Jemis 2 - Findel i DeeƁwe Ti Alis i Ron

Ɓwet Ti Hai Ɗat Kwa

¹ A shunun, ɓurti ka mii som i fati mwawei si Deembai amukan Yeso Kristi macinjangat, kan ka kof ɗufal ɓwet ti hai i mute akat-akat kwa.

² Na maɗufal maramwayat, sok arom i cef, yes ta kyel i suɓut amu, ɗak maɗufal majyel nin hwak lang ta ti madyash i arom ames.

³ Na hu ɓin fwang ti maramwayat, hu nyus, “Tya amun na kyel maɗesi mai,” ɗak hu lak majyeli hu nyus, “Tya mangra nati,” ahun huni, “Tya amun na ndik i fisha.”

⁴ Na hu masi andi, hu mas mafwashi i kofti mute akat-akat na saa yuti, mai kof hu lefti ɓur i ɓweti hai hu ambe' mafwashi ndai kwa haa?

⁵ Hal huni a shunun, ka nyai DeeƁwe ben som ima naya ti ɗing sus a som jyel hatus ii som ramwayat ɓurti mwawei, ɓa si wis kaitat ima yis ni ma wa fati som ima si ɓwetus hoo?

⁶ Shak ta andi hu kom som i jyel ya! A som i ramwayat si kofsu ya kwa haa? A sin si kpukpongsu wa ti ta kyel i tot ti ɓur kwa haa?

⁷ Ka nyai a sin sima lak ti findelal i komam tasi asum maɗesi i Yeso ima hun ames hoo?

⁸ Na hu hal findel i kaitat i DeeƁwe ima si worong nyai, “Ɓweta maɗufal ima hu mute tikul fota haisa,” ha masi ndere ndai.

⁹ Na hu kofti mute akat-akat na saa yuti, hu mas mafwashi dai, anggut ti cu hu ɓurti hu nggyel anggut ya.

¹⁰ Maɗufal ima fwang anggut shak ɗak nggyel andek ya, mas mafwashi i nggya-laniya shak ndai.

¹¹ Ɓurti yis ima ni, “Kan ha rak ti mbor ti ɗeng kwa,” ayis hwak ni, “Kan ha for maɗufal kwa.” Na ha rak ti mbor ti ɗeng kwa ɗak ha for maɗufal, ha te ii manggyel ti anggut ya ndai.

¹² Findel hun hu mas ɗamam fota som ima si wa totsus ɓur ti anggut ima ma wa fa sus mute i haisus.

¹³ Myan i tot ti ɓur, DeeƁwe ma wa gu'ti ashur si maɗufal ima wa' gwa' ɗeng ashur hai kwa. Gu'ti ashur ma wa cwai ti uges si ɓur hai.

Fa Ti Mulut hu Masi

¹⁴ A shunun, ami a ɗat ima ɗeng ni, mati fati mulut ɗak ro ames kof andi kwa ya? Musut i fati mulut moti ti wa bumsus haa?

¹⁵ Na shunu muryai ta murwafii sin yus kaciwa' arom hu cwa i cwai ngang.

¹⁶ Na ɗeng amu nyus, “Hun wa cala, DeeƁwe u kin hu wis arom i ru'i hu cwa i cwai,” ɗak hu mas ɗama tasi tirim i lo' ames hai kwa, ami a ɗat ames ya?

¹⁷ Angga'i nai hwak, fati mulut ti haisut na si futi ro kwa, a gbya' fota funat.

¹⁸ Ɗeng ma wa nyai, “Hati fati mwawei, yin ima ti ro.” Kofa na ti fati mulut ama kaciwa' ro, i wa kofsa fati mulut amen ta ro ima i masi.

¹⁹ Hu fa mulut nyai DeeƁwe ma andek je a kiga'! Ɗakyar hwak si fa mwawei nyai DeeƁwe ma andek je ta muroi lo' i.

²⁰ Ha haling i maɗufal, ha ɓweti si kofa ɗama nin nyai mwawei kaciwa' ro a ɗama i gbya' haa?

²¹ Mbe' hun demukan wash Ibirai wis mute mundyasi ta kyel i DeeƁwe. I nyai a ɓurti ai fa al ames Aizik ii fo i kuna wa kyel i DeeƁwe hoo?

²² Ɗing hun ngga' ima fati mulut i Ibirai wa kiga' hu ro mes ta, fati mulut ames hya ti ro ima masi.

²³ Unai findel i DeeƁwe ima si Worong hya ta kiga' ima ni “Ibirai fa mwawei wa kyel i DeeƁwe, aɗeng ima kin DeeƁwe matus ii maɗufal mandyasi nai.” Ɓur ti andi si lai Ibirai ii mwes i DeeƁwe.

²⁴ Ɗing huni, maɗufal wyas mute kaciwa' mafwashi ta wei i DeeƁwe a ɓurti ro ames, a ɓurti fati mwawei kek je kwa.

²⁵ Angga'i nai hwak ai Urahab al ti se ti wis cati ii ra ta mafwashi wi. I nyai a ɓurti aɗeng ima ti masi ti fot ti som Isar'ila ima si yes kukwer ti ashwa, ti bumus si pwet ta nin fiseli akat. I nyai a ti ro ima ti masi ti te ii mandyasi hoo?

²⁶ Ngga' ima lo' i maɗufal ima ma kaciwa' lafos a funat, andi hwak fati mulut kaciwa' roti a funat.