Jwon 1 - Findel i DeeƁwe Ti Alis i Ron

Findeli Hatus ii Maɗufal

¹ Tasi bya' a Findel, Findeli ma akul hu DeeƁwe, Findeli a DeeƁwe.

² Tasi bya' ma akul hu DeeƁwe.

³ Shak ɗamam ii ta kyel ames si masi, si mas ɗama nin na saa ti shak ɗamam mii kaciwa' yis kwa.

⁴ Ta wii ames a mupwet, mupweti a kweneng i ɗufal.

⁵ Kwenengi ka' ta saa ti maɓing wi, maɓingi ɓin njeng ames kwa.

⁶ Ai maɗufal nin yes ima DeeƁwe rotus, asum ames a Jwon.

⁷ Yes ɓa u lak ɗufal mwawei si kwenengi hai, ɓa ta fo ames ɗufal shak si fa mwawei.

⁸ A Jwon mii kwenengi kwa, yes ɓa u findel si a kwenengi hai je.

⁹ Kweneng mwawei ima ma fati ɗufal shak kweneng, ma yes na naya.

¹⁰ Ai yis na naya, ahun si mas nayai ta kyel ames, shak ta andi nayai ti shangus kwa.

¹¹ Yes kyel ima si mii ames, amesi si nggwetus.

¹² Shak maɗufal ima matus, fa mwawei si asum ames hai, yis fas mbaitat i mute ii fe i DeeƁwe.

¹³ Fe ima wa' si alus ta fisel i lo' hu masi i maɗufal kwa, a ti masi i DeeƁwe.

¹⁴ Findeli te ii maɗufal, tena saa kan ti, hya ti maɗesi hu mwawei. Ka ɗing mbaitat ames, mbaitat i Al andek ɗwyat ima yes ta kyel i Dee.

¹⁵ Jwon findel si yis hai ti la mbai ni, “Ayis ima ai i findel i hai nyai, ‘Ima ma wa yes na takfai yunti ɓinun, ɓurti ai yis na kaciwa' si al lun.’ ”

¹⁶ Ɓurti hya i maɗesi ames ma giliki shak ma fasikan maɗesi tasi hai i maɗesi.

¹⁷ DeeƁwe fa anggut ta rai Mosis, mal maɗesi hu mwawei si yes ta kyel i Yeso Kristi.

¹⁸ Anggi maɗufali tasi hwer ɗing DeeƁwe ya? Al ames andek ɗwyat ima a yis mii DeeƁwe, ma akul hu Deehi, Deehi kof kan ti ɓa ka shangus.

Jwon Findel Si Yeso

¹⁹ Findel ima Jwon lak mai, myan ima som Ju ta Yerushalima si ro som i kocok hu gung i Livai ɓa si lulus nyai, “A ha aweya?”

²⁰ Jwon ɓwinggil kwa, lakus ya ni, “Ayin a Kristi kwa.”

²¹ Unai si lulus si ni, “Ou, a ha aweya? A ha a Iliya haa?” Unai humustikyel ti findel ni, “Ayin kwa.” “A ha a mashit ani haa?” Ni, “Wayou.”

²² Unai ta dala si nyus, “A ha aweya? Laka nin ti ɓa ni wa ni lak som ima si ro nin. Ami ha laki si haisa hai ya?”

²³ Jwon humustikyel ti findel ta ngga' ima mashit Ishaya lakta ni, “Ayin a la malai ta ya, ‘Ɗak hun ti fisel i Deembai ta u wa mangra.’ ”

²⁴ Unai shini Farisiyawa, ima si yes ti muroi,

²⁵ si lul ta Jwon nyai, “Na a ha ha mii Kristi kwa, na a ha ha mii Iliya kwa, na a ha ha mii mashit ani kwa, ami kin ha masti batisma ya?”

²⁶ Jwon humustikyel ti findel ni, “Yin i masu batisma ti ham, ɗeng mana saa yuti ima hu shangus kwa.

²⁷ Ayis ma yes na takfai yunti, i ndok ii hwet mwinggi' i kpakasak ames ya kwa.”

²⁸ Shak ɗamam mii si fur ta Betani fit i Ɗara i Jodan, kyel ima Jwon mas ɗufal batisma ta.

