Hibrus 8 - Findel i DeeƁwe Ti Alis i Ron

Yeso Makocok Mbai i Dakwa Mamwai

¹ Mwashi, aɗeng ima ni ma laki mai, ka mati musut i makocok mbai ima mati mute ta ra i ucwa i kunggul ti kaitat i Mambaitat ta fit.

² Makocok mbai mai mas ro ta buk masapai, ta kyel mwawei ima Deembai masi ti haisus, a maɗufal kwa.

³ Shak kocokak mbayai, si nwa'us ɓa si fa malal hu kunaha. Ɓurti mai aɗengi, a kpak makocok amukan hwak u te ti ɗama i tor ti kuna.

⁴ Naɗin yis na naya, ma wa mute ii makocok kwa, ɓurti kocokak ima si fati malal ta ngga' ima anggut lak ta ai sin ɗirina.

⁵ Buk ima kocokak si mas ro ta wii, a matɗing hu mashilim i ima mata fit. Ayis kin DeeƁwe ti' Mosis ra myan ima yis ta' ti Buk, nyai, “Ɗingai, masa shak ɗamam ta fisel tima si kofati ta hai anggash.”

⁶ Mwashi, ro i kocok ima Yeso mat, ɓin ima aiyi. A andi hwak, dakwa tima ti no' ya ti ɓin muwiliyi, si vwatut ta si kintiɓwi tima ti ɓin ɗat.

⁷ Naɗin dakwa ti bya' moti ti wis tirim kwa, ɗama nin wa mulukfit i far ti mupil kwa.

⁸ DeeƁwe wis tirim si sin hai lak ni, “Myan sima yes, Deembai lak, Myan ima i wa masti dakwa mumwai na kwap i Isar'ila hu kwap i Juda.

⁹ Ma wa mute fota dakwa ima i masi hu washash ames kwa, mwen ima i zanus na ra ɓa i langtus ya ta ta' ti Masar. Si nggwes i hya ti dakwa amen, ɓurti andi, i hatus ti mas, Deembai lak andi.

¹⁰ A dakwa mai i wa masi akul hu kwap i Isar'ila takfai ti myan ani, Deembai lak andi. I wa kinti anggut amen ta ambe' ames, i wa worongi ta mulwat ames, i wa mute ii DeeƁwe ames, si wa mute ii ɗufal amen.

¹¹ Ɗeng ma wa kofti ɗeng findel amen kwa, ahun maɗufal u kofti nusus u ni, ‘Shanga Deembai,’ ɓurti shak si wa shangsun, ta mavaati ames wa mambai.

¹² I wa shwaisus mafwashani ames ya, i wa muhum mbe'i ti mafwashani ames kwa fweng.”

¹³ Ti lai ti dakwa a mai ii “mamwai,” hatat ti i bya' ani ii mawili tawe. Aɗeng ima wiwil, a ma mumbit ndai mwash fotus.