Hibrus 6 - Findel i DeeƁwe Ti Alis i Ron

¹ Ɓurti andi, ka hon kofiti mafalai ima ka mat tasi Kristi hai, ka cu wei ti kayaat ya, kan ka hum vwat ti mahuhur i hatat ta roha ima si wa kolti mot kwa. Musut i ɗamam mii, a fati mulut wa kyel DeeƁwe,

² hu kofiti si batisma hai, hu kinti ɗufal ra maɗesi hai, hu muluk fit ta fiyai, hu tot ti ɓur i myan hu myan.

³ Ti ɓweti i DeeƁwe, ka wa masi andi.

⁴ Mati shum i muhumkyel ti musut i ɗufal mii ɓa si hatat, sin ima ti si ɓuus shishat ya, si ngge' mal i fit, ima si mat ta kyel i Rin Masapai,

⁵ si ngge' maɗesi i findel i DeeƁwe, hu andok i waya muwei,

⁶ ɗak si furus. Mati shum i muhumkyel ti musut i ɗufal mii ɓa si hatat, ɓurti si hum nggwak ti Al i DeeƁwe, si fas shusho ta saa ti ɗufal wi.

⁷ Fisha ima ma woti foon ngang yis shwaisus, hu ima fa macwa maɗesi wa kyel som ima si masti ro, maat maɗesi i DeeƁwe.

⁸ Fisha ima al aren hu yafung mayus ii gbya' ndai. Fishai mata fo i ale' i DeeƁwe, ta dala si wa ngyeshi ya.

⁹ A myayun, shak ta ngga' ima ni findel ta mai, ni kinti mulwat si ɗamam muɗesani amu hai, a ɗamam ima si kofti bum amu.

¹⁰ DeeƁwe a ma masti ɗamam ndere ngang, ma wa mbe'i ti ro amu hu matɓwet amu ima hu kofus, fota ngga' ima hu bum ɗufal ames, hu cu wei ti masus bum.

¹¹ Ni ɓweti hu kof ɗamam mii ti fati hai wa dala, ɓa kintiɓwi amu u njeng kporong.

¹² Ni ɓweti ɓa hu te ti ngjwangat kwa, tehun fota ima si mata saa ti fati mulut ta ka'ti agung, ɓa si cu kop i aɗeng ima ai DeeƁwe ni ma wa fasus.

Mute Mangra ti Njeng si Findel i DeeƁwe

¹³ Ai DeeƁwe fa Ibirai kintiɓwi, u shiɗat ti haisus, ɓurtya ɗeng ɓinus ima ɓa u shiɗat ti kwa,

¹⁴ nyai, “Ti mwawei, i wa kinsa maɗesi, i kin gung asa ti ɓak ra fwet.”

¹⁵ Takfai ti ka'ti agung, Ibirai mat aɗeng ima ai DeeƁwe fas kintiɓwi i hai.

¹⁶ Ɗufal si zaan shiɗat ti ɗeng ima ɓinus mbaitat, shiɗati fa njeng si aɗeng ima si lak, ɗak yesti nggwe' si uɓet hai shak.

¹⁷ Ɓurti DeeƁwe ma ɓweti ɓa mute i ambe' ames ima shyan kwa, u te rasman ta kyel i som ima fas kintiɓwi, ɗak no' ya ti zan ti shiɗat.

¹⁸ DeeƁwe ma wa lak ti fyarat kwa fweng! Kintiɓwi hu shiɗat ames si wa mushen kwa. Ɓurti andi, kan ima ka tital ɓa ka yes ka mat kintiɓwi ima si fa kan mai, ka wa wis ti njeng i fwaran ndere.

¹⁹ Ka mat kintiɓwi mai fota kaɓal i mupwet, ti njeng hu mute kporong. Langta wii i hutum takfai i fagir,

²⁰ kyel ima Yeso tong kan ta, langta a ɓur sikan. Te ii makocok mbai i myan hu myan, musuti i Melkizedek.