A Yeso Mii Al Tutwi i DeeƁwe

²⁹ Mwen ti ɓu, Jwon ɗing Yeso yis yes kyel ames. Unai ni, “Ɗing hun Al Tutwi i DeeƁwe ima ma wa ha' ti mafwashi i naya ya!

³⁰ Ayis ima i laku nyai, ‘Maɗufal ima ma yes na takfai yunti ɓinun, ɓurti ai yis na kaciwa' ti si alun.’

³¹ Yin ti haisun i shangus kwa, aɗeng ima kin i yes yin masti batisma ti ham ayis nai, ɓa yis u makof wa kyel i Isar'ila.”

³² Unai Jwon lak nyai, “I ɗing Rin i DeeƁwe yis muɗor sus hai ta fit fota gurguta, tes hai.

³³ Ai yin i shangus kwa, a DeeƁwe ima rohun ɓa i mas batisma ti ham, ayis nyun, ‘Maɗufal ima ha ɗing Rin ɗorus hai tes hai, ayis ma wa masti batisma ti Rin masapai.’

³⁴ I ɗingi a yis nai ima laki nyai, maɗufal mai a Al i DeeƁwe.”

Som Koltifai Ti Yeso i Bya'

³⁵ Mwen ti hum ɓwai hwak Jwon yis mangra ta kyeli akul hu ɗufal apil ta saa ti fe i ro ames.

³⁶ Myan ima Jwon ɗing Yeso yis Musa ta, unai ni, “Ɗing hun Al Tutwi i DeeƁwe!”

³⁷ Myan ima apili si hal findel ima Jwon lak, unai si kolfai ti Yeso.

³⁸ Yeso hatat tifai ɗingi sin koltifai ames, unai lulus ni, “Ami hu fari ya?” Unai si nyus, “Rabbi” (nyai makofiti ndai), “Ha mati mute a leya?”

³⁹ Unai Yeso nyus, “Yehun, hu ɗingi.” Unai fe i roi si wa si ɗing kyel ima ma mute tai, si te ta kyeli akul mweni. A tasi shitam ɓaras ti ango.

⁴⁰ Andru nusus i Siman Pita, ma andek ta saa ti ɗufal apil ima si kolfai ti Yeso takfai tima si hal findel i Jwon si Yeso hai.

⁴¹ Ti bya' Andru far nusus Siman, lakus ni, “Ni wis Kristi,” (Kristi ndai).

⁴² Unai kol Siman ta kyel i Yeso. Unai Yeso ɗingus fo ni, “A ha a Siman al i Jwon. Si wa lai ii Kefas” (Pita ndai, afung ndai).

Yeso lai Filip hu Natanyel

⁴³ Mwen ti ɓu, Yeso kin hai ɓa u wa Galili. Unai wis Filip nyus, “Kolafai a suni.”

⁴⁴ Filip a maɗufal i Betsaida, ashwa i hu Andru hu Pita.

⁴⁵ Filip wis Natanyel nyus, “Ni wis maɗufal ima Mosis worong findel si yis hai ta anggut ames, hu ima som i shit si worong ta kaadaha ames, Yeso maɗufal i Nazaret, al i Josep.”

⁴⁶ Unai Natanyel lulus ni, “Ɗama maɗesi ma wa mulangya ta Nazaret haa?” Filip nyus, “Ya ha ɗingi.”

⁴⁷ Myan ima Yeso ɗing Natanyel yis yes kyel ames, ni, “Ɗing hun maɗufal i Isar'ila i mwawei, ima mati fyarat kwa.”

⁴⁸ Unai Natanyel lul ta Yeso ni, “Ha mas atini ha shangun ya?” Yeso humuskyel ti findel ta ni, “I ɗinga myan ima ha ɗiri ta gung i makambong kaciwa' Filip tuu laya.”

⁴⁹ Unai Natanyel ni, “Rabbi (makofti shangi ndai), a ha ha mii Al i DeeƁwe, a ha ha mii makai i Isar'ila.”

⁵⁰ Unai Yeso hum laksus ni, “Ha fa mwawei, a ɓurti i laka nyai i ɗinga ta gung i makambong haa? Ha wa ɗing ti ɗamam ima si ɓin mai.”

⁵¹ Unai Yeso hum laksus ni, “I laksu mwawei, hu wa ɗing ti fit matɓu, som lu' i DeeƁwe sin muɗu muɗor si Al i Maɗufal hai.”