Galatya 3 - Findel i DeeƁwe Ti Alis i Ron

A Hya ti Anggut Ɓin ahun A Fa Ti Mulut Ya?

¹ A halyang i ɗufal i Galatya! Hu wangan ani? Ahun ɗeng masu manda waak? U mai rasman, i mba hu findel i Yeso Kristi ima si nggwakus tasi shanggam hai.

² Mwashi i ma ɓweti i masu lul andek. Hu mat Rin i DeeƁwe ii ta fisel ti hya ti anggut, ahun a ɓurti fati mulut ta si findel ima hu hali ya?

³ Anggi musut i halngyati hu mati hati ya? Takfai tima hu tongi ti Rin i DeeƁwe, ɗak mwashi hu yu hatat ɓa hu dalai ti mute i lo' ya.

⁴ Shum ima hu wo hyang mai u tyos i gbya' ndai haa? Ahun a gbya' waak?

⁵ DeeƁwe fu Rin ames, yis mas ɗamam i shok na fo na saa yuti, a ɓurti hu hya roi anggut, a hon a ɓurti hu fa mwawei si findel ima hu hali ya?

⁶ Ɗing hun mute ti Ibirai, “Yis fa mwawei si DeeƁwe hai, DeeƁwe laiyus ii maɗufal manderei.”

⁷ Ɗat hu shangi nyai, som ima si fa mwawei wa kyel i DeeƁwe a sin a fe i Ibirai.

⁸ Worong i DeeƁwe lak hwer ni, Ramam si wa wis ti mute manderei ta wei i DeeƁwe ta fisel ti fati mwawei. Ai, hwer lak Ibirai ta Muro Maɗesi nyai, “Ɓursa, shak ramam si wa wis ti maɗesi.”

⁹ Shak som ima si fa mulut wa kyel i DeeƁwe, si wa wis ti maɗesi akul hu Ibirai, maɗufal ma fati mulut.

¹⁰ Shak som ima si fa njeng si anggut hai, si ti ale' ta hai, ɓurti si worong nyai, “Ale' mata hai i shak maɗufal ima wa' hya shak aɗeng ima si worong ta Kaada i Anggut hai.”

¹¹ U mai rasman ɗeng ndok u wis mute manderei ta fisel ti hya ti anggut kwa, ɓurti, “Maɗufal manderei ma wa mupwet ta fisel ti fati mulut.”

¹² Anggut ti lang ya ii ta fisel ti fati mulut kwa. Fota ngga' ima si worong ta, “Shak maɗufal ima hya shak ɗamam mii, ma wa mupwet a ɓur sus.”

¹³ Kristi dumkan ya ta ale' i anggut wi ta fisel ti zan ti ale' ta hai yusti ɓur sikan, si worong nyai, “Ale' mata hai i shak maɗufal ima si nggwakus ta si yit hai.”

¹⁴ Dumkan ya ɓa maɗesi ima si fa Ibirai u wis Ramami ta fisel ti Kristi Yeso. Ta fisel ti fati mulut ka mat kintiɓwi i Rin Masapai.

Matkaar i Anggut hu Kintiɓwi

¹⁵ A shunun, hon hun i laku findel i kaani nin i mute naya ima hu manati. Fota ngga' ima na ɗufal apil si no' dakwa, si shu ra ta ɓa u te ta andi, ɗeng ndok u jak ames ya kwa, ɗeng ma wa dya' ti ɗama i hai kwa hwak.

¹⁶ DeeƁwe lak findel i kintiɓwi wa kyel i Ibirai hu malu' ames. Ahun hu ɗingi Worong i DeeƁwe ni “wa kyel i gungang waak.” Kof nyai a ɗufal hyang, i nyai, “wa kyel malu' ama,” kofi nyai maɗufal andek, ima a Kristi.

¹⁷ Aɗeng ima i laki a yis mai, DeeƁwe no' dakwa hu Ibirai. Anggut tima si yes ti ta takfai ti wilyal ndik ɓaras ta hure ataati (430), ti ɗorkyel ti dakwa tima DeeƁwe ai masi a ɗama i gbya' kwa.

¹⁸ Na wis ti kop a ta fisel ti anggut hai, kof nyai ii tasi kintiɓwi kwa ndai. DeeƁwe saa ti mal ames fa Ibirai kop ta fisel ti kintiɓwi.

¹⁹ Na ati, ami kin DeeƁwe yes ti anggut ya? Yis yes ti ɓa u kof kan mafwashi amukan rasman, yis yes ti angguti hai ta nyai, angguti ti masti ro yes mwen ima malu' i Ibirai ma wa yes, ima a ɓursu si lak findel i kintiɓwi mai. DeeƁwe fa anggut ta ra i som lu' ta fo i mamuro ima te ta saa DeeƁwe hu ɗufal.

²⁰ Mamuro ima te ta saa mati fai i ɓwaiyi nin kwa, na a maɗufal andek je, ɓurti DeeƁwe a andek je ɗwyat.

Ro i Anggut

²¹ Anda ni, mai ma kofi nyai anggut ma zan ti wei ti kintiɓwi i DeeƁwe ani? Wayou, andi kwa fweng! Naɗin si fa angguti ɓa u fa mupwet, naɗin mute manderei u yes ta fisel ti koltifai ti angguti.

²² Worong i DeeƁwe ni, shak naya ti yut ta shitam i mafwashi wi. Mal ima ai si fa a yis mii kintiɓwi ta fisel ti fati mulut wa kyel i Yeso Kristi, si fa som ima si fa mwawei.

²³ Kaciwa' fati mulut mai yes, ai kan ta shitam wi ta fisel ti anggut, kakan ta mano' wi yes mwen tima fati mulut ti pwak ya.

²⁴ A andi hwak angguti ti te ii mufwang sikan yes myan i Kristi. Angguti ti fwang kan yes myan ima ka te ii ɗufal munderei hu DeeƁwe ta fisel ti fati mulut.

²⁵ Mwashi, myan i fati mulut mai yes, ka ɗiri ta ra i anggut fota ma ka' sikan ra kwa.

Fe i DeeƁwe

²⁶ Shak asui hu mii fe i DeeƁwe ɓurti hu fati mulut wa kyel i Yeso Kristi,

²⁷ ɓurti shak asui hun ima si masu batisma ta Kristi wi, hu sok Kristi fota arom hu voti haisu ya.

²⁸ Ma Ju ma akat hu ma Girik kwa, yere ma akat hu ima a al i wur kwa, ahun kani mute i marei ma akat hu i mumbori kwa, ɓurti shak asui a ɗama andek ta kyel i Yeso Kristi.

²⁹ Na hun a som i Kristi, hu yu ii gung i Ibirai ndai, som i cwai ti kop ta fisel ti kintiɓwi.