Galatya 6 - Findel i DeeƁwe Ti Alis i Ron

Mas Ti Maɗesi wa Kyel Ɗufal Shak

¹ A shunun, na si ka' ɗeng furus yis maas ti mafwashi, hun ima Rin Masapai ma akul hu hun, hu humtus kyel loo si fisel hai. Mas huni ta fisel ti kinti hai ta manjing hun fwang ti haisu, shingat hun ti haisu, ka ndok hun haisu hu fwaru.

² Bum hun ɗiyai ta fisel ti zan ti kinggat i ɗiyai, ati andi hu wa hya ti anggut i Kristi.

³ Na ɗeng ma ɗingi yis a ɗama ɗak mii fo i ɗama kwa, ma dang ti haisus ta.

⁴ Shak asui mbahun roha i haisu hu ɗingi. Na ɗat, unai u nggwak ajin ti haisus, kaciwa' kaan ti haisus hu ɗeng,

⁵ ɗat ɓa maɗufal u ha' kol i haisus.

⁶ Shak maɗufal ima wis shang ti findel i Yeso Kristi a kpang u kaar shak maɗesi ima wisi akul hu makofsus ti.

⁷ Ka ɗeng dangu kwa, si mas DeeƁwe fyarat hai kwa. Maɗufal karat aɗeng ima lai

⁸ Maɗufal ima lai si gwel i roi lo', ɓa u tal myatat i lo' ta mute i lo' ma wa karat ti mot. Maɗufal ima lai ɓa u tal myatat i Rin, ta wii Rin ma wa karat ti mupwet i myan hu myan.

⁹ Kan ka ngjwangat i masti maɗesi kwa. Na ka cu wei, myan ma yes, ka wa karat ti maɗesi si gwishil hai.

¹⁰ Na andi, shak myan ima ka wis kyel, ka mas shak ɗufal maɗesi gbum fota shunukan ima si mii som koltifai ti Kristi.

A Findel i Mukwen Kwa ii Mupwet Mamwai

¹¹ Ɗing hun musut i mbayai i worong ima i worongui ti ra amen!

¹² Ɗufal ima si ɓweti kofi na saikyel, si kinsu kpang ɓa hu mas mukwen. Aɗeng andek ima kinus masti mai, si myanat ti woti shum ɓurti Shanggam ima Kristi Yeso mot ii hai.

¹³ Sin som fyaratat mii si mati mukwen, sin haiyusti si hya angguti kwa, shak ta andi, si ɓweti ɓa hu mas mukwen ɓa si pa ajin ti hun nyai a sin si kinu kpang hu mas mukwen.

¹⁴ Ka tehu ii nggwak ti ajin kwa, na yin wa nggwak ti ajin, i wa nggwaki a ɓurti shanggam i Deembai amukan Yeso Kristi. A ta fisel ti mot asus tasi shanggam hai, kin gwel i naya mot na lo' yunti, yin hwak i motun tasi gwel i naya wi.

¹⁵ Ti mukwen, hu kaciwa' mukwen si mii fo i ɗama kwa. Mbai maɗeng ima ɓin ɗat a yis nai, maɗufal u te a malu' mamwai.

¹⁶ Mute cala hu gu'ti ashur si te akul hu shak maɗufal ima makoltifai ti findel moti, akul hu ima si mii Isar'ila mumwereti i DeeƁwe.

¹⁷ Na dala, a shunun, kan ɗeng amu hum kolsun tirim i ɗama kwa, ɓurti amwan ima i mati na lo' amen kof yin a yere i Yeso.

¹⁸ Mal i Deembai amukan Yeso Kristi u te akul hu rin amu, a shunun. Andi.