Jemis 4 - Findel i DeeƁwe Ti Alis i Ron

Fa Haisa Ta Kyel i DeeƁwe

¹ Ami yias ti ɓin hu shaal na saa yuti ya? Si yias ii ta ambe' i yok ima maɓwol ta wii yuti kwa haa?

² Na hun ɓweti ɗama ɗak hu wisi kwa. Hu for, hu ka' gamshik, shak ta andi hu wis aɗeng ima hu ɓweti kwa. Unai hu langu shaal ta ɓini. Aɗeng ima kin hu wisi kwa a ɓurti hu fwal ta kyel i DeeƁwe kwa.

³ Myan ima hu fwal hu mat kwa, a ɓurti hu fwal ti ambe' mafwashi, ɓa hu for ya tasi masti ɗamam i lo' kek je.

⁴ Hun som zuruk, hu shangi nyai myatat hu naya a ha' ti wei ti DeeƁwe kwa haa? Shak maɗufal ima mas mute i myatat hu naya, te i mwes i ha' ti wei ti DeeƁwe ndai.

⁵ Ahun hu ɗingi findel i DeeƁwe ima si worong nyai, Nadon i ɓweti i Rin i DeeƁwe ima kin na wii kanti ma jurik a gbya' ndai haa?

⁶ DeeƁwe fa kan maɗesi hyang. Ayis nai kin Findel i DeeƁwe ima si Worong ni, “DeeƁwe nggwayus tima ngye na hai u fa ma mugu' ti hai maɗesi.”

⁷ Ɓurti andi fahun haisu wa kyel i DeeƁwe shak. Ka hu fa Shatan kyel kwa fweng ma wa tital su fo.

⁸ Hyer hun na nggas ti DeeƁwe, yis hwak ma wa muhyer su nggas. Sapa hun haisu ya, hun som i masti mafwashi. Sapa hun mulwat amu ya, hun som i mulwat apil-apil.

⁹ Kikyau hun ti mulwat, kawa hun, hu shu filya. Musas amu u hatat i kawa, pipelat na mulwat amu u hatat ii kikyawat na mulut.

¹⁰ Gu' hun ti hihai amu ta mabel i DeeƁwe, yis ma wa ha' su fit.

¹¹ A shunun, ka hu lak findelal mafwashi si ɗiyai hai kwa. Shak maɗufal ima lak findel mafwashi si nusus hai, njyal u totus ɓur hai lak findel mafwashi tasi anggut hai ndai, lefut ɓur hai ndai. Myan ima ha lef anggut ɓur hai, ha hyai kwa ndai. Ha te ii ma fati anggut mafwashi.

¹² A DeeƁwe je a ma fati anggut, hu ma tot ti ɓur. Ayis je ndok u fa mupwet, u for ya. Ɓurti andi, a ha awe ima ha ndok ɓa ha lef nusa ɓur hai ya?

Kan Hu Nggwak Ajin Ti Wasan Kwa

¹³ Hal huni, hun ima hu nyai, “Kwai ahun wasan ni wa na ashwa mai ahun ani ashwai, ni mas wil ta nin woor ni wis cef hyang.”

¹⁴ Hu shang aɗeng ima ma wa mufur wasan haa? Mupwet asui ti ndok ɗama haa? Hu yu fota mutɓwar ima yias myan ndyong je unai ka far wet.

¹⁵ Ɗat hu ni, “Na DeeƁwe ɓwet, ka pwet, ka wa masti hat ka mas hat.”

¹⁶ Fota u mai mwashi hu yu i nggwak ti ajin ta findelal i gbya'. Musut i nggwak ti ajin mai a mafwashi.

¹⁷ Ɓurti andi, shak maɗufal ima shang aɗeng ima ɗat ɓa u masi ɗak masi kwa a mafwashi.