Hibrus 10 - Findel i DeeƁwe Ti Alis i Ron

Yeso fa Haisus ii Kuna

¹ A angguti a mashilim je i ɗamam maɗesani ima si yes, a sin si mii mwaweiyi ti haisus kwa. Ayis nai kin angguti ti ndok ti kin som ima si muher nggas ti DeeƁwe si hya nggya-nggya ta fisel ti tor ti kunaha ima si cu wei ti fai wil hu wil kwa.

² Naɗin yit ti njeng, naɗin si shahus tor ti kuna kwa haa? Som i cwai ti afuti sinin wa wis ti sapai sa andek ɓurti shak, si wa muhum mute si cangang hai ɓurti mafwashi ames kwa.

³ Kunaha mii a mbe'i ti shwaiti mwat ya ta mafwashani i wil hu wil,

⁴ ɓurti wash i randwang hu i shikyan ndok ɓa u har mafwashani ya kwa.

⁵ Ɓurti andi, myan ima Kristi yes na naya, ni, “Ha gwel tor ti kuna hu fai kwa, ha ɗak ti a lo' ima ɓursun.

⁶ Fai i ngyeshi hu fai ɓurti mafwashi ti ɗat ta tasi ɓwi kwa.

⁷ Unai i ni, ‘Yin mai, fota ngga' ima si lak ta Worong wi, Yin i yes ɓa i mas aɗeng ima ha ɓweti, a DeeƁwe.’ ”

⁸ Ti bya' ni, “Tor ti kunaha hu fai, hu fai i ngyeshi ya, hu fai ɓurti mafwashi, ha gwelus kwa, ha hal ɗat si ɓwi ames kwa” (shak ta andi anggut ti ɓwet si masi).

⁹ Unai ni, “Yin mai, i yes ɓa i mas aɗeng ima ha ɓweti.” Yis kin anggut i bya' si ɓwai, ɓa u vwat mahuhur mapili.

¹⁰ A ɓweti i DeeƁwe ɓa ka te ti sapa ta fisel ti tor ti kuna i lo' i Yeso Kristi, sa andek ɓurti shak.

¹¹ Shak kocokak si tyai mangra sin hya ti roha ames i koltifai ngang, si hwam tor ti kunaha i hai ima ma wa har ti mafwashani ya kwa fweng.

¹² Myan ima Yeso, makocok mai tor kuna ɓurti mafwashani sa andek ii fo i shak myan, te amun ta ra i ucwa i DeeƁwe.

¹³ Tasi myan ani, ma shwaiti som ha' ti wei ti yis, ɓa si te ii kyel i shwaiti sisai ames,

¹⁴ ɓurti ii ta fisel ti tor ti kuna sa ndek ima kinus si te nggya-nggya i myan hu myan, sin som ima si sapasya.

¹⁵ Rin Masapai hwak lak kan ngga' i mai. Ti bya' ni,

¹⁶ “Deembai lak ni, i wa masti dakwa moti akul hu sin, takfai ti myan ani. I wa kinti anggut amen ta ambe' ames, i wa worongi ta mulwat ames.”

¹⁷ Unai hum nyai, “Mafwashani ames hu toikyel ames, i wa muhum mbe'i kwa fweng.”

¹⁸ Myan ima si shusiya, si wa muhum tor ti kuna nin ɓurti mafwashi kwa.

¹⁹ A shunun, ka mati njeng i mulut i mulang ta Hutum ta fisel ti wash i Yeso.

²⁰ Ayis ɓukan fisel mumwai mupweti ya ta saa ti fagir, ima a lo' ames.

²¹ Ka mati mbai makocok ta wur i DeeƁwe,

²² ka her ta nggas ti DeeƁwe ti fati mulut mwaweiyi! Ayis sapa mulwat amukan ya ta ambe' mafwashi wi, ɗak sa lo' amukan ya ti ham macelili.

²³ Ka ka' kintiɓwi ima ka mbai kaciwa' muni reket, ɓurti yis ima fa kintiɓwi a ma hyai.

²⁴ Ka mas ambe' ngga' ima ɓa ka fwang ɗiyai ta fisel ti kofti matɓwet hu masti roha maɗesi.

²⁵ Ka ka hon suɓut i som koltifai kwa, fota ngga' ima shini si mana ti masi, ka fa ɗiyai njeng i fwaran, fota mwashi ima Mwen ti yes i Deembai tima muher anggasi.

²⁶ A myayun, na ka cu wei ti masti mafwashi nggol-nggol takfai tima ka wis shangi si mwawei hai, tor ti kuna si mafwashi nin kat kwa,

²⁷ a tot ti ɓur i DeeƁwe si fwash hai je ma wa koltifai, hu man ti tudwya' ti wa cwai ti myayus i ha' ti wei ti DeeƁwe ya.

²⁸ Shak maɗufal ima ai nggwes i hal ti anggut i Mosis mot kaciwa' gu'ti ashur, si findel ima ɗufal apil ahun ataat si lak ɗama si yis hai.

²⁹ Anggi musut i andash manjengi cu ɓa maɗufal ima tindak Al i DeeƁwe ya u wo ya? Ma wa mute si maɗufal mai andi, ɓurti fa wash i dakwa ima hat ti kan ii som sapa shusho, maɗufal mai se' Rin Masapai ima kol kan mal maɗesi i DeeƁwe.

³⁰ Ka shang maɗufal ima ni, “I wa weri. I yus wa muhum ti kyel.” Worong hwak ni, “Deembai ma wa tot ti ɗufal ames ɓur.”

³¹ A ɗama i myanat fwet ɓa maɗufal u fur ta ra i DeeƁwe mapweti.

³² Mbe' hun mukonan ima ai i hwer takfai tima hu wis kweneng, myan ima hu te mangra si mwawei hai saa ti ɓwol ima hu wo shum i hai.

³³ Nin myani si se'u, sin fa su shum ta wei ɗufal, nin myani hwak hu te mangrai akul hu ɗufal ima si woti musut i shum mai.

³⁴ Hu ɗing shum i ɗufal ima si ta wii shitam, hu mat ka'ti mulut myan ima si ka'u ti ɗamam amu ti jakak, ɓurti hu shangi hun haisu hu mati kop i ɗamam muɗesani ima si rafaat kwa.

³⁵ Rwish hun ya! Hu wa wis ti mal mahyangi fwet.

³⁶ Ɗat ɓa hu lweshesh ya, ɓurti ɓa myan ima hu mbit masti aɗeng ima DeeƁwe ma ɓweti, hu wa mati aɗeng ima fu kintiɓwi i hai.

³⁷ Na ka yash i myan ndyong, “Yis ima mayes ma wa yes, ma wa for ti myan ya kwa.

³⁸ Manderei amen ma wa mupwet ta fisel ti fati mulut. Na hu humkyel takfai, i wa jakak ti hun kwa.”

³⁹ Kan a musut i ɗufal ima si wa muhumkyel takfai si rafatus kwa, a ɗufal ima si fa mwawei si wa wis ti bum.