Hibrus 5 - Findel i DeeƁwe Ti Alis i Ron

¹ Shak makocok mbai si benus ii ta saa ti ɗufal, si no'us ɓa u mas ro ii fo i anggum i ɗufali, tasi ɗamam ima mii DeeƁwe. Ayis ma wa fati mal ta tor ti kunai ɓurti mafwashani ames.

² Yis tyai u wa ti ɗufal loo ima si yus ii halyang, hu ima si welus ta fisel, ɓurtya yis hwak a maɗufal ima mati to.

³ A aɗeng ima kin nai tehus hai a kpak u tor haisus kuna ɓurti mafwashi ames, ɗak tor kuna ɓurti mafwashi i ɗufal.

⁴ Ɗeng ma wa fati haisus ngye musuti mai kwa. A kpak DeeƁwe u lai maɗufali tawe, fota ngga' ima lai Eron ta.

⁵ Angga'i nai Kristi ti haisus zan cinjangat i mute ii makocok mbai kwa. A DeeƁwe lakus ni, “Ha a Al amen, kwai i te ii Dya.”

⁶ Fota ngga' ima lak ta kyel nin ni, “Ha a makocok i myan hu myan, musuti i Melkizedek.”

⁷ Myan ima Yeso yis na naya, fwal ta kabuki, kawa ti la mbai ta filyai, wa kyel i maɗufal ima ɓa u bumus ta mot wi. DeeƁwe mat fwal ames, ɓurti Yeso a ma murak ti hai ta myanat ti DeeƁwe foi.

⁸ Shak ta ngga' ima Yeso mii Al, shum kofus fisel ti murak ti hai.

⁹ Takfai tima kol ta mute munggya-nggyai, te ii mahuhur i bum i myan hu myan wa kyel shak ɗufal ima si halsus,

¹⁰ ɗak DeeƁwe benus ɓa u te ii makocok mbai musuti i Melkizedek.

Ti' ti Ra si Honti Fisel

¹¹ Ni mati findelal hyang ima ɓa ni lak si mai hai, ɗak si ti shum i ɓerenggesi, ɓurti mayu hai ti shum i ka'i.

¹² Mwaweiyi ndai, mwashi ɗat naɗin hu te ii som kofiti, shak ta andi, hu ɗiri ɓweti ɗeng u hum kofsu ti ɗamam mufalai i findel i DeeƁwe i hai. Hu ɓweti fof, a cwa manjengi kwa.

¹³ Shak maɗufal ima ma mupwet ti a fof, mayus ɗiri ii kalaju, shang ɗama si kofiti i mute manderei kwa fweng.

¹⁴ Cwa manjengi ii ɗufal ima si kaya ya, mii musut i ɗufali ii ma sima kinti hihai ɓa si mas ro ti ambe' ames ngang, ɓa si kaar ti maɗesi hu mafwashi.