Jwon 21 - Findel i DeeƁwe Ti Alis i Ron

Yeso Pwak Fe Muro Ames Pyoron Hai

¹ Takfai ti mai, Yeso hum pwak ti som koltifai ames hai hwak ta foi Yiir i Galili. Ngga' ima aɗengi wa ta mai.

² Siman Pita ai yis ta kyeli, sin hu Toma (ima laiyus ii njan), hu Natanyel ta ta' ti Kana i Galili, hu fe Zebedi, hu som koltifai ames apil.

³ Siman Pita nyus, “I wa gong ti gushe.” Shak asussi si ni, “Nin hwak ni wa kolfai asai.” Unai si rangya, si wa si rang ta kwang i gong ti gushe wi, si mas ham si mas ashai yes mwen ti ɓwai si ka' ɗama kwa fweng.

⁴ Tamwen wititit, Yeso te mangra ta foi ham, shak ta andi som koltifai ames si shangus kwa.

⁵ Yeso nyus, “A shunun, hu ka' gushe nin kwani?” Sin si humtikyel si nyus, “Wayou a dee.”

⁶ Yeso lakus ni, “Hwi hun ti takal i gong ti gushei ta rai ucwa i kwangi, hu wa ka'ti gushe.” Unai si hwiti ta, ta myani si mba dul ti takali wet, ɓurti gushe ima si ka'i yi ma hyang.

⁷ Unai yis makoltifai ima Yeso ɓwetus lak Pita ni, “A Deembai, ɗingai!” Myan ima Siman Pita hali a Deembai, unai ru' fagin asus, (ɓurti ai mbwet ya), jik ta hami wi.

⁸ Anggum i som koltifaiyi si yes ti kwangi, si dul takali ta male' i gushei ta wii. Ɓurti si mati maleng ta foi hami kwa, malengi kol teleng i sai ndik andek.

⁹ Myan ima si rangya ta wii hami, si ɗing man i mangyesh ta takyeli, ima si pang gushe i hai, ta foloki.

¹⁰ Yeso lakus nyus, “Kol huna shini gushe ima hu ka'i mwashi.”

¹¹ Unai Siman Pita wa ɗu ta kwangi wi dul takal i gong ti gushe ta fisha. Hya ti male' mbayai i gushe, si kol ndik andek ta hure hara tau taati (153). Shak ta andiyi takali gwyak kwa.

¹² Yeso nyus, “Yehun ka ɓu fo ya.” Myan mai ɗeng ta saa ti som koltifai yi wis peng ɓa u lulus nyai, “Ha aweya?” Si shangi a Deembai.

¹³ Yeso yes zan foloki ta gushei fas.

¹⁴ Mwashi a myan mataat mai ima Yeso kof haisus wa kyel som koltifai ames takfai ti muluk fit ames ta fiyai wi.

Yeso hu Pita

¹⁵ Myan ima si mbit ɓwai ti fo ya, Yeso lak Siman Pita ni, “Siman, al i Jwon, hu ɓwetun ɓin hati haa?” Yis Pita ni, “Hei, Deembai ha ha shangi i ɓwetsa.” Yeso nyus, “Faha fe tutwai amen mii cwa.”

¹⁶ Yeso hum laksus mapil nyai, “Siman, al i Jwon, ha ɓwetsun ti mwawei haa?” Pita ni, “Hei Deembai ha ha shangi i ɓwetsa.” Yeso nyus, “Ɗinga na tutwai amen.”

¹⁷ Yeso hum laksus mataat ni, “Siman, al i Jwon, hama ɓwetsun haa?” Pita mulut ti hanus ta ɓurti Yeso lakus a mataat ndai, “Ha ma ɓwetsun haa?” Pita lakus ni, “Deembai ha ha shang ɗamam shak. Ha ha shangi i ɓwetsa.” Yeso nyus, “Fa tutwai amen cwa.

¹⁸ Ti mwawei ima lak sa ndai, myan ima ha ɗiri i zanlang, ha mana ti ru' ti arom ti haisa ha at wa kikyal ima ha ma ɓweti. Ɓurti andi, myan ima ha kaya, ha wa ti' ti ra a ɗeng ma wa ru' sa arom u zana u kola ta kyel ima ha ɓweti wa kwa.”

¹⁹ Lak mai a ɓurti ɓa u kof musut i mot ima Pita ma wa masi, ɓurti fati DeeƁwe ngye. Takfai tima Yeso mbit laksus mai, nyus, “Kolafai a suni.”

Yeso hu Al Mamuro ima Ma ɓwetsus

²⁰ Pita hatat tifai ɗing makoltifai ima Yeso ma ɓwetsus yis koltifai ames. Ayis ima ai rak Yeso hai ta fagin ta kyel i cwai ti cwa, lul lus nyus, “A Deembai, awe ma wa cwai ti kwinik ama yaa?”

²¹ Myani Pita ɗingus fo, lak Yeso nyus, “A Deembai, mai maɗufali hee?”

²² Yeso lakus nyus, “Na i ni ɓa u tena ti mupwet yes myan ima iwa muhumkyel, ami amu ta ya? Ha Kolafai a suni!”

²³ Ɓurti andi, findel mai at saa ti shunus nyai makoltifai mai nan ma wa mot kwa. Shak ta andiyi Yeso lak andi kwa. Aɗeng ima lak mai ni, “Na i ni ɓa u tena ti mupwet yes myan ima iwa muhumkyel, ami amu ta ya?”

²⁴ Mai a makoltifai ima yis ɗing ɗamam mii, a yis worong ɗamami. Kan hwak ka shangi findel ames a mwawei.

²⁵ Yeso mas ɗamam hyang hwak. Na si ni ɓa si worong shak ɗamami, ima ɗingi shak naya moti ti wa wisti ɗom ima ti kin kaadaha ima ai sin wa worongi kwa.