Galatya 4 - Findel i DeeƁwe Ti Alis i Ron

¹ Aɗeng ima i laki a yis nai, na al yis ɗiri, ma akat hu yere kwa, shak ta mute ames ima cwai ti kop i wuri.

² Mata ra i som ima si kol sus sin ɗing sus fo yes myan ima dees kin.

³ Angga'i nai hwak, myan ima ai kan ɗiri ii fe muyayi, ai kan ii yarai si fisel i ɗamam mufalai i naya.

⁴ Myan ima DeeƁwe kin si hya, unai ro Al ames, ima a mbor ti alus. Si alus i maɗufal i fisel ti anggut, ɓa u hya anggut.

⁵ DeeƁwe tuk Al ames ɓa u bum kan ta anggut wi, ɓurti ɓa ka mat mute i fe munderei ndyas.

⁶ Hun a fe i mwawei i DeeƁwe, ɓurti DeeƁwe ro ti Rin i Al ames na wii i mulwat amukan, ima ma lai “Abba! Dee!”

⁷ Mwashi, ha a yere kwa, ha a al i DeeƁwe. Ngga' ima hami al ames mwashi, DeeƁwe hat ta i ma cwai ti kop.

Tirim i Pool si Ɗufal i Galatya

⁸ Ai, hwer kaciwa' ti hu shang DeeƁwe, hu yu i yarai, hu cu harkyel afut ima a ɓweha kwa.

⁹ Mwashi, hu shang DeeƁwe, DeeƁwe hwak shangu, ami kin hu yu muhum tasi ɗamam mufalai i naya ima si ti njeng kwa, ɗamam i gbya' shini ya?

¹⁰ U mai hu mbya'an ti mukonan, hu turyan, hu myan i wilyal!

¹¹ I ma myanat, kan ro ima i masi na hai yuti tyos i ro i gbya'!

¹² I fwalsu a shunun, tehun fota yin, ɓurti yin hwak i te fota hun. Hu masun mafwashi nin kwa.

¹³ Hu shangi, a ɓurti mwatan kin i mba hu Muro Maɗesi ti bya'.

¹⁴ Mwatan ameni, ai tyos ii amba ta kyel amu, shak ta andi, hu komun ya kwa, hu nggyu tun kwa. Hu matun fota malu' i DeeƁwe, fota yin a Kristi Yeso ti haisus.

¹⁵ Ami wis shak jakak ima ai hu masi ɓur sun ya? I fa mwawei nyai, tasi myan ani, ima ai yis wa mas, ima ai, hu rya' shishat amu ya hu fan!

¹⁶ Ahun i hatat ii ma zansu ti wei, ta fisel ti laksu mwawei waak?

¹⁷ Som kofiti i fyarat ani si ti nadon manjengi ɓa si wo hai amu, ambe' ames a maɗesi kwa. Shak aɗeng ima si ɓweti masi, si ɓweti si kaar tu na kyel amen, ɓurti ɓa hu te ti nadon manjengi si sin hai ambe' amu u humta kyel ames.

¹⁸ Mati ɗat hu te ti nadon, na ambe'i a maɗesi, ɓa u te ngang kan te na yin akul hu hun tawe kwa.

¹⁹ A femen, tyon hai fota ima muhum hal ti hanat, fota ngga' ima mbor ti al ta. Angga' ima i hal ti hanat ta nai ɓursu, yes myan ima hu kaya ya ta wii Kristi.

²⁰ Hoo! Naɗin si ni ima akul hu hun mwashi, naɗin i shen la, ɓurti i ti tirim si hun hai fwet!

Kaani si Arof Mii Uhaga hu Usaratu

²¹ Lak huna, hun ima hu ɓweti hu te kolfai ti anggut, hu shang aɗeng ima angguti ti laki haa?

²² U mai si worong, ai Ibirai yis ti fe muryai apil, andek a yere ti alus, mandeki a naa mu wuri ti alus.

²³ Al ima yere ti al, Ibirai wisi ii ta fisel i ɓweti lo'. Al ima naa mu wuri ti al, ii ta fisel ti kintiɓwi hu laki i DeeƁwe.

²⁴ Shak ɗamam mii si kofti kaani nyai, ɓurti arof apilal mii, si kofti dakwa apil. Dakwa andek ii ta Mbai Anggash i Sinai ima al fe yarai. Uhaga ayit mu al ti yarai.

²⁵ Mwashi, Uhaga tima fota Mbai Anggash i Sinai ta Arabya ta' ti Larabawa. Tima fota ndii ti ashwa ti Yerushalima ti mwashi, ɓurti yit hu fe ameti shak a yarai.

²⁶ Yerushalima ti fit tima mute haisut, ayit ti mii nasikan.

²⁷ Si worong nyai, “Tong shi nakwai shish ngguri shish tima shi al fe kwa, gu' shi rafo i jakak, shini mwa' i al, shish tya shi shang hanat i al kwa, fe i mbor tima re amet honut si hyang, si ɓin fe i mbor tima ti mati re.”

²⁸ A shunun, kan a fe ta fisel ti kintiɓwi fota Aizik.

²⁹ Ta si myan ani, al ima si al ta fisel i ɓweti i lo' wi, fa al ima si al ta fisel ti mbaitat i Rini shum. Mwashi, a ɗama andek ma wa.

³⁰ Ami Worong i DeeƁwe lak ya? “Matkaara hu mbor moti ta ali fweng, ɓurti al i yere moti ma wa wis ti ɗama ta kop i al i naa mu wuri kwa.”

³¹ Ɓurti andi, a shunun, kan a fe i mbor yere andi kwa, a fe i naa mu wuri.