Hibrus 7 - Findel i DeeƁwe Ti Alis i Ron

Melkizedek Makocok

¹ Ai Melkizedek yis ii makai i Salem hu makocok i DeeƁwe Mambaitat. Si shwai hu Ibirai yis muhumkyel ta fwaran ti kaya, unai Melkizedek kinus maɗesi,

² ɗak Ibirai fas andek ta saa ti hure i shak ɗamam. Ti bya' asum ames a “makai i manderei” ɗak a “makai i Salem” asumi a “makai i cala.”

³ Mati dee hu naa kwa, mati manzor i gung kwa, mati bya' i mukonan hu nggwe' i mupwet kwa, fota Al i DeeƁwe, mii makocok i myan hu myan.

⁴ Mbe' hun mbaitat i maɗufal mai. Ibirai, shak mute ii wash i washash amukani, fa andek ta saa ti hure i sufat ima cu ti ɓwol!

⁵ Mwashi, anggut ma ɓweti washash i Levi ima si te ii kocokak ɓa si mat andek ta saa ti hure ta ra i ɗufal. Ɗufal mii a shunus, a washash i Ibirai.

⁶ Melkizedek mai, mii ta gung i washash i Levi kwa. Shak ta andi, mat andek ta saa ti hure ta kyel Ibirai kinus maɗesi, yis ima si fas kintiɓwi.

⁷ Kaciwa' mulut apil, ma fati maɗesi ɓin ma mati.

⁸ Kocokak ima si maat andek ta saa ti hure, a ɗufal ima si wa mot. Melkizedek ɓinus shak, ɓurti si kof kani nyai, a yis mii mapweti.

⁹ Maɗufal ma wa laki nyai Levi ti haisus, yis ima gung asus amu mat ti andek ta saa ti hure, tal Melkizedek ta ra i Ibirai,

¹⁰ ɓurti myan ima Melkizedek shwai hu Ibirai, mati si al Levi kwa.

Yeso Fota Melkizedek

¹¹ Anggut i Mosis lak nyai, kocokak a kpak si te ii gung i Levi. Shak ta andi, kocokak mii si ndok ɓa si kin ɗeng u te nggya-nggya kwa. A ɓurti andi, si ɓweti makocok nin akat, ima a musuti i Melkizedek, a musuti i Eron kwa.

¹² A ɓurti na si shen makocok, a kpak anggut u shen hwak.

¹³ Yis ima si lak ɗamam mii ta haiyusti a Deembai amukan, ima mayus ii ta gung nin akat, ɗeng ta saa ti gungi maas ro i makocok ta kyel i kuna kwa fweng.

¹⁴ U mai rasman, Deembai amukan mii ta gung i Juda, Mosis dor findel nin ima ngge' mute ti som i kocok nyai, ti yes ii ta gung andi kwa.

¹⁵ Aɗeng ima ka lak mai ɓin mute rasman, na makocok nin pwak ya, ima ma fota Melkizedek.

¹⁶ A hya ti anggut si mangga' i gung ima ma Levi kin Yeso te ii makocok kwa, a ɓurti andok i mupwet ima ma kaciwa' rafat.

¹⁷ Ɓurti worong lak ni, “Ha a kocok i myan hu myan musuti i Melkizedek.”

¹⁸ Angga'i nai, si kin anggut i hwer ta ɓwai, ɓurti njeng to, mati ro kwa.

¹⁹ Anggut sapa ɗama nin ya kwa fweng. Kintiɓwi mumwai nin ti matɓuya, ayit ti kin kan muher nggas ti DeeƁwe.

²⁰ Fisel mumwai moti ti te mangra ti shiɗat. Washash i Eron si te ii som i kocok kaciwa' zan ti shiɗat,

²¹ Yeso te ii makocok ti zan ti shiɗat, myan ima DeeƁwe nyus, “Deembai zan shiɗat ma wa shen ti ambe' kwa, ‘A ha a makocok i myan hu myan.’ ”

²² A ɓurti shiɗat mai, Yeso te ii ma no' ti dakwa tima ti ɓin tima ai.

²³ Mwashi ati, ai som i kocok mii sin na hyang, ɗak si mwatus shak.

²⁴ A ɓurti Yeso mati mupwet i myan hu myan, mute i makocok ames ii myan hu myan.

²⁵ Ɓurti andi, ndok ɓa u bum som ima si yes kyel i DeeƁwe ta kyel ames fweng, yis mati mupwet myan hu myan ima ɓa u fwal DeeƁwe ɓursus.

²⁶ Musut i makocok mbai mai, tal myatat amukan, yis ima a masapai, kaciwa' mafwashi, nggya-nggya, si re'us ya ta saa ti som mufwashi, si fas mbaitat mbai ta fit.

²⁷ Ma fota anggum i mbayai i kocokaki kwa. Yis mati tirim ima ɓa u tor kuna ngang kwa, ti bya' ɓurti mafwashi ames, ɗak mafwashi i ɗufal. Yeso tor kuna sa ndek ɗwyat ɓurti shak, myan ima fa haisus.

²⁸ A anggut ti ɓyan mbayai i kocokak ima si to. A shiɗat tima ti yes takfai ti anggut, ti ben Ali, ima a makocok manggya-nggyai i myan hu myan.