Jwon 16 - Findel i DeeƁwe Ti Alis i Ron

¹ “I laku mii ɗamami shak, ɓurti kan hu ndok hu fur.

² Si wa re'su ya ta mare. I ma laksu, myan ma yes ima na ɗeng foru, ma wa zani nyai, ma cwai ti DeeƁwe afut.

³ Si wa masi andi ɓurti si shang Dee kwa, si shangun kwa hwak.

⁴ I lak mii ɗamami, ɓurti na myan si mas hu mbe' nyai i laku. I laku ɗamam mi ti bya' kwa, ɓurti i ma akul hu hun.

Ro i Rin Masapai

⁵ “Mwashi i yun wa kyel i yis ima rohun, shak ta andi na saa yuti ɗeng lulun nyai, ‘ha wa a leya?’ kwa.

⁶ A ɓurti i laku mii ɗamami, unai hu kikyau na mulut.

⁷ Ɓurti andi i laksu mwawei, ma wa ɓin su ɗat ima i yun wa, ɓurti na i win kwa, Mataɓaki ma wa yes kyel amu kwa. Na i win i wa rosus ta kyel amu.

⁸ Myan ima yes, ma wa ɓor ti mafwashi i naya ya, ta mute manderei, ta lefti ɓuri ya hwak.

⁹ Tasi mangga' i mafwashi, ɓurti ɗufal si fa mwawei si yin hai kwa.

¹⁰ Tasi mangga' i mute manderei, ɓurti i wa kyel i Dee, hu wa muhum ɗingsun kwa.

¹¹ Tasi mangga' i lefti ɓur ya, ɓurti si lef makaitat i naya moti ɓur ya.

¹² “I ti anggum i ɗamam hyang ima i wa laksu, hu wa ndok ti zansus mwashi kwa.

¹³ Myan ima Rin i mwawei yes, ma wa dulsu nzong tasi shak mwawei. Ma wa findel ɓurti haisus kwa, aɗeng ima hali, a yis ma wa laki, ma wa laksu shak ɗamam ima si wa yes.

¹⁴ Ma wa fasun ngye, shak aɗeng ima mii amen ma wa laksu.

¹⁵ Shak aɗeng ima Dee mati amen. Ayis nai kin ini, Rini ma wa mati aɗeng ima mii amen u laku.

Shaat Ma Wa Muhumkyel ii Jakak

¹⁶ “Takfai ti myan ndyong, hu wa ɗingsun kwa. Takfai ti myan ndyong hu wa muhum ɗingsun.”

¹⁷ Unai shini ta saa ti fe i ro ames si lak ɗiyai nyai, “Ami mii, ‘Takfai ti myan ndyong hu wa ɗingsun kwa. Takfai ti myan ndyong hu wa muhum ɗingsun,’ hu nyai ‘Ɓurti i wa kyel i Dee’ ya?”

¹⁸ Si hum nyai, “Ami mii ‘Takfai ti myan ndyong’ ya? Ni shang aɗeng ima ma laki kwa.”

¹⁹ Yeso shangi sima ɓweti ɓa si lulus, unai nyus “Unai hu ma luli ta ɗiyai aɗeng ima mii ‘Takfai ti myan ndyong, hu wa ɗingsun kwa. Takfai ti myan ndyong hu wa muhum ɗingsun haa?’ ”

²⁰ I ma laksu mwawei, hu wa kawa ta shaati ɓursun, naya ti wa pipelat na mulut. Hu wa kikyawat na mulut, kikyawat na mulut amu ma wa muhumkyel ii pipelat na mulut.

²¹ Na ɗar i al ka mbor tiwa woti shum, ɓurti myan i al amet mas. Na ti gung ti al, ti hwam mbe' ti shum ima ti wo kwa, ɓurti jakak ima si wis mwalmwat na naya.

²² Andi hun hwak, hu mati kikyawat na mulut mwashi. Myan ima i hum ɗingsu hu wa jakak, ɗeng mayu wa zan ti jakak amu ya kwa.

²³ Mwen amoti hu yun wa lul ti lul nin kwa. I ma laksu mwawei, shak aɗeng ima hu fwal ta kyel i Deen ma wa fasu ɓurti asum amen.

²⁴ Yes mwashi, hu fwal ɗama nin ti asum amen kwa. Fwal hun Deen, hu wa wisi ɓurti jakak amu u hya.

I Cu Uges ti Naya

²⁵ “I lakansu ɗamam ti kaani. Myan ma yes i wa muhum laksu ɗamam ti kaani kwa, i wa fasu a jam i Dee rasman.

²⁶ Mwen andi hu wa fwal ti asum amen. A hun hu wa fwal ti Dee ti haisu, ayin i wa fwal ɓursu kwa.

²⁷ Yis Dee ti haisus ma ɓwetsu, ɓurti hu ɓwetun. Hu fa mwawei hwak i pwak ya ii ta kyel i Dee.

²⁸ I pwak ya i ta kyel i Dee, i lang na naya. A mwashi i wa honti naya i hum kyel ta kyel i Dee.”

²⁹ Unai fe i ro ames si ni, “You! A mwashi hama findel rasman, ati kaani kwa.

³⁰ A mwashi ni shangi ha shang ɗamam shak, ɗeng maya wa mulul i fo kwa. Ati andi ni shangi ha yes ii kyel i DeeƁwe.”

³¹ Yeso matusi ni, “A mwashi hu fa mwawei!

³² Myan ma yes, tuu ru, ima si tu wa ɓaasan. Hu wa tital wa wurai amu, hu honun ahweni. Shak ta andi, ayin andek kwa, ɓurti Dee ma akul hu yin.

³³ “I laku ɗamam mii, a ɓurti na kyel amen hu wis murak i mulut. Na naya hu wa wis ti amba. Shak ta andi ka' hun mulut, i cu uges ti naya.”