Hibrus 9 - Findel i DeeƁwe Ti Alis i Ron

Fisel Mawili ti Cwai ti Afut

¹ Dakwa i bya' mati fiselal i cwai ti afut hu hutum masapai na naya.

² Buki mati ɗwam apil. Ta ɗom i bya'i mati kwetleng ta mani i hai, mati gwan hu folok masapai i hai, mai si lai ii Kyel Masapai.

³ Ta takfai i fagir mapili, ɗom nin ti ta si lai ii Hutum.

⁴ Ta Hutumi, musur tima si masi ti ugbwirik mujuwi tima si ngyashan ti yitat mafyongi i hai ti ta. Ta Hutumi hwak akwati i dakwa ima si vo ya ti ugbwirik mujuwi mata. Akwati mai mati palang ima si masi ti ugbwirik mujuwi ta, ima mati manna ta wii, mati cwang ti Eron tima ai ti sa mwal, hu kaper apil i dakwa.

⁵ Tasi akwatii hai, a Cerebim ima mati cinjangat, vo kyel i shwaiti mafwashani ya ti kurya ames. Ka wa findel si ɗamam mii ti andek-andek mwashi kwa.

⁶ Myan ima si shu ɗamam fota ati, a ngang kocokak si lang ta ɗom ti bya' ɓa si mas ro ames.

⁷ A makocok mbai laang ta hutum sa andek ta wil je, a ti wash je, ma wa tor ti kuna i haisus, hu i mafwashani i ɗufal, ima si masi ta maɓing wi.

⁸ Rin Masapai ma kofi nyai, fisel ti mulang ta Hutum ti maɓu ya kwa tawe, myan ima buk i bya' ani yis ɗiri mangra.

⁹ Mai a kaani ɓurti waya ti mwashi, ma kofi hwak nyai, malal hu kunaha ima ai si fa, si ndok ɓa si fa arak i mulut wa kyel i som i cwai ti afut kwa.

¹⁰ Mii ɗamami si ngge' a findel i cwai ta woiyi hu saiya akat-akat je. Mii fiselali ii lo' kyek, si pangus yes myan i fisel mumwai.

Wash i Kristi

¹¹ Mwashi myan ima Kristi yes fota makocok mbai i ɗamam maɗesi ima si mana nati, yis lang ta buk ima ɓin ngye, ta ɗati hwak, ima a maɗufal ta' kwa, nyai ii musuti i naya mai kwa.

¹² Lang ta ti a wash i shikyan hu i fe randwang kwa, a ti wash ames. Lang ta Hutum sa andek ɗwyat, yis dum sikan ya i myan hu myan.

¹³ Ai si cicak som i zuruk wash i shikyan hu i randwang, hu afut i foti randong hai. Mai hatat ti som zuruk si te ti sapai ta lo' wi.

¹⁴ Ɓurti mai awei, ami ka wa laki si wash i Kristi hai ya? Yis ima lya kwa fweng, fa haisus ii kuna manggya-nggyai ta kyel DeeƁwe saa ti Rin i myan hu myan. Sapa mulwat amukan ya ta mute ima ma wa kol sikan ta mot wi, ɓa ka mas DeeƁwe mapweti ro.

¹⁵ A ɓurti mai kin Kristi te ii mamuro i dakwa mamwai, ɓa ima si laiyus si mat kintiɓwi i kop i myan hu myan. Yis mot ɓa u bumus u catus ii ra ta mafwashani ima si masi tasi dakwa i bya'.

¹⁶ Tasi mangga' i kop, mati ɗat ka kof mot i yis ima masut,

¹⁷ ɓurti mangga' i kop masi a maɗufal ima mot je, a maɗufal mapweti kwa.

¹⁸ A aɗeng ima kin dakwa ti bya' moti, si maas ti ro kaciwa' wash kwa nai.

¹⁹ Myan ima Mosis mbe' angguti shak wa kyel i shak ɗufal, zan wash i randwang, hu ham, mas ro ti sya majuwi, hu ra i yitat, cicak ɗufali hai shak ta kaadai.

²⁰ Lak ni, “Wash mai ii dakwa ima DeeƁwe no'ui hai.”

²¹ A andi hwak, cicak wash tasi buk hu shak ɗamam i ro ta kyel i cwai ti DeeƁwe afut.

²² A awei, anggut ma ɓweti shak aɗeng ima si sapa ya ti wash. Nasi shu wash ya kwa, si wa shwaiti mafwashi ya kwa.

²³ Mwashi, te a kpang si sapa mashilim i ɗamam i kyel ta fit ya ti kuna mai, ɗamam i kyel fit ti haisus sima ɓweti a kuna ima ɓin mai ɗat.

²⁴ Ɓurti Kristi lang ta hutum masapai ima a maɗufal masi kwa, ima a mashilim i mwaweiyi yi. Lang ta fit ti haisus, mwashi mata wei i DeeƁwe ɓur sikan.

²⁵ Kristi hwam mulangta ɓa u fa haisus i hai kwa, fota ngga' ima makocok mbai laangta Hutum sa andek ta shak wil ti wash ima a ames kwa.

²⁶ Naɗin a andi, na Kristi u wo shum i myan hyang tasi lan ti naya. Ɗak mwashi pwak ya sa andek ɗwyat, ɓa u zan mafwashi ya ti fati haisus ii kuna, ɓurti shak wa dala i waya.

²⁷ A kpak maɗufal u mot sa andek ɗwyat, takfai ti andi, si totus ɓur,

²⁸ a andi ai Kristi fa haisus ii kuna sa andek ɓa u zan mafwashani i ɗufal hyang ya. Ma wa muhum yes mapil, ɓa u zan a mafwashi ya kwa, ma wa yes ti a bum wa kyel i som ima si shwaisus.