Hibrus 3 - Findel i DeeƁwe Ti Alis i Ron

Yeso Ɓin Mosis

¹ Ɓurti andi, a shunun musapai, hun ima hu wis mat ti lai mai ta fit, hun hwak mas hun ambe' si Yeso hai, ima ka ma laki nyai, yis a Mamuro hu Makocok Mbai amukan.

² Mas mwawei wa kyel i yis ima benus, fota ngga' ima ai Mosis masi ta hwer, ta wur i DeeƁwe shak.

³ Yeso wis mbaitat mahyangi ɓin Mosis, fota ngga' ima mata' ti wur mati mbaitat ɓin wuri ti haisut.

⁴ Ɓurti shak wurai yi a ɗeng ta', shak ta andi, a DeeƁwe a mata' ti ɗamam shak.

⁵ Mosis ai mas mwawei fota yere ta saa ti shak wur i DeeƁwe, yis te ii shit si ɗamam ima si wa laki yes wei.

⁶ Shak ta andi, Kristi mas mwawei fota al si hai i shak wur i DeeƁwe. Kan a wur ames, na ka cu wei ta saa ti ka'ti agung hu kintiɓwi ima ka mati nggwak ti ajin.

Taɓak Si Munggwya i Fati Mwawei

⁷ A aɗeng ima kin nai Rin Masapai ma nyai, “Kwai, na hu hal la asus,

⁸ ka hu shok na mulwat amu kwa, fota ngga' ima ai hu masi myan i tinder, tasi myan i amba ta ya,

⁹ kyel ima washash amu si mbahun ta gbum, kol wilyal hure ɓaras sin ɗing ti aɗeng ima i masi.

¹⁰ A aɗeng ima kin i mas futut ti waya andi nai, nyai, ‘Ngang mulwat ames si yus wyalan, si shang fiselal amen kwa.’

¹¹ Ɓurti andi, i lak ti la mbai ta shiɗati saa ti futut, ‘Si wa mulang ta lafos amen kwa fweng.’ ”

¹² A shunun, kam huni loo, ka ɗeng amu te ti mulut mufwashi, ti munggwya i fati mwawei ti mulut tima ti hatut ta kyel i DeeƁwe mapweti kwa.

¹³ Fo i mandi, fahun ɗiyai njeng i fwaran ngang, shak myan ima si laiyut ii “Kwai,” ɓurti ka ndok andek amu te ii manjeng na hai ta fisel ti dang hu mafwashi kwa.

¹⁴ Ka yes ɓa ka te akul hu Kristi, na ka te mangra ti njeng wa dala, fota ngga' ima ka tongi tasi bya'.

¹⁵ Fota ngga' ima ti si lak ta, “Kwai, na hu hal la asus, ka hu shok na mulwat amu kwa, fota ngga' ima ai hu shok ti hihai.”

¹⁶ Ai a hu we ima si hal ti DeeƁwe ɗak si tinder ya? Ka ni a hun a som ima Mosis langtus ya ta ta' ti Masar ani hoo?

¹⁷ A hu we si kin DeeƁwe futut i wilyal hure ɓaras ya? Ka nyai a ɗufal ima si mas mafwashi, ima si fwar si mwat ta ya hoo?

¹⁸ A hu we DeeƁwe zan shiɗat si sin hai nyai, si wa mulang ta lafos ames kwa ya? Ka nyai a ɗufal ima si nggwes i murak ti hihai hoo?

¹⁹ Ɓurti andi ka ɗingi nyai, a munggwya i fati mulut ames kin si wis mulang ta lafos mai wi kwa.