Jemis 3 - Findel i DeeƁwe Ti Alis i Ron

Kinti Shitam si Alis Hai

¹ A shunun, kan shak asikan ka te ii som kofiti kwa, ɓurti hu shangi kan som kofiti si wa tot sikan ɓur manjengi ima ɓin i anggum i ɗufali.

² Shak a sikani ka toikyel ka fwar ta kikyal hyang. Na ɗeng liyaal findel ames kwa, kof yis ma nggya-nggya ndai, ndok ima u fwang lo' ames shak ndai.

³ Ka kyan shitam tasi fo i mbiri a ɓurti ɓa ti kolfai asikani, ka kinus si wa kyel ima ka ɓweti.

⁴ Ɗinghun kwangang i ham mbayai, shak ta mbaitat amesi se manjengi twakus. Shak ta andiyi, a al i shitam niin kyan ma tuk ti kwangi u hatat ti ta kyel ima ma ɓweti.

⁵ Angga' ima alis amukan mata nai. Shak ta to i alis a mukanin, ndok u pa ajin si mbayai i ɗamam hai. Ɗing hun ngga' ima foti macutman ti lwa'an ti male' i ya ti cu ya shak.

⁶ Alis i maɗufal hwak a man. A naya mufwashi na wii i lo' i maɗufal, rafaat maɗufal ya shak, u lu' mupwet ya fweng. Alisi ti haisus, a wur i man shwaakus.

⁷ Maɗufal ndok u fwang loha i ya hu i wur, hu avyash hu ima si ɗa'at ti ɗarai na fisha, hu gushe.

⁸ Shak ta andi, alis pwan maɗufal fwangi. Alis a ɗama mafwashi tyai kyel andek kwa, nggwar kyel fota ɗamafwashi.

⁹ A ti alis ka ha' asum i Deembai Demukan fit, ati alis ma andeki ka lakan ti findelal mafwashi tasi maɗufal ima DeeƁwe masus fota yis.

¹⁰ A ti fo mandeki ka ha'an ti asum i DeeƁwe fit, ka se' ɗufal hwak. A shunun! Ɗat ɓa ute andi kwa.

¹¹ Ham maɗesi hu mafwashi si ɓwiriyak ya ta kyel andek haa?

¹² A shunun, gung ti makambong ti al fatti haa? A hun gung ti malhat ti al makambong waak? Ahun polok i ham i amma fai ham maɗesi waak?

Musut i Piris Apil

¹³ Awe mati shingat hu ambe' manderei ya? U kof ta fisel ti mute asus munderei, hu ro maɗesi i mugu' ti hai ima yas ta mute i piris.

¹⁴ Na hu suɓut ambe' mafwashi hu nadon i ɓweti hai ta mulwat amu, ka hu nggwak ti ajin kwa, hon hun masti malem ima u kolu ɓwinggil ti mwawei.

¹⁵ Musut i piris mai yias ii ta kyel i DeeƁwe kwa. Yias ii ta naya, mayus kaciwa' rin maɗesi, ii kyel shatan.

¹⁶ Shak kyel ima ɓweti hai mata hu nadon i ɓweti hai si ɗiyai, ha wa wis ti mute maring-ringi hu shak musut i mute i masti ɗamam mafwashi ta.

¹⁷ Piris ima yes ta kyel i DeeƁwe ti bya' mati sapa, ta mute calai, hu murak ti hai, hu ɗing ti shum, hu gu'ti ashur fwet, hu masti ɗamam maɗesi hyang kaciwa' kofti mute akat-akat hu kofti hai.

¹⁸ Som far ti mute cala sima lai ti lai i mute cala ndai, lai mai ma wa yes ti karat i mute mandyasi.