Hibrus 11 - Findel i DeeƁwe Ti Alis i Ron

Ti Fati Mulut

¹ Mwashi fati mulut a kyas i aɗeng ima ka kinɓwi ka wa wisi, hu mwawei si aɗeng ima wa' ka ɗingus.

² Ayis kin som i hwer si wis asum maɗesi.

³ Ii ta fisel ti fati mulut ka shangi nyai, DeeƁwe lan naya shak ta laki ames, aɗeng ima ka ɗingi mwashi yes ii ta ɗamam ima wa' ka ɗingus.

⁴ Ii ta fisel ti fati mulut, Ebel tor kuna maɗesi wa kyel i DeeƁwe ima ɓin i Ken. Ii ta fisel ti fati mulut si ni yis a maɗufal manderei, myan ima DeeƁwe lak findel manderei si mal ames hai. Ii ta fisel ti fati mulut ma hai findel yes mwashi, shak ta mot amesi.

⁵ Ii ta fisel ti fati mulut si zan Enok ya na mupwet mai kan ɗing mot kwa. Fotus ɗyarwal ɓurti DeeƁwe zanus ya. Kaciwa' ti si zanus ya, si shangus fota maɗufal ima DeeƁwe hal ɗat si ɓwi ames.

⁶ DeeƁwe ma wa hal ti ɗat si ɓwi amukan kwa fweng, na kan kaciwa' fati mulut. Ɓurti shak maɗufal ima ma ɓweti yes kyel i DeeƁwe, a kpak u fa mwawei nyai DeeƁwe mana, yis fati mal wa kyel i som ima si farsus ti mwawei.

⁷ Ii ta fisel ti fati mulut, Nowa nggwak kwang mbai ɓa u bum ti som wur ames myan ima si ti'us ra si ɗamam ima wa' ka ɗingi, saa ti myanat masapai. Ii ta fisel ti fati mulut ames kin, lef naya ɓur ya nyai, a yis cu kop i mute manderei ima yes ta fisel ti fati mulut.

⁸ Ii ta fisel ti fati mulut, myan ima DeeƁwe lai Ibirai ɓa u wa ta' nin ima u cu kopi, unai hali, ɗak wa, yis shang kyel ima ma wa ta kwa.

⁹ Ii ta fisel ti fati mulut, Ibirai ta' wur ames ta ya ima DeeƁwe fas kintiɓwi i haiyi, yis mute ta bukak wi fota mwalmwat. Andi hwak Aizik hu Jakop si cu kop i kintiɓwi musut andek.

¹⁰ Yis ma kinti shit si ashwa ima mati mahuhur, ima ma sinzami hu ma ta'i yi a DeeƁwe.

¹¹ Ii ta fisel ti fati mulut, Usara ti haisut, yit a nggwiri, ti kayaat hwak, ti al al i mala. Ti fa mulut nyai, DeeƁwe ma wa hya ti kintiɓwi ima fat.

¹² A andi, tasi maɗufal andek mai, ima ai yis yus ta fo i mot, washash ames si ɓak ra hyang fota ɓyar i kyel fit, hu njor i fo i yiir ima ɓin njeng i mbe'i.

¹³ Shak ɗufal mii si mwat sin hai fati mwawei si aɗeng ima DeeƁwe fas kintiɓwi i hai. Si mat aɗeng ima si fas kintiɓwi i hai kwa, shak ta andi, si ɗingi ta maleng si mat ra apil-apil. Si ɓwet nyai sin a mwalmwat ima si tak ti mute na naya.

¹⁴ Ɗufal ima si lak musut i ɗamam mii, kof nyai sima far ti a ashwa i haisus.

¹⁵ Naɗin ambe' ames yis ta ashwa tima si lang ya ta, sinin wa wis ti fisel i muhumkyel ta.

¹⁶ Fo i andi, si cu wei ti far ti kyel maɗesi ima ɓin ɗat, a ashwa i kyel fit. Ayis nai DeeƁwe shusho kwa, ɓa si laiyus ii DeeƁwe ames, ɓurti yis tu ɗakus ti ashwai.

¹⁷ Ii ta fisel ti fati mulut, Ibirai fa Aizik fota kuna myan ima DeeƁwe mbahus. Ibirai, ima mat kintiɓwi i DeeƁwe, kin hai ɓa u tor kuna ti al ames andek ɗwyat,

¹⁸ shak ta ngga' ima DeeƁwe lakus ni, “Ii ta kyel i Aizik si wa mbe' ti washash ama.”

