Jwon 12 - Findel i DeeƁwe Ti Alis i Ron

Sapa i Yeso ya ta Betani

¹ Kat mukonan taan ɓa Got i Pissihai u fur, Yeso ru ta Betani ta wur i La'azarus, maɗufal ima Yeso luktus fit ta mot.

² A nanati, si masus cwa i mukon, a Umata ti kar cwai, La'azarus ma andek ta saa ti som ima si cu cwai akul hu Yeso.

³ Unai Uryam ti ha' shigira i mbar mafyongi macef ima si masi ti nardi. Ti shu Yeso ta sisai, ɗak ti fyalus ya ti sya i hai amet. Muɗu mafyongi ma mimyat i mbar mai hya shak wuri.

⁴ Judas Iskaryot, andek ta saa ti fe i ro i Yeso (ima ma wa juwil ti Yeso ya ndai) ni,

⁵ “Ami kin si juwil mbar mai ya si hai i cef ima maro ma wa masi i wil andek, ɓa si fa som i jyel cefi kwa ya?”

⁶ Judas lak findel mai a ɓurti ɓweti som i jyel kwa, a ɓurti yis a asher. Ayis mii ma ka'ti takal i cef ames, ma shyarani ta saa hwak.

⁷ Unai Yeso ni, “Hona yut, ti kinta a ɓurti sinzam ti myan ima si wa laisun.

⁸ Ngang hu ma akul hu som i jyel, a ngang hu ma akul hu yin kwa.”

Si Mas La'azarus Gbaf hai

⁹ Myan ima suɓut i Ju hyang si hali ti nyai Yeso mana nati, unai si yes, a ɓurti Yeso ahwesi kwa, a ɓurti si ɗing La'azarus hwak, ima Yeso luktus fit ta mot.

¹⁰ Unai mbayai i kocok si ɓetti ɓa si for La'azarus hwak.

¹¹ A ɓurti La'azarus, Ju hyang sin fati mwawei wa kyel i Yeso.

Yeso Langta Yerushalima

¹² Mwen ti ɓu, suɓut i ɗufal hyang si yes Got i Pissihai, si hali nyai Yeso mata fisel i wa Yerushalima.

¹³ Unai si har ra i yitat i mbar si rangya ɓa si matus, sin ha' ti la fit sin nyai, “Mbaitat ti matwis wa kyeli DeeƁwe Disyo' tasi ima ma yes ti asum i Deembai! Maɗesi matwis wa kyel i Makai i Isar'ila!”

¹⁴ Yeso wis al ti njaki nin unai langi, fota angga' ima si worong nyai,

¹⁵ “Ka hu mwen kwa, hun som i Yerushalima, ɗing huni, makai amu mai ma yes, te amun tasi al ti njaki hai.”

¹⁶ Tasi bya' fe i ro ames si shang mai kwa, ta takfai tima DeeƁwe ha' Yeso fit, si mbe' nyai si mas worong mai tasi hai ames, ɗak si masus ɗamam mii.

¹⁷ Suɓut i ɗufal ima sima akul hu yis ta myan ima lai La'azarus lang ya ta fiyai, luktus fit hwak ta mot, si cu wei ti lak ti ɗufal aɗeng ima Yeso masi.

¹⁸ Ɗufal hyang si wa mat ti Yeso ɓurti si hal ɗama i kofti i shok na fo ima masi.

¹⁹ Unai Farisiyawa si findel ti ɗiyai si ni, “Ɗing huni, ɗeng ma wa cwai ti wei kwa fweng, u mai shak naya tima tifai asussi!”

Shini i Giris Si Far Yeso

²⁰ Ta saa ti ɗufal i ma si yes ɓurti cwai ti afut ta kyel i gotti shini ta Girik si ta.

²¹ Si yes kyel i Filip, maɗufal i Betsaida ta Galili, si nyus, “Deembai, ni ma ɓweti ni ɗing Yeso.”

²² Filip wa lak Andru, unai sin apil si wa si lak Yeso.

²³ Unai Yeso matussi ni, “Myan si ndok ima si wa ha' ti Al i Maɗufal fit.

²⁴ I ma laksu mwawei, na si lai al ti alkama ti mot kwa, ti yut wa mute a hweti. Na ti mot, unai ti fa fe hyang.

²⁵ Maɗufal ima ɓwet mupwet ames ma wa duni. Maɗufal ima nggwes ti mupwet ames na naya moti, ma a ɗakiti ndai yes mupwet i myan hu myan.

²⁶ Shak maɗufal ima mayun ɗagu' ti hai, a kanggang u kolfai asuni. Shak kyel ima i mata, yere amen ma wa mute ta akul hu yin. Deen ma wa ha' ti shak maɗufal ima ma yun ɗagu' ti hai fit.”

