hwak ai si wa Got i Pissihai ta Yerushalima, ta kyeli si ɗing shak ɗamam ima Yeso masi.

⁴⁶ Unai Yeso hum wa ta Kana ta Galili, kyel ima ai hat ti ham ii ham i manggɓu'. Ta kyeli maɗufal nin yis ta maro ta wur i makai, ima al ames ta Kapanahum yis ti cala kwa.

⁴⁷ Myan ima hali nyai Yeso hon Judya, hum kyel ta Galili, unai wa kyel ames fwalus ɓa u wa u fa al ames cala, ɓurti mayus ta foi mot.

⁴⁸ Unai Yeso nyus, “Na hu ɗing ɗamam i shok na fo kwa, hu wa fati mwawei kwa fweng.”

⁴⁹ Unai maro ta wur i makaii lak Yeso ni, “A Deembai, ndakun ta akul kandok al amen motus.”

⁵⁰ Yeso nyus, “Ha ya wa. Al ama ma wa mupwet.” Maɗufali fa mwawei si aɗeng ima Yeso lakus, unai ka' fisel wis.

⁵¹ Yis ta fisel wa wur ndai, unai yarai ames si wisus si nyus, “Al amai pwetus.”

⁵² Unai lulus myan ima fur wis ti calai, si nyus, “Akon shitam andek ti ren mwatan i nzami akus ii ra.”

⁵³ Unai dees i ali mbe' nyai a si myani kiga' Yeso nyus, “Al ama ma wa mupwet.” Unai maɗufali hu shak wur ames si fa mwawei wa kyel i Yeso.

⁵⁴ A ɗama i shok na fo mapil ima Yeso masi takfai tima hon Judya wa Galili.