Jwon 11 - Findel i DeeƁwe Ti Alis i Ron

Mot i La'azarus

¹ Maɗufal nin, ima asum ames a La'azarus ma mwatan. Sin ta fo ti ashwa ti Betanii hu shunus murwafi, Uryam hu Umata.

² Yit Uryam tima ai ti wa shwaiti Yeso mbar i cef ta sisai, ɗak ti fyalus si ya ti sya i hai amet ti. A tusus ti La'azarus ma mwatani.

³ Sin shunukan murwafi amii si tuk muro wa kyel i Yeso nyai, “A Deembai, yis ima ha ɓweti mati cala kwa.”

⁴ Ti hali andi unai Yeso ni, “Mwatan mai ma wa kolsus ta mot kwa, ma wa fati a DeeƁwe mbaitat ɓurti Al ames u wis mbaitat hwak.”

⁵ Yeso ɓwet Umata, hu tusut Uryam hu La'azarus,

⁶ shak ta andi, tasi mwen i ma hal mwatan i La'azarus, humus masti mukon apil ta kyel ima matai tawe.

⁷ Takfai ti andi ɗak lak fe i ro ames, ni, “Ndakan ka wa ta Judya kong.”

⁸ Fe i ro ames si ni, “A makofiti, a myana a myana mbayai i Ju sin ɓweti ɓwalan sa ti afyai. Mwashi ha ɓweti muhumkyel ta kyeli hwak haa?”

⁹ Yeso matussi ta ni, “I nyai a shitam hure mulang apil a yis a mufi andek ho? Ɓurti andi shak maɗufal ima ma ati taren ma wa bukat kwa, ɓurti ɗing ti kweneng i naya amoti.”

¹⁰ Maɗufal ima ma ati tafo' ma wa bukat ɓurti kweneng wet ta kyel ames.

¹¹ Takfai ti andi lakus ni, “Mwes amukan La'azarus mayus ɗarak, mwashi i wa wa ɓa i ɓushos.”

¹² Unai fe i ro ames si ni, “A Deembai, na a arak ha'us kyek, mwash luk fit.”

¹³ Yis Yeso ma a nyai La'azarus motus ii mot, sin fe i ro ames sima a nyai ahun Yeso ma nyai La'azarus mayus a ɗarak i lafos kek.

¹⁴ Unai Yeso lakus hai i findeli ya nyus, “La'azarus motus.

¹⁵ Yin i kof pipelat ti mulut ɓursu, ɓurti myana yin ta kyeli kwa, ɓurti ɓa hu fa mwawei yes kyel amen. Yehun, kan kawa ka ɗingus.”

¹⁶ Unai Toma (ima si laiyus ii Njan), lak anggum i shunus fe i roi ni, “Ndakan ka wa, ka mot akul hu Yeso kek.”

¹⁷ Myan ima Yeso ru ta Betani, hali nyai La'azarus tuu mas mukon ɓaras tasi mwen ima si laiyus ta fiyai.

¹⁸ Fo ti ashwa ti Betani ti mata nggas ti Yerushalima, maleng amet ɓin mel apil.

¹⁹ Unai som Ju hyang si yes too' ti Umata hu Uryam ti shaat i nusus.

²⁰ Ti hali nyai Yeso ma yes, Umata ti ka' fisel wa shwaisus, Uryam yit ti teet ta wur.

²¹ Unai Umata ti lak Yeso ti ni, “A Deembai, ma myana hana, na nusun u mot kwa.

²² Shak ta andi, i shangi DeeƁwe ndok u fa shak aɗeng ima ha lulus.”

²³ Yeso lakut ni, “Nushush ma wa muluk fit.”

²⁴ Umata ti nyus, “I shangi ma wa muluk fit, mwen ima som mumoti si ɓusho ta fiyai yes dala i naya.”

²⁵ Yeso lakut ni, “Ayin a muluk fit i som mumoti, ayin a mupwet hwak. Shak maɗufal ima fa mwawei nasi yin hai, ɓwet u mot, ma wa muluk fit u pwet.

²⁶ Maɗufal ima ma mushet, ɗak fa mwawei tasi yin ɗi, ma wa mot kwa fweng. Shi fa mwawei andi haa?”

²⁷ Unai Umata ti nyus, “Hei, a Deembai, i fa mwawei nyai a ha a Kristi ani, Al i DeeƁwe ima ha yes na naya.”

²⁸ Ti mbit laksus ndai, ti wa ti lai tusut Uryam ta ɓwai ti nyut, “Makofitii tu yes, ma lulshush.”

²⁹ Uryam ti hali andi, ti luk fit kaang ti wa ta kyel i Yeso.

³⁰ Yeso yis yus ɗiri ta kyel ima Umata ti wa ti shwayus ta, ma tu lang ta ashwai kwa.

³¹ Myan ima som Ju ima si yes too' ti shaati si ɗing Uryam ti luk fit hwak ti lang ya, si rang tifai, si nyai ashang tima a wa ta fiyai ɓa ti kawa.

