Hibrus 13 - Findel i DeeƁwe Ti Alis i Ron

Fati Taɓak i Dala

¹ Cuhun wei ti kofti matɓwet fota shunus i ɗiyai.

² Mbe' hun hu mat mwalmwat, ɓurti masi andi, shini si mat som lu' i DeeƁwe kaciwa' shangi.

³ Mbe' hun ti ima si ta shitam wi, fota a hun ti haisu hu mata shitam wi. Mbe' hun ti ɗufal ima si woti shum, fota a hun ti haisu hu ma woti shumi.

⁴ Fahun kunggo ngye shak asui, hu kyel marak i kunggo u te ti sapa, ɓurti DeeƁwe ma wa tot ti ɓur si som i arak i zuruk hu gwel shak.

⁵ Ha' hun ambe' ya tasi gwel i cef hai, ka' hun agung ti aɗeng ima hu mati. Ɓurti DeeƁwe ni, “I wa honsa kwa fweng, i wa muhwita ya kwa fweng.”

⁶ Ayis nai kin, ni findel ti nggwak ti ajin nyai, “Deembai a mabum amen, i wa myanat kwa, Ami maɗufal ma wa masuni ya?”

⁷ Mbe' hun mbayai amu ima si laksu findel i DeeƁwe. Ɗing hun ngga' ima si masti mute asus ta, hu te ti musut i fati mulut ames.

⁸ Yeso Kristi a ɗama andek akon, hu kwai, hu myan hu myan.

⁹ Ka kofiti mamwai akat-akat har ambe' amu ya kwa. Mati ɗat ɓa mulut amukan u njeng si mal maɗesi i DeeƁwe hai, ii ta fisel ti gotat i cwa ima mii fo i ɗama kwa, ta kyel i som cwaisus.

¹⁰ Ka mati nan tima som ro ta Buk si ndok si cu ɗama ta kwa.

¹¹ Mbai makocok zaan wash i ɗami u lang ti ta Hutum u te ii fai i mafwashi, ɗak si ngyesh lo'a'i ya ta takfai i kyel ima si ɗorkyel ta.

¹² A andi hwak, Yeso wo shum ta takfai i kwap i ashwa ɓa u sapa ɗufal ya ti wash ames.

¹³ Unai kan hwak, ka wa kyel ames ta takfai i ashwa, kan ngyesh ti anggur ti shum ima zan.

¹⁴ Ɓurti ka mati ashwa i myan hu myan nati kwa, ka ma kinti shit si ashwa ima ma ɗiri yes tawe.

¹⁵ Ta fisel ti Yeso, ka cu wei ti fati kuna i adorai i ha'sus fit wa kyel i DeeƁwe ngang, aɗeng ima lang ya na fo ima lak asum ames.

¹⁶ Mbe' hun ti masti maɗesi hu fati mal, musut i kuna mai ɗat DeeƁwe si ɓwi hai coo.

¹⁷ Hal hun findel i mbayai amu hu fa hai tasi laki ames. A sin si fwangsu fota som ima a kpak si fa ambe' i ro ima si masi. Hal hun findel ames ɓa ro ames u te ti jakak, ka tes hai ii kol kwa, ɓurti mai ma wa kolsu ɗama maɗesi nin kwa.

¹⁸ Fwal hun ɓur sinin. Ni shangi nyai ni mati ambe' maɗesi, ni ɓweti ɓa ni mas mute manderei ta shak fiselal.

¹⁹ Yin i fwalsu ɓa hu fwal DeeƁwe fwet u hum tun kyel ta kyel amu ndai.

²⁰ I fwal ti DeeƁwe ma fati cala, ima zan Deembai Yeso amukan fit ta mot wi, ima a mbai Maɗing ti tutwai, hu ma dakwa i myan hu myan ta fisel ti wash ames,

²¹ u hya hu ti shak ɗamam maɗesi ɓa hu mas ro ames. I fwal ɓa u mas ro na saa kanti, aɗeng ima ɗatus si ɓwi hai ta fisel ti Yeso Kristi, wa kyel ames macinjangat i myan hu myan. Aandi.

²² A shunun, i fwalsu ɓa hu ka' agung ti taɓak mai, a foti kaada i worongsui kyek.

²³ I ɓweti ɓa hu shangi nyai si cat nusikan Timoti ii ra ta wur i shitam. Na yes kaang, ni wa yes tikul hu yis ɓa ni ɗingu.

²⁴ To' hun shak mbayai amu hu shak ɗufal i DeeƁwe ta. Shunus amukan ima si ta Italya si too' su.

²⁵ Mal maɗesi i DeeƁwe u te akul hu hun shak.