Jwon 13 - Findel i DeeƁwe Ti Alis i Ron

Yeso Sa Sisai i Fe i Ro Ames ya

¹ Si mana ɗak Got i Pissihai ru, Yeso tuu shangi myan ames tuu ndok ima ma wa honti naya u hum kyel ta kyel i Dee. Ɓurti Yeso ɓwet ɗufal ames ima si mana naya, kofus ɓweti ames hwak yes dala.

² Ta myan ima Yeso hu fe i ro ames sin cwai ti cwa i fo'. Shatan tuu kin ta mulut i Judas Iskaryot al i Siman, ɓa u nggwes ti Yeso.

³ Yeso tuu shangi nyai Deehi tuu kin ɗamam shak ta ra ames, shangi hwak yes i ta kyel i DeeƁwe, a kyel i DeeƁwe hwak ma wa muhum ta.

⁴ Myan ima sin cwai ti cwaii, Yeso lukfit mbwet fagin asus ti saikyel ya, ha' tawul no' na manggiring ames,

⁵ ɗak shu ham ta ɓeleng, tong sati sisai i fe i ro ames ya, yis fyal ti sisai ames ya ti tawul ima no' ta manggiring ames.

⁶ Unai Yeso yes kyel i Siman Pita, ima nyus, “A Deembai, ha wa sa sun sai ya haa?”

⁷ Yeso matussi ni, “Mwashi, ha shang aɗeng ima i masi kwa, na takfai ha wa shangi.”

⁸ Unai Pita nyus, “Wayou! Ha wa sa sun sai ya kwa fweng!” Yeso matussi ni, “Ou, na i sa hai kwa, ha mati aweng na kyel amen kwa.”

⁹ Unai Siman Pita nyus, “A Deembai, a sisai amen kek ha wa sai kwa, sa ha ra hu hai amen hwak.”

¹⁰ Unai Yeso ni, “Takfai tima maɗufal sa lo' ames ya, ma wa ɓweti sati lo' hwak kwa, a sisai je ma wa saiya. Hun a som musapai, a shak asui kwa.”

¹¹ Ɓurti Yeso tuu shang maɗufal ima matus wa munggwya, ayis kin ni, “A shak asui hu ti sapa kwa.”

¹² Takfai tima pun sasus sisaiyi ya, ru' fagin asus ɗak humuskyel ta kyel i mute ames tes amun. Unai lulus ni, “Hu shang aɗeng ima i masi ɓursu haa?

¹³ Hu laisun ii ‘Makofiti’ hu ‘Deembai,’ a kiga', ɓurti angga' ima i mata nai.

¹⁴ Na yin ima i mii Deembai hu makofiti amu, i sahu sisai ya, hun ɗat ɓa hu sa ɗiyai amui ya hwak.

¹⁵ I kofu aɗeng mai a ɓurti ɓa hun hwak hu masi angga' ima i masui ta.

¹⁶ I ma laksu mwawei, yere ɓyan mawur ames kwa, mamuro ɓyan maɗufal ima rohus kwa.

¹⁷ Mwashi ima hu shang ɗamam mii, DeeƁwe ma wa kinsu maɗesi na hu masus.

¹⁸ “I ma findel a na haisu shak kwa. I shang ima i ben. A kanggang aɗeng ima si worong ta findel i DeeƁwe u hya nyai, ‘A maɗufal ima cu cwa amen hatun hai.’

¹⁹ “I ma laksu mai kaciwa' tuu ru, ɓurti myan ima ru hu fa mwawei nyai, ayin a yis.

²⁰ I ma laksu mwawei, maɗufal ima mat shak ima i rous, matun ayin, maɗufal ima matun, mat a maɗufal ima rohun ndai.”

²¹ Takfai tima mas findel mai, aɗengi kin Yeso tirim ta mulut fwet. Unai lak ya kparara nyai, “I ma laksu mwawei, andek na saa yuti ma wa cwai ti kwinik amen.”

²² Unai fe i ro ames si ɗing ɗiyai fo, ɓurti si shang yis ima Yeso ma findel si yis hai kwa.

²³ Nin ta saa ti fe i ro amesi, ima Yeso ma ɓweti, ma amun ta nggas ti Yeso.

²⁴ Unai Siman Pita findelus ti ra nyai, ɓa u lul Yeso u lakus ti ima ma findel si yis hai.

²⁵ Unai maɗufal mai her ta nggas ti Yeso lulus ni, “Ayis we ya, a Deembai?”

²⁶ Unai Yeso mati ni, “I wa jop ti ɓwai i folok mai na ɓeleng. Maɗufal ima i fas, a yis mii maɗufali.” Unai Yeso zan ɓwai i foloki jop, fa Judas Iskaryot al i Siman.

²⁷ Takfai tima mat ɓwai i foloki, unai Shatan lang ta wii ames. Unai Yeso lak Judas ni, “Aɗeng ima ha wa masi mai, masai kaang.”

²⁸ Ta saa ti som ima sima cwai ti cwaii, ɗeng shang aɗeng ima kin Yeso lak Judas andi kwa.

²⁹ Judas a yis mati takal i cefi, fe i ro sima ambe' nyai, “Yeso ma laksus ɓa u wa u juwil aɗeng ima sima ɓweti ta gotti, ahun u fa a som i jyel ɗama ɗak.”

³⁰ Takfai tima Judas mat ɓwai i foloki, unai langus ya abet. Ta myani fo' tuu mas.

³¹ Takfai tima Judas lang ya, Yeso ni, “A mwashi si ha' Al i Maɗufal fit, si ha' DeeƁwe fit hwak ɓurti Ali.

³² Na DeeƁwe mat mbaitat ɓurti Ali, DeeƁwe ma wa fati Ali mbaitat abet.

³³ “A fe amen, i wa mute akul si hun i myan ndyong. Hu wa farsun, fota angga' ima i lak som Ju ta, angga'i nai ima laksu ta nyai, ‘Kyel ima i ma wa ta, hu wa shang ti yes kwa.’

³⁴ “A findel mamwayi ima fasu, ɓwet hun ɗiyai. Fota angga' ima i ɓwetu ta, a kanggang hu ɓwet ɗiyai andi hwak.

³⁵ A angga'i nai ɗufal shak si wa shangi hun a fe i ro amen, na hu ɓwet ɗiyai.”

Pita ma wa Ɗanggwya ti Yeso

³⁶ Siman Pita lul Yeso ni, “A Deembai, ha wa a leya?” Yeso mat ti ni, “Kyel ima i ma wa ta ha wa shang ti kol tifai asuni mwashi kwa, na takfai ha wa koltifai asuni.”

³⁷ Unai Pita nyus, “A Deembai, ami kin i wa shang ti koltifai asai mwashi kwa ya? I wa fati mupwet amen ɓursa.”

³⁸ Yeso mat ti ni, “Ha wa fati mupwet asa ɓursun haa? I ma laksa mwawei, kaciwa' korong tuu tutol, ha wa ɓwinggil i shangsun sa ataat.”