Hibrus 12 - Findel i DeeƁwe Ti Alis i Ron

DeeƁwe Ɓwet Kan fota Fe Ames

¹ A shunun, suɓut i som hyang si nggaar kan ya! Ka tabwat shak ɗamam ima si dul sikan ya, hu mafwashi ima ma ka'an sikan ya. Ka lweshesh si tital ima DeeƁwe kin kani na wei.

² Ka shu shishat amukan si Yeso hai, yis a ma sinzami hu ma hya ti fati mulut amukan. Yeso ka' mulut tasi shanggam hai, hatat ti ɗama i shusho i fo i ɗama kwa, ɓurti jakak ima ma wa wisi ta wei. Mwashi ma amun ta ra ucwa i kaitat i DeeƁwe.

³ Mbe' hun, yis ima ka' mulut ti musut i ha' ti wei ima wisi ta kyel i ɗufal mufwashi, ɓa ka hu tirim ima u kin lo' amu u wis ya kwa.

⁴ Saa ti makutuk i ha' ti wei ti mafwashi, tuu kol ta kyel ima ɓa hu shu wash amu ya kwa tawe.

⁵ Ahun hu nitima ti findel i taɓak ima DeeƁwe laku fota fe ames ya? Ni, “A al amen, ka ha hatat ti dul ti mwal ima DeeƁwe ma masi ii ɗama i gbya' kwa, ka ha hwiti mulut ya myan ima laka ɓin kwa.

⁶ Deembai taɓak ɗufal ima ma ɓwetsus, u ndash maɗufal ima matus ii al ames.”

⁷ Ngga' ima hu ka' mulut si taɓak i DeeƁwe mai, mbe' hun nyai DeeƁwe ma masui fota fe ames. Anggi ali ima dees masus taɓak kwa ya?

⁸ DeeƁwe taɓak fe ames shak. Na hu mat taɓaki kwa, kof nyai hun a fe i se ndai, a fe i wur kwa.

⁹ A andi hwak, ka mati hu dee i lo' ima si mas sikan taɓak ngang, kan ka fasus ngye ɓurti mai. Unai fwet, ka rak ti hihai wa kyel i Dee i rin amukan ɓa ka pwet kwa haa?

¹⁰ Hu deemukan si taɓak sikan i al myan kiga' si ambe' ames hai, yis DeeƁwe ma taɓak sikan ɓurti maɗesi amukan, ɓa ka fut hai saa ti sapa ames.

¹¹ Shak taɓak ima si mas sikani, yias ti han si myani. Ɗak ta takfai tyai u al macwa manderei hu i cala wa kyel shak ɗufal ima si masti ro.

¹² Ɓusho hun! Ɓweng hun fwaran amu ima si mwatus ani.

¹³ “Tas hun fiselal amu ɓurti sisai amu,” ɓa ka magyak sai wis tirim, mbwesh u wis cala.

Ti' ti Ra si Munggwya ti DeeƁwe

¹⁴ Ni hun gbuk hu te cala hu ɗufal shak, hu te ti sapai hwak. Ɗeng ma wa ɗing ti Deembai kaciwa' sapa kwa.

¹⁵ Kam huni loo, ka ɗeng ɓul tasi wis ti mal maɗesi i DeeƁwe. Ka ɗeng te fota kaporok muɓoli tima ti wa ngye ti kol tirim na saa ti mute amu kwa. Na ka mbuk ya kwa, kwal mufot, u zuruk mute ya shak.

¹⁶ Ɗing huni, ka ɗeng amu te ii ma arak i zuruk, ahun u te fota Eso, ima mwen DeeƁwe fo kwa. Juwil kop i mute i al i bya' ya, ɓurti cwa i mwen andek.

¹⁷ Takfai ti andi, fota ngga' ima hu shangi, myan ima ma ɓweti cwai ti kop i mute maɗesi mai, si nggwetus. Wis myan ima ɓa u ɗak ti mute kwa, shak ta far ti maɗesii, fwal ta filyai wet.

¹⁸ Ti hu yes na mbai anggash fota i Sinai kwa, anggash ima si nggya'i, ma cwai ti man fwet, ma maɓing makyawi, ma uvuta.

¹⁹ Ɗufal i Isar'ila si hal kawa i ngyef ta kyeli, hu la mu findel nin tima som halsut si fwal nyai, ka lai ti hum findelsus kwa.

²⁰ Lo' ames rohus jiir ti myanat, myan ima si hal findel i DeeƁwe, nyai, “Na sufat i wur nggye' anggashi, a kpak si hwyaiyi ti afyai wa ta'wi.”

²¹ Aɗeng ima si ɗingi mai, a ɗama i myanat manjengi, ima kin Mosis ni, “I yun muro ɓurti myanat.”

²² Shak ta andi, hu yes na Anggash i Zayon, Yerushalima ti kyel fit, ashwa i DeeƁwe mapweti. Hu yes na atur i male' som lu' ima si jakak, si ɓin njeng i mbe'i.

²³ Hu yes na suɓut i som koltifai, fe i bya' i DeeƁwe, ima si worong asumam ames ta fit. Hu yes kyel i DeeƁwe, ma totti shak ɗufal ɓur, ta rinan i ɗufal munderei ima si mas mute manggya-nggyai.

²⁴ Hu yes kyel i Yeso, mamuro i dakwa mumwai. Hu yes kyel i wash ima si cicak, ima lak muro ima ɓin ɗat ta wash i Ebel.

²⁵ Ɗing huni, hal hun maɗufal ima ma findel mai! Ɗufal i Isar'ila si pis kwa, myan ima si nggwes i hal ti Mosis, ima ti'us ra na naya. A awei ka wa pis kwa, na ka nggwekan ti Yeso, ima ma ti' sikan ra ta fit.

²⁶ Myan ani la i DeeƁwe gicik naya, mwashi lak findel i kintiɓwi ni, “I wa muhum gicik ti naya ta fiti hwak.”

²⁷ Findel mai ma lak ti a shak ɗamam ima si lanus, si wa giciki si har ya. A ɗamam ima si gicyak kwa, si wa mute ta.

²⁸ Ɓurti andi, ngga' ima ka mati kaitat ima gicyak kwa, ka te ii som palang, ka fas ngye ta fisel ti cwaisus afut ta myanati, ka ha' asum ames fit.

²⁹ Yis DeeƁwe amukan a man macwai ya.