Galatya 5 - Findel i DeeƁwe Ti Alis i Ron

Cati ii Ra ta wii i Kristi

¹ Kristi cat kan i ra, ɓa ka mas mute i cati ii ra i mwawei. Tehun mangra ti njeng, ɓa ka hu humta mano' i kunggul i shitam i mute i yarai hwak kwa.

² Hal huni! Ayin Pool i laksu, na hu hon si masu mukwen, kof Kristi ma wa mute ii fo i ɗama na kyel amu kwa ndai.

³ I muhum laksu nyai, shak maɗufal ima hon si masus mukwen kof a kpang u hya anggut shak ndai.

⁴ Shak maɗufal ima ma ti' ti hai ɓa u zan haisus ma mute manderei ta mabel i DeeƁwe ta fisel ti hya ti anggut, lef haisus ya ta kyel i Kristi ndai! Ha re' haisa ya ta mal i DeeƁwe hwak.

⁵ Ti mbaitat i Rin Masapai, hu ta fisel ti fati mulut, ni shwaisu ta kintiɓwi ta si wis ti mute manderei.

⁶ Ta wii i Kristi Yeso maɗufal ima mati mukwen, hu ima mati mukwen kwa, a ɗama andek. Aɗeng ima ɓin ɗat a fati mulut tima ti kof ɗyut ta fisel ti matɓwet.

⁷ Ai, hun tital maɗesi i cwai ti wei. Awe lefui fo, shahu masti mwawei ya?

⁸ Musut i nggwe'i mai yes ii ta kyel i DeeƁwe ima laiyu kwa.

⁹ Fota ngga' ima si lak ta nyai, “A hong ndyong lang ta wii i han, u kin hani u hya u te ii mbai.”

¹⁰ Deembai fan na mulut nyai, hu wa koltifai ti nin mwawei akat hu asun kwa. Shak maɗufal ima ma ringsu ya, si wa totsus ɓur, ɓwet yis awe.

¹¹ A shunun, na i ma mba ti a findel i mukwen, ami kin si hai kofsun yin Pool ya ya? Na andi, findel amen tasi mangga' i mot i Kristi tasi shanggam hai, naɗin u te ii ɗama i bukat wa kyel i ɗeng kwa.

¹² Naɗin sin ima si ringsu ya mii, i ɓin ɓweti si fa haisus si mbwengus ya fweng!

¹³ Hun, shunun, DeeƁwe laiyu ɓa hu mas a mute ima si catu ii ra. Ɓurti andi ka hu mas ambe' nyai mwashi ima hu wis cati ii ra hu wa masti aɗeng ima lo' amu maɓweti kwa. Foi masi andi, mas hun ɗiyai amu ro fota yarai saa ti matɓwet.

¹⁴ Shak anggut si nggi' ya ta findel andek wi nyai, “Ɓweta maɗufal fota haisa.”

¹⁵ Na hu cu wei ti ɓin hun nggwaran ti ɗiyai fota loha i ya, kam huni lo, ka hu fot shak asui.

Mupwet ta Fisel ti Rin Masapai

¹⁶ Aɗeng ima i laksu a yis nai, mas hun mute si ngga' ima Rin ma ɓweti ta. Na hu masi andi, fisel ti hya ti gwel i lo' ti wa matwis kwa.

¹⁷ Aɗeng ima lo' gwel masi a ɗama ima Rin ma zan ti wei ti, Rin hwak mas ɗama ima gwel i lo' ma zan ti wei ti. Ngang si yus a ɓin ti ɗiyai, a ti andi ha wa wis ti masti aɗeng ima ha ɓweti kwa.

¹⁸ Na a Rin ma kofsu ti fisel, hu mata ra i anggut kwa ndai.

¹⁹ Ro ima gwel i lo' ma ali mii rasman wa, arak i zuruk, hu zuruk i mute naya, hu yok,

²⁰ koltifai ti harkyel, hu ɗakyiir, hu zan ti wei, hu matkaran, hu nadon mafwashi, hu futut, hu ɓweti hai, hu gwel, hu rikit, hu magwyakan,

²¹ hu kolti shit, hu filal, hu musut i ɗamam i yes ti filal fota mii. I ma ti'su ra fota ngga' ima ai i ti'u ra ta nyai, som ima si masti musut i ɗamam mii, si wa wis ti mulang ta kaitat i DeeƁwe kwa.

²² Ɗak ma'al ima Rin Masapai ma ali, a matɓwet, hu jakak, hu mute i cala, hu ka'ti agung, hu bum ti ɗufal, hu masti ro maɗesi, hu hya ti findel,

²³ hu wa ti ɗiyai lo, hu ka'ti hai. Takfai ti mii ɗamami, anggut mati ɗama si mii hai kwa fweng.

²⁴ Sin ɗufal ima si mii som Kristi Yeso si nggwak mute mafwashi ames tasi shanggam hai, hu gwel i roi lo' hu shak yok.

²⁵ Ngga' ima ka pwet ta fisel ti Rin, ka sa si fisel ima Rin ma kof sikan ɓa ka sa ta.

²⁶ Kan ka te ii som i ngye na hihai, hu zan ti ɗiyai mulwat fit, hu yok si ɗama i ɗiyai hai kwa.