Hibrus 1 - Findel i DeeƁwe Ti Alis i Ron

Mbaitat i Al Ɓin i Som Lu' i DeeƁwe

¹ Ai hwer, DeeƁwe findel washash amukan ta fo i som shit myan hyang, hu ta fiselal akat-akat.

² Shak ta andi na mukonan i dala mii, findel kan ta fo i Al ames ima fas cwai ti kop, hu ii ta kyel ames lan naya.

³ Ali a matkof i cinjangat i DeeƁwe, zanus kaɗak ta ngga' ima mata. Ayis mati shak ɗamam ta fisel ti andok i findel ames. Takfai tima sapa kan ya ta mafwashani wi, wa te amun ta ra i ucwa i Mambaitat shak ta fit.

⁴ Ali ɓin som lu' i DeeƁwe mbaitat hyang. A andi hwak, asum ima DeeƁwe fas ɓin i som lu'i ngye.

⁵ Ɓurti andi, anggi malu'i DeeƁwe nyus, “Ha a Al amen, kwai yin i hat ii Dya” ya? Ahun ni, “I wa mute ii Dees, yis u te ii Al amen” ya?

⁶ Unai myan ima DeeƁwe ro Al ames i mala na naya, ni, “Shak som lu' i DeeƁwe ɓa si cus afut.”

⁷ Si hai som lu'i DeeƁwe ni, “Hatus ii se, yarai ames ii alis i man.”

⁸ Ɗak si mangga' i Ali ni, “A DeeƁwe, kunggul ti kaitat asa, ti wa mute ii myan hu myan, mute munderei, a cwang ti kaitat asa.

⁹ Ha ɓweti a ro manderei, ha nggwya ti mafwashi fweng! Ɓurti andi yin, DeeƁwe ama, i zana fit ha ɓin myaya ta fisel ti shwai sa mbar i jakak hai.”

¹⁰ Hum nyai, “A Deembai, a ha ha vwat mahuhur i naya tasi bya', fit a ro i ra ama.

¹¹ Si wa mufot ndarak, ha ha mana, shak asussi si wa mot fota arom.

¹² Ha wa nggi'sus ya fota godo, fota arom ima si wa sheni. Ha ha mana kaciwa' mushen, wilyal ama si wa mute ti nggwe' kwa.”

¹³ Ɓurti andi, anggi malu'i DeeƁwe nyus, “Teha amun na ra i ucwa amen na i hatat ti som i ha' ti wei ti ha ii yarai ama tawe” ya?

¹⁴ Ka nyai a hun, shak som lu' a rinan ima DeeƁwe rwa hus, ɓa si mas ɗufal ima si wa cwai ti kop i bum ro hoo?