Hibrus 4 - Findel i DeeƁwe Ti Alis i Ron

Lafos ɓurti Ɗufal i DeeƁwe

¹ Ɓurti andi, tasi ngga' ima findel i kintiɓwi i mulang ta lafos wi ma ɗiri, ka kami loo, ka ndok ɗeng ta saa yuti mbol mulang ta.

² Kan hwak ti ka hal Muro Maɗesi ima si mba kani mai, fota ngga' ima si masi. Shak ta andi, muro ima si hali yi ka' fwish ta kyel ames kwa, ɓurti sin ima si hali si fut ti fati mulut kwa.

³ Mwashi kan ima ka fa mwawei ka rang ta lafos wi, fota ngga' ima DeeƁwe lak ni, “Ɓurti andi, i lak ti la mbai ta shiɗati saa ti futut, ‘Si wa mulang ta lafos amen kwa fweng.’ ” Shak ta andi, pun ro ames tasi myan ima ai lan naya.

⁴ Ta kyel nin, ta Worong wi, si mas findel si mangga' i mukon mupyoron nyai, “A mwen mupyoron DeeƁwe lafos ta shak ro ames.”

⁵ Hum laki i hai tasi mulef mufiiti nyai, “Si wa mulang ta lafos amen wi kwa fweng.”

⁶ Mata si angga'i hai nyai, shini si wa murang ta ani lafosi wi. Ɗufal ima ai si tong hal ti Muro Maɗesi ani si rang ta kwa, ɓurti njeng na hihai ames.

⁷ Ɓurti andi, DeeƁwe hum kinti mwen, ima lai ni “Kwai.” Ta takfai findel ta fo i Devid, fota ngga' ima ti si lak ta nyai, “Kwai, na hu hal la asus, ka hu shok na mulwat amu kwa.”

⁸ Na ai Joshuwa fas lafos, naɗin DeeƁwe u findel na takfai si mwen nin akat kwa.

⁹ Mata andi kpereng nyai, Mwen ti Lafos a ɓurti ɗufal i DeeƁwe.

¹⁰ Ɓurti shak maɗufal ima lang ta lafos i DeeƁwe wi, lafos ta ro ames hwak, fota ngga' ima DeeƁwe masi tasi ames hai.

¹¹ Ɓurti andi, kan hwak ka ni gbuk ɓa ka lang ta lafos ani, ɓa ka ɗeng fur ɓurti koltifai ti kaani i shini ima si njeng na hihai kwa.

¹² Findel i DeeƁwe ma cweng mati apwet, cwai ames ɓin i awal ma fo apil. Laang ta wii ɓa u kar ti rin hu mupwet, nggwaha ta mbwereti. Ti lyaf ɓur si shak ambe' ta aɗeng ima mata wii i muluti.

¹³ Na saa ti shak ɗamam ima si lan, nin fot ta shishat i DeeƁwe kwa. Shak ɗamam sima rasman hu na kweneng wi ta shishat ames. Ayis ima a kpak ka fa ambe' i aɗeng ima ka masi ta mabel ames.

Yeso a Makocok Mbai

¹⁴ Ɓurti andi, ngga' ima ka mati makocok mbai ima wa ta fit, Yeso Al i DeeƁwe, ka te mangra si aɗeng ima ka ni ka fa mwawei i hai.

¹⁵ Ka mati makocok mbai nin ima shang to amukan, ɓurti si mbahus ta fiselal shak, fota ngga' ima si mba kan ta. Yis mas mafwashi kwa fweng.

¹⁶ Ka her ta kunggul i kaitat i DeeƁwe kaciwa' myanat, ɓa ka mat gu'ti ashur, ka wis mal maɗesi i bum ames saa ti myan i tirim.