Jwon 18 - Findel i DeeƁwe Ti Alis i Ron

Si Ka' Yeso

¹ Takfai tima Yeso mbit fwal mai, unai lang ya akul hu fe i ro ames si pis ɗara i Kidron. Yang nin ti mata fit i ɗarai, unai lang ta yangi, yis hu fe i ro ames.

² Judas, ima juwilus ya, shang kyeli ɓurti Yeso mana shwayan ta kyeli hu fe i ro ames.

³ Unai Judas zan som i ɓwol hu som ɗing ti Wur i DeeƁwe ta ima mbayai i kocokak hu Farisiyawa si tukus, si wa ta yangi, sin ta mukofaffi, ta yitat ima si ti manan, sin ta ɗamam i ɓwoli.

⁴ Yeso shang shak aɗeng ima ma wa wisus, her ta wei lulus ni, “Awe hu fari ya?”

⁵ Si matussi si ni, “A Yeso i Nazaret.” Yeso nyus, “Ayin mai.” Judas hwak, Ma cwai ti kwinik yis mangra ta kyeli akul hu sin.

⁶ Myani Yeso ni, “Ayin a yis,” si her takfai si fwar ta fisha.

⁷ Unai hum lulsus ni, “Awe hu fari ya?” Si ni, “A Yeso i Nazaret.”

⁸ Yeso matussi ni “I laku wa, ayin a yis wa, na ayin hu fari, hon hun mii si wis.”

⁹ Mai fur fisha a ɓurti ɓa findel ima ai lak u hya, “Ta si ima ha fan i hwiti andek niin ya kwa.”

¹⁰ Unai Siman Pita, ima mati awal, warat ta fatal tel ti yere i mbai makocok ya, fet mwal ti ra i ucwa ya. Asum i yerei a Malkus.

¹¹ Yeso lak Pita ɓin, “Hu mati awali ta fatal wi! I wa woi ta cunjo tima Deen fan ɓa i wo kwa waak?”

Yeso ta Wei i Annas

¹² Unai suɓut i som ɓwol hu mbai i som ɓwoli, hu fe muroha i som Ju si ka' Yeso, si no'us.

¹³ Ti bya' si kolus ta kyel Anas, yis a wash i Kayafas, ima a yis mii mbai makocok ta wili.

¹⁴ Kayafas a yis mas som Ju findel i taɓak nyai, ɗat ɓa si ni maɗufal andek u mot ɓurti ɗufal.

Ɓwingil i Pita i Bya'

¹⁵ Unai Siman Pita hu niin ta saa ti fe i roi, si kolfai ti Yeso ta maleng. Maro mai si mashang hu mbai makocoki unai lang ta wur i makocoki akul hu Yeso.

¹⁶ Pita te mangra ta fo i mahom ta saikyel. Mandek i maro ima si mashang hu mbai makocoki, lang ya findel hu yamwan tima ti ta fo ro amet si lang ti Pita ta.

¹⁷ Yamwan tima ti ta fo i mahomi ti lul Pita ti ni “Hama andek ta saa ti fe i ro i maɗufal mai, ahun andi kwa ya?” Yis humut ti kyel ni, “Wawa' i ta saa yusti kwa.”

¹⁸ Ɓurti kyel ti tiɗya, unai yarai hu som ɗing ti kyel ta si tut man i hali, sin ta mangrai, sin hal ti mani. Pita hwak yis mangra ta kyeli akul hu sin, yis hal ti mani.

Mbai Makocok Lul Yeso Fo

¹⁹ Unai mbai makocok lul Yeso fo tasi mangga' i fe i ro ames hu mangga' i kofiti ames.

²⁰ Yeso matussi ni, “I nyai i findel na wei i ɗufal wi shak wa, i wo yin kofiti na mareha hu Wur i DeeƁwe, shak kikyal ima som Ju si suɓut ta. I lak ɗama i mufot kwa.

²¹ A ɓurti mi hama yun mulul fo ya? Lula ta som ima si halun tasi aɗeng ima i lakus, si shang aɗeng ima i lak.”

²² Myan ima Yeso lak mai, andek ta saa ti yarai ima sima mangrai nggas ti Yeso pas ta kapak, lak ni, “Angga ima ha wa mati mbai makocok ta nai haa?”

²³ Yeso matussi ni, “Na i lak ɗama ndere kwa, lakana kyel ima i leliya ta. Na i lak mwawei, ami kin ha pan ya?”

²⁴ Unai Anas tuk tus ta mano' wi wa kyel i Kayafas mbai makocok.

Ɓwingil i Pita Mapil hu Mataat

²⁵ Siman Pita yis mangra yis halti man, unai si lakus si ni, “Ka nyai, ha hwak ha ma andek ta saa ti fe i ro ames, ahun andi kwa ya?” Ɓwingil ni, “Wawa' ayin kwa.”

²⁶ Nin ta saa ti yarai i mbai makocoki, a gung i maɗufal ima Pita fetus mwal ya, lak ni, “Ka nyai a ha i ɗinga akul hu yis ta yang, andi kwa?”

²⁷ Pita hum ɓwingil i hai, tasi myan ani korong tulol.

Yeso ta Wei i Pailet

²⁸ Som i Ju si ɗik zan ti Yeso ta kyel i Kayafas wa ta wur i makai i Rom. Ɓurti si ɓweti si te ti sapai i cwai ti folok i Pissihai, unai si nggwes i mulang ta wuri.

²⁹ Unai Pailet lang ya lulus ni, “Maɗufal mai masu ami ima hu yes tu nati ya?”

³⁰ Si nyai, “Naɗin yis ti mafwashi kwa, naɗin ni yes tus na kyel ama kwa.”

³¹ Unai Pailet ni, “Zan hun yus hu totus ɓur ta ngga' ima anggut amu lak ta.” Som i Ju si ni, “Ni ndok ni lef ɗeng ɓur hai kwa.”

³² Te andi a ɓurti findel ima Yeso lak ɓa u hya, myan ima lak ngga' ima ma wa mot ta.

³³ Unai Pailet lai Yeso ta wi wur lulus ni, “A ha a makai i Ju ani?”

³⁴ Yeso lulus ni, “A ambe' ama, ahun a ɗeng laka waak?”

³⁵ Pailet ni, “Yin a maɗufal i Ju ani? A ɗufal amu hu mbayai i kocokak amu si kola na kyel amen. Ami ha masi ya?”

³⁶ Yeso ni, “Kaitat asun a ti naya moti kwa, naɗin a ti naya moti, na som koltifai asuni si ɓin, si fwangun ya ta ra i Ju. Ɓurti andi kaitat amen ii nati kwa?”

³⁷ Pailet ni, “Unai a ha a makai ani?” Yeso ni, “A ha ha ni, yin a makai. Aɗeng ima kin si alun nai, a aɗeng ima kin i yes na naya nai, ɓa i lak mwawei. Shak maɗufal ima mati mwawei u halun.”

³⁸ Pailet ni, “Ami a mwawei ya?” Unai lang ya i hai ta kyel i som Ju ni, “I wisus ti mafwashi nin kwa.

³⁹ Ɓurti a aɗeng ima hu ɓyati ɓa i waku maɗufal andek i ra ta mano', myan ima hun wa Got i Pissihai. Hu ɓweti i waku ‘Makai i Ju’ i ra haa?”

⁴⁰ Si mat rafo si ni, “Wayou, a yis kwa! Faha nin Barabas!” Barabas ai yis ta saa ti som i ɓin ani.