³² Uryam ti muru ta kyel ima Yeso mata, ti ɗingus, unai ti fur ta mabel yusti ti nyus, “A Deembai, ma myana hana, na nusun u mot kwa.”

³³ Yeso ɗingut yit kawa, som Ju ima si kolfai asut ti hwak sin kawa, unai aɗengi nggye' Yeso ta mulut hyang.

³⁴ Unai ni, “Hu laiyus a leya?” Si nyus, “A Deembai, ya ha ɗing kyeli.”

³⁵ Unai Yeso kawa.

³⁶ Unai som Ju si ni, “Ɗing hun angga' ima ma ɓwetsus ta.”

³⁷ Shak ta andi, shini ta saa asus si lak ɗiyai ames si ni, “Ɓu shishat i manzyau ani ya, ɗak ami kin mas ɗama ima u sha La'azarus mot kwa ya?”

Yeso Ɓusho La'azarus ta Fiyai

³⁸ Yeso hum tirim ta mulut ti ambas, wa ta fiyaiyi. Fiyaiyi a ton i mafung nin, ima si vo fo i kyeli ti afung nin.

³⁹ Yeso lakus ni, “Tuk hun afungi ya.” Unai Umata, tusus ti maɗufal ima moti ti lak Yeso ti ni, “A Deembai, mwashi mayus wa muɗu, ɓurti a mukon ɓaras mai tasi mwen tima mot.”

⁴⁰ Unai Yeso lakut ni, “I nyai ti i lakush i ni, na shi fa ma mwawei shi wa ɗing ti mbaitat i DeeƁwe ho?”

⁴¹ Unai si tuk afungi ya. Unai Yeso ha' shit fit ni, “A Dee, i palanga ɓurti ha halsun.

⁴² I shangi ha halsun ngang, i lak ati ɓurti som ima si mangrai mii si fa mwawei nyai, a ha ha rohun.”

⁴³ Myan ima pun laki andi, unai lak ti la mbai ni, “La'azarus, langa ya!”

⁴⁴ Unai maɗufal ima moti lang ya, raa hu sisai ames shak si ranggal ya ti rukul i lai, shishat ames hwak si gu' i rukul i lai. Unai Yeso ni, “Hwet hun yusya u wis.”

Si Mas Shingat Nin Ɓa si For Yeso

⁴⁵ Ju hyang ima si yes too' ti Uryam, si ɗing aɗeng ima Yeso masi, si fa mwawei tasi yis hai.

⁴⁶ Shak ta andi, shini si wa ta kyel i Farisiyawa, si lakus aɗeng ima Yeso masi.

⁴⁷ Ɓurti andi mbayai i kocokak hu Farisiyawa si suɓut mbayai i som tot ti ɓur i mashwa, si lul ta ɗiyai si ni, “Ami ka wa masi ya? Maɗufal mai yis cwai ti wei ti masti ɗamam i shok na fo hyang.

⁴⁸ Na ka tekan gbak yis cwai ti wei ti masti ɗamam mii, ɗufal shak si yus wa fati mwawei tasi yis ɗi. Ta dala som i Rom si wa nggwalan ti Wur i DeeƁwe ya hu ashwa amukan hwak.”

⁴⁹ Unai andek ta saa yusti, ima asum ames a Kayafas ima a yis a kocok mbai tasi wil ani, lakus ni, “Hun hu shang ɗama kwa fweng!

⁵⁰ Hu mas ambe' kwani? Mbwesh maɗufal andek u mot ɓurti ɗufal, ɓa si ni ashwa shak ti mot.”

⁵¹ Mai findel ima Kayafas lak, a ambe' i mulut asus kwa, ɓurti yis ma mute ii mbai i makocok tasi wil ani, lak findel i som i shit i DeeƁwe nyai, Yeso ma wa mot ɓurti ɗufal i Ju,

⁵² a ɓurti Ju kek kwa, a ɓurti ɓa u suɓut ɗufal i DeeƁwe shak ima si ɓaasus ti kikyalali, si te ii ɗama andek.

⁵³ Tasi myani, mbayai i Ju si ɓeti angga' ima si wa for ti Yeso ta.

⁵⁴ Ɓurti andi, Yeso hum ati ta saa ti som Ju wii mal kwa. Foi andi hon kyeli, wis ta ashwa nin tima ti ta nggas ti saa ti ya, langus ta ashwa nin tima asum amet a Ifrayim. Tes ta kyeli hu fe i ro ames.

⁵⁵ Myan ima Got i Pissihai i Ju kat ndyong, ɗufal hyang ta ɓwayai i mashwa si wa ta Yerushalima ɓa si sapa haisus ya ɗak myan i gotti ti ru.

⁵⁶ Unai si ka' far ti Yeso, si te mangrai ta fo i mahom i Wur i DeeƁwe sin luli ta ɗiyai nyai, “Hu ɗingi atini ya, ma wa yes got amai ya?”

⁵⁷ Ai, mbayai i kocokak hu Farisiyawa si kin findel nyai, shak maɗufal ima shang kyel ima Yeso mata, u yes u lak ti ɓa si wa si ka'us.