Jwon 14 - Findel i DeeƁwe Ti Alis i Ron

Yeso Fisel ti Wa Kyel i DeeƁwe

¹ “Ka hu hon mulwat amu si tirim kwa. Fahun mulut si DeeƁwe, fahun mulut si yin hwak.

² Ta wur i Deen ɗwam si ta hyang. Naɗin andi kwa, naɗin i laku. I wa ta te'i ɓa i ɗaku ti kyel ta.

³ Na i wa i ɗak ti kyel ta, i wa yes ti haisun i kolu ta kyeli, ɓurti kyel ima yin i mata, hun hwak ɓa hu te ta kyeli.

⁴ Hu shang fisel ti wa kyel ima i ma wa ta.”

⁵ Unai Toma lakus ni, “A Deembai, ni shang kyel ima ha wa ta kwa. Atini ni wa shang ti fiseli ya?”

⁶ Yeso matussi ni, “Ayin a fiseli, ayin a mwawei, ayin a mupwet. Ɗeng ma wa kyel i Dee kaciwa' sa na kyel amen kwa.

⁷ Naɗin hu shangun ndere, naɗin hu shang Deen hwak. Nasi mwashi hu shangus, hu ɗingus hwak.”

⁸ Unai Filip ni, “A Deembai, kofa nin ti Deehi, myatat asinin tima tal.”

⁹ Yeso humus ti kyel ni, “A Filip, hal mwashi ha shangun kwa ha, ta male' mute ima i masi na saa yuti mai haa? Shak maɗufal ima ɗingun, ɗing Dee dai. Atini ha ni, ‘Kofa nin ti Deehi ya?’

¹⁰ Ha fa mwawei nyai yin ima ta wii i Dee, Dee hwak mana wii yunti kwani? Findelal ima i laksa mii, amen kwa. A findelal i Dee ima mana wii yunti ma masti ro ames.

¹¹ Faha mwawei si yin hai i mata wii i Dee, Dee hwak mana wii yunti. Na andi kwa, Faha mwawei nasi ɗamam ima i masus.

¹² I ma laksu mwawei, shak maɗufal ima fa mwawei na hai yunti ma wa masti ɗamam ima i wo yin masus. Ma wa masti mbayai i ɗamam ima si ɓin mii, ɓurti i wa kyel i Dee.

¹³ I wa masti ɗamam ima hu fwal ti asum amen, ɓurti Al u yes ti ngye wa kyel i Dee.

¹⁴ Hu wa lul ti shak ɗamam ti asum amen, yin i wa masi.

Kintiɓwi Rin Masapai Ma Yes

¹⁵ “Na hu ɓwetun, hu wa hal ti aɗeng ima i laku.

¹⁶ Yin i wa fwal ti Dee, yis ma wa fasu nin Mataɓaki ɓa u te akul si hun myan hu myan.

¹⁷ Yis Mataɓak mai a Rin i mwawei. Naya ti wa matsus kwa, ɓurti ti ti shit tima ɓa ti ɗingus ti kwa, ahun ti ni ti shangus. Shak ta andi, hun hu shangus, ɓurti yis te akul hu hun, ma wa mute ta wii yuti.

¹⁸ I wa honsu fota mushiya kwa, i wa yes kyel amu.

¹⁹ Myan si kat ndyong, naya ti wa muhum ɗingsun kwa fweng, hun hu wa ɗingsun. Ɓurti i mana ti mupwet, hun hwak hu wa mute ti mupwet.

²⁰ Mwen andi hu wa shangi nyai yin ima ta wii i Dee, hun huna wii yunti, yin hwak i mata wii yuti.

²¹ Shak maɗufal ima mat findel amen ɗak masti ro, a yis mi maɗufal ima ɓwetun. Maɗufal ima ɓwetun, Deen ma wa ɓwetsus, yin hwak i wa ɓwetsus i kofus haisun.”

²² Unai Judas (a Judas i ta' ti Iskaryot kwa) ni, “Unai, a Deembai, a ɓurti mi ha kof sinin haisa, ha nggwya ti naya ya?”

²³ Yeso humustikyel ni, “Shak maɗufal ima ɓwetun, ma wa hal ti findel amen. Deen ma wa ɓwetsus, ni wa yes kyel i maɗufali ni hatus i wur aminin akul hu yis.

²⁴ Maɗufal ima ɓwetun kwa ma wa hal ti findel ima i laki kwa. Findelal ima ha halsus mii amen kwa, ii Deen ima rohun.

²⁵ “I lak findelal mii shak yin ɗiri akul hu hun.

²⁶ Shak ta andi, Deen ma wa tuksu Mataɓaki, Rin Masapai ti asum amen, a yis ma wa kofsu shak ɗamam u kinu hu mbe' shak ɗamam ima i laku.

²⁷ I honsu ti murak i mulut. Murak i mulut amen i fu. Murak i mulut mai naya ti ndok ti fu kwa. Ka hu hon mulwat amu si tirim kwa, kan hu mwen kwa.

²⁸ “Hu halun i ni, ‘I ma yun wa, i wa muhumkyel na kyel amu.’ Na hu ɓwetun, hu jakak ɓurti i wa kyel i Dee, ɓurti Dee ɓinun yin mbaitat.

²⁹ I laku ndai kaciwa' ɗama fur fisha, ɓurti myan ima ɗama fur fisha hu fa mwawei.

³⁰ I wa muhum findel ti hun fwet kwa, ɓurti Shatan makai i naya moti nai yes. Shak ta andi, mati mbaitat na hai yunti kwa.

³¹ Naya ti wa shangi nyai i ɓwet Dee, aɗeng ima kin i mas shak aɗeng ima lakun nai. Luk hun fit mwashi, ka her ya nanati.”