Yeso Findel Tasi Mot Ames

²⁷ “Mwashi i ma halti kinggat na mulut amen. Ami i wa laki ndai ya? Ahun i ni, ‘A Dee, ha'a na myan i shum amai ya ya?’ Wayou, yin i yes a ɓurti myan mai gbum.

²⁸ A Dee, ha'a asum asa fit!” Unai la ti lang ya ta fit ti ni, “Tii ha' asum asun fit, i wa muhum ha'i fit hwak.”

²⁹ Myan ima suɓut i ɗufal ima sima mangra ta kyeli si hal lai, si ni a bara, shini si ni, a malu' findelus.

³⁰ Yeso lakus ni, “La moti ti yes a ɓursun kwa, ti yes a ɓursu.

³¹ A mwashi DeeƁwe ma wa tot ti naya moti ɓur, a mwashi hwak ma wa re' ti Shatan, makaitat i naya moti ya.

³² Takfai tima si ha'un fit ta fisha, i wa dul ti ɗufal shak yes kyel amen”

³³ Yeso lak mai a ɓurti kofti musut i mot ima ma wa masi.

³⁴ Unai ɗufal si lak Yeso si ni, “Anggut asinin ti lak nin ti ni, Kristi ma wa mupwet myan hu myan. Ou, atini ha ni a kanggang si ha' Al i Maɗufal fit ya? Awe mii Al i Maɗufali ya?”

³⁵ Yeso nyus, “Kwenengi ma akul si hun i myan ndyong. At hun myan ima kweneng yis akul si hun, kan maɓing wisu. Ma ati ta saa ti maɓing shang kyel ima ma wata kwa.

³⁶ Fahun mwawei nasi kwenengi hai, myan ima huma tikul, ɓurti ɓa hu te i fei kwenengi.” Myan ima pun findel, Yeso wis ta kyel nin ima wa' si shangi.

Som i Ju Si Fa Mwawei Kwa

³⁷ Yeso wo yis masti ɗamam i kofti i shok na fo hyang ta wei yusti, shak ta andiyi si fa mwawei wa kyel ames kwa.

³⁸ Si mas mai a ɓurti si hya aɗeng ima mashit Ishaya worong nyai. “A Deembai, awe fa mwawei nasi findel ama ya, awe hwak si kofus ti andok i Deembai ya?”

³⁹ Ayis kin si shang fati mwawei kwa, fota angga' ima Ishaya worong ta kyel ma hwak nyai,

⁴⁰ “Nzyauwus shishat ya ɗak forus mulwat ya hwak, ɓurti kan si ɗingi ti shishat ames, si shangi ta mulwat ames hwak kwa, ima si hatat na kyel amen i fas njeng.”

⁴¹ Ishaya lak andi a ɓurti ɗing mbaitat i Yeso, ɗak lak aɗeng mai ta hai yusti.

⁴² Shak ta andi, ɗufal, ima hyang ta saa ti som i kunggul ames si fa mwawei si yis hai. Ɓur ti myanat i Farisiyawa si nggwes i nyai si fa mwawei, ɓurti kan si ndok si nggas ta marei.

⁴³ Ɓurti si ɓin ɓweti ngye ta foi ɗufal hu ngye ta kyel i DeeƁwe.

⁴⁴ Unai Yeso ha' la fit ni, “Shak maɗufal ima ma fati mwawei na kyel amen, a na kyel amen je kwa, a wa kyel i DeeƁwe ima rohun.

⁴⁵ Shak maɗufal ima ma ɗingsun, ma ɗing ti a maɗufal ima rohun ndai.

⁴⁶ I yes fota kweneng na naya ɓurti kan maɗufal ima ma fati mwawei na kyel amen ute ta saa ti maɓing wi.

⁴⁷ “Shak maɗufal ima hal kofiti amen, ɗak nggwes i masi, ayin a ma lefsus ɓur ya kwa. I yes a ɓurti ɓa i lef naya ɓur ya kwa, a ɓurti ɓa i bum naya.

⁴⁸ Maɗufal ima nggwetun, ɗak nggwes i mat ti findel amen, mati ma lefsus ɓur ya. Findel ima i lak, ayit tiwa lefsus ɓur ya mwen ti dala.

⁴⁹ Ɗamam ima i kofiti ii na kyel amen kwa, a Deen ima rohun lakun ti aɗeng ima i lak hu ngga' ima i wa laki ta.

⁵⁰ I shangi hwak mupwet yes myan hu myan matwis ta findel ima Deen fa. Ɓurti andi shak aɗeng ima i lak, i lak a kiga' hu aɗeng ima Deen lakun ɓa i lak.”