Jwon 15 - Findel i DeeƁwe Ti Alis i Ron

Yit i Manggɓu' hu Rai

¹ Ayin ayit i manggɓu' mwawei, Deen a maro ta yangi.

² Ayis lyaf ra ima mana wi yunti ya ima al kwa. Shak ra ima al fe a yis nai pyar ya, ɓa u hum al hyang.

³ Mwashi si pyaru ya ndai hu mati sapa, ɓurti findel ima i laku.

⁴ Tehun na wii yunti, yin hwak i te ta wii yuti. Fota ngga' ima ra i yit ma wa al ahwes kwa, a kpak u te ta lo' i yiti, angga'i nai, hun hwak hu wa masti ɗama maɗesi nin kaciwa' yin kwa, a kpak hu tena wii yunti.

⁵ “Ayin ayit i manggɓu', a hun humi rai. Na maɗufal tena wii yunti yin hwak ta wii yusti, a yis ma wa al ti fe hyang. Ɓurti na wa' yin kwa, hu wa masti ɗama kwa fweng.

⁶ Shak maɗufal ima wa' tena wii yunti, yis ma fota ra i yit ima si hwiti ya shokus. Musut ti ra mai si zan si hwiti ya ta wii man si nyesh ya.

⁷ Na hu tena wii yunti findel amen hwak yis ta wii yuti, shak aɗeng ima hu ɓweti na hu lul, hu wa mati.

⁸ Angga' ima Deen wyas ngye ta nai, ɓa hu mas musut i ɗamam maɗesani hyang, hu kof hihai amu hun a fe i ro amen.

⁹ “Fota ngga' ima Deen ɓwetun, andi yin hwak i ɓwetu ta. Tehun na wii matɓwet amen.

¹⁰ Na hu hal findel amen, hu wa mute na wii i matɓwet amen, fota ngga' ima i hal findel i Deen ta, i te ta wii i matɓwet ames.

¹¹ I laku mai, ɓurti jakak amen u te ta wii yuti, jakak amu hwak u hya.

¹² Hal hun findel amen! Ɓwet hun ɗiyai fota ngga' ima i ɓwetu ta.

¹³ Anggi ɓweti tima ti ɓin moti ya? Ɓa si ni maɗufal u fa mupwet asus ɓurti myayus.

¹⁴ Hun a myayun, na hu mas aɗeng ima i laku.

¹⁵ I wa muhum laisu ii yarai kwa, ɓurti yere shang aɗeng ima mawur ames ma masi kwa. Yin i laiyu ii myayun, ɓurti shak aɗeng ima i hali ta kyel i Deen, a yis i laku.

¹⁶ A hun hu benun kwa, ayin i benu. I kinu ɓa hu wa hu mas ɗamam maɗesi ima ma wa mute ii myan hu myan. Ayis nai, Deen ma wa fasu shak aɗeng ima hu lul ti asum amen.

¹⁷ Hal hun findel amen! Ɓwet hun ɗiyai.”

Naya Ti Wa Munggwe tu

¹⁸ “Na naya ti nggwetu, shang huni, ti nggwetun ɗak ti nggwetu.

¹⁹ Naɗin hun ii naya, naɗin naya ti wa ɓwet ɗama amet. Shak ta andi, hun ii naya kwa, ɓurti ayin i benu ya na naya. Ayis nai naya ti nggwetu.

²⁰ Mbe' hun findel ima i laku nyai, ‘Yere ɓyan dee mawur ames kwa.’ Na si burukun, hun hwak si wa buruksu. Na si hal findel amen, si wa hal ti amu hwak.

²¹ Si wa masui andi ɓurti asum amen, ɓurti si shang DeeƁwe ima rohun kwa.

²² Naɗin i yes i findelus kwa, naɗin sin ti mafwashi kwa. Mwashi si mati foi findel ta si mafwashani ames hai kwa.

²³ Maɗufal ima nggwetun nggwes ti Deen hwak.

²⁴ Naɗin wa' i mas roha mii na saa yusti ima wa' ɗeng masi kwa, naɗin sin ti mafwashi kwa. Mwashi si ɗing ɗamam i lum na fo ya, shak ta andi si nggwetun. Si nggwes ti Deen hwak.

²⁵ Shak ɗamam mii a ɓurti ɓa si hya findel ima si worong ta anggut ames hai nyai, ‘Si nggwetun andi kyek sik.’

²⁶ “Myan ima Mataɓak ma yes, yis Rin i mwawei, ima i wa tuksui, ii ta kyel i Dee, a yis ma wa laksu shak ɗamam si yin hai.

²⁷ Hun hwak a kpak hu lak aɗeng ima hu shangi, ɓurti hu ma akul hu yin tasi bya'.