¹⁹ Ibirai mbe' nyai na Aizik mot, DeeƁwe ma wa muhumtus kyel ti mupwet hwak. Ta fisel andi, Ibirai mat al ames ta fo i mot wi.

²⁰ Ii ta fisel ti fati mulut, Aizik kin Jakop hu Eso maɗesi ɓa wei ames u ɗat.

²¹ Ii ta fisel ti fati mulut, myan ima Jakop te wa mot, kin fe i Josep maɗesi, ɗak cinggir saa ti cwai ti afut, myani teres si nzong ames hai.

²² Ii ta fisel ti fati mulut, myan ima Josep katndyong i mot, findel tasi mulangya i Isar'ila ta Masar. Lakus ni ɓa si har kyasas ames myan ima sin honti Masar.

²³ Ii ta fisel ti fati mulut, hu dees i Mosis si fotus i ture ataat myan ima si alus. Si ɗingi DeeƁwe fas al ima mayus akat, si mwen findel i makai fo kwa.

²⁴ Ii ta fisel ti fati mulut, myan ima Mosis ngye, ni ka si laiyus ii al i al ti Makai Fero kwa.

²⁵ Zan ɓa u wo shum akul hu ɗufal i DeeƁwe sin hu ima u mas mute i ɗat si ɓwi i mwai i mafwashi i myan ndyong.

²⁶ Mas ambe' nyai ɓinus ɗat ɓa u wo shusho ɓurti Kristi, sin hu ima u suɓut sufat i Masar, ɓurti yis ma ɗing ti kyel ta wei ɓa u mat mal ames.

²⁷ Ii ta fisel ti fati mulut, Mosis hon ta' ti Masar, kaciwa' myanat ti futut i makai fo. Cu wei ti ka'ti agung, ɓurti ɗing ɗeng ima si ɗyangus kwa.

²⁸ Ii ta fisel ti fati mulut, lak som Isar'ila ɓa si mas Got i Pissihai hu cicak ti wash si fwai i mahwam hai, ɓa ka Malu' ma for ti kyel, for fe i mala i Isar'ila ya kwa.

²⁹ Ii ta fisel ti fati mulut, som Isra'ila si sa ta saa ti Yiir Mujuwi, fota si sa ta fisel mashoki hai. Myan ima som ɓwol i Masar si kin hai koltifai, ham cus ya.

³⁰ Ii ta fisel ti fati mulut, som Isar'ila si nggar Yeriko ya mukonan pyoron, ɗak bangi nggwalus.

³¹ Ii ta fisel ti fati mulut, Urahab al ti se, ti mat som i ɗing ti kyel ya ra apil. Ɓurti andi, si forut akul hu som i ashwa amet ima si nggwes i hal ti findel i DeeƁwe kwa.

³² Ɓa i hum lak ti ami hwak ya? Ma wa zan ti myan hyang ɓa i mba mangga' i fati mulut i Gidiyon, hu Barak, hu Samson, hu Jefta, hu Devid, hu Samwel, hu shak som shit.

³³ Ii ta fisel ti fati mulut, ɗufal mii si cu uges si kaitat hai, si mas mwawei, si mat aɗeng ima DeeƁwe tuu fas kintiɓwi ii hai ya. Si nwa' fwai i kukumam ya,

³⁴ si fot alis i man ya, si pwet ta fo i awal. Toikyel ames hat fas njeng. Si te ii som i ɓwol munjengani, si kin shak som ɓwol si tital.

³⁵ Arof si mat som ames ima si luktus fit ta mot wi ti mupwet. Shini si wo shum hyang, si catus ii ra, shak ta andi, si nggwes i wa, ɓa si wis muluk fit manderei.

³⁶ Si musas shini ta andash mavweleleli. Si nwa' shini ti shitam si tukus ta mano' wi.

³⁷ Si hwyai shini ti afyai si mwat, shini si kaartus apil ti bakam i lefti yitat, si fwarus ya ti awal. Shini si shu arom i fukut i tutwai, ta i shikyani si atus buu, si mas mute i som jyel, hu ima si fasus shum, hu ima si kofsus ya.

³⁸ Naya ti ɗatus mute kwa. Si cu wei ti nggaari ta ya hu anggashash. Sin fwatan ta tonan hu humam.

³⁹ Shak ɗufal mii si wis asumam maɗesi ɓurti fati mulwat ames, shak ta andi, ɗeng ames mat aɗeng ima si fas kintiɓwi i hai kwa.

⁴⁰ Ɓurti ai DeeƁwe yisti ɗama ima ɓin ɗat ɓur sikan. Ma ɓweti ɓa si ru tasi uges i fati mulut ames kaciwa' kan kwa.