Galatya 2 - Findel i DeeƁwe Ti Alis i Ron

Som i Muro i Yeso Si Mat Pool

¹ Takfai ti wilyal hure mulang ɓaras, yin hu Barnabas ni hum wa Yerushalima, mai myani i zan Titus ni wa tikul.

² I wa a ɓurti DeeƁwe ɓun shishat ya ɓa i wa. Myan ima yin ta kyeli, i shwai hu mbayai i som koltifai ni findel ta ɓwayi, i lakus aɗeng ima kin i cu wei ti mba ti Muro Maɗesi wa kyel i Ramam. I ɓweti ɓa i shangi nyai mulwat amukan sima andek, ɓurti myanat i nyai kandok shak ti' ti hai ima tii masi hu tital amen u tyos a tital i gbya'.

³ Si fan njeng i fwaran, si wis tirim ima a kpak ɓa si mas Titus mwen i ro mukwen kwa, ti shangi nyai yis Titus a maɗufal i Girik.

⁴ Findel i mukwen mai lukfit a ɓurti som fyarat mii ima si rang na i mufot. Si rang na a ɓurti ɓi si rafat mute ti cati i ra tima ka wisi ta kyel i Kristi Yeso ya. Si ɓweti si hum ti kan kyel ii yarai.

⁵ Ni fas fisel kwa fweng, ɓurti ɓa mwawei i Muro Maɗesi i DeeƁwe u wis mute na saa yuti.

⁶ Sin ima si zan haisus si ɓin ɗufal, shak ta andi si shen ɗama si kofiti ima i masi kwa. Ɗingi amen, ɓwet a sin a hu we, shak andek na kyel amen, ɓurti DeeƁwe kwaf ɓweti ɗeng u ɓin i ɗeng kwa. Yis DeeƁwe lyaf ɓur i ɗingi i shishat kwa.

⁷ Ɗama nin ima tehus hai ti tirim, si ɗingi nyai DeeƁwe fan ro i mba ti Muro Maɗesi wa kyel i Ramam, fota ngga' ima ro Pita wa kyel i Som Ju.

⁸ DeeƁwe a yis ma masti ro ta lai i Pita ɓa u te i mamuro wa kyel i Som Ju, a yis hwak ma masti ro na lai amen i mute mamuro wa kyel i Ramam.

⁹ Ti ɗing ti ngga' ima DeeƁwe kofun maɗesi ames ta, Jemis, hu Pita, hu Jwon ima si mii mbayai i cijai i som koltifai, si matun hu Barnabas ti mulut andek. Si mat nin hei nyai ɓa ni wa kyel i Ramam, sin si wa kyel i Ju.

¹⁰ Shak aɗeng ima si lak nin a yis nyai, ɓa ni cu wei ti mbe'i ti som ima si jyel, aɗeng ima ai yin ɓweti masi nai gbum.

Pool Lak Pita Ɓin ta Antyok

¹¹ Kamana ndai, myan ima Pita yes ta Antyok, i lakus ɓin shishat hu shishat, ɓurti mafwashi ima masi rasman.

¹² Ai, kaciwa' shini ɗufali ti si yes ta kyel i Jemis, yis cwaiyan ti cwa akul hu som koltifai ima a Yahudawa kwa. Myan ima si ru, Pita dul ɗyus ya, ɓel haisus ya ta Ramam wi, ɓurti ai, yis myanat ti som Yahudawa fo ima si kini a kpang si mas Ramam mukwen.

¹³ Anggum i Jusi si fut hai hu yis ta fisel ti dang, kol ima ta fisel ti dang asussi Barnabas hwak wel.

¹⁴ Myan ima i ɗingi si ɗa'at mangra si mwawei i Muro Maɗesi kwa, i lak Pita ta wei i shak ɗufal nyai, “Ha a maɗufal i Ju, shak ta andi ha te fota ma Ju kwa. Mwashi, atini ha kinti Ramam kpang si mas ɗamam ima a Ju si masani ya?”

Si Bum som Ju hu Ramam ta Fisel Andek

¹⁵ “Kan ima si al kan ii Ju, kama fota ‘Ramam mufwashi’ kwa.

¹⁶ Ka shangi maɗufal ma wa wis ti mute i kaciwa' mafwashi ta wei i DeeƁwe ɓurti hya ti anggut kwa, ii ta fisel ti fati mulut ta si Yeso Kristi. Ɓurti andi, nin hwak, ni kin mulwat ta si Kristi Yeso ɓurti ɓa u cat nin i ra ta mafwashi wi, ta fisel ti fati mulut si Kristi hai, a ti hya ti anggut kwa. Hya ti anggut ti kin ɗeng wis ti mute manderei kwa fweng.

¹⁷ “Na kan far ti mute kaciwa' mafwashi ta Kristi wi, ɗak si wis kan kan ɗiri ii som mufwashi, ani kof nyai Kristi kin kan masti mafwashi ndai haa? Wayou!

¹⁸ “Na i hat muhum ta' ti aɗeng ima ai i nggul ya, i kof ndai yin ama nggyel ti anggut ya ndai.

¹⁹ Ta si mangga' i anggut i yun i funat wa kyel i anggut ɓurti ɓa i pwet ta kyel i DeeƁwe.

²⁰ Si nggwakun akul hu Kristi, ayin i muhum mupwet kwa, a Kristi ma mupwet na yinti wi. Mupwet ima i mati na lo' mai, i ma mupwet ta fisel ti fati mulut ta si Al i DeeƁwe, ima ɓwetun fa mupwet asus ɓur sun.

²¹ I mas gbya' ti mal i DeeƁwe kwa. Na wis ti mute munderei, si wis sut ta fisel ti hya ti anggut, kof nyai mot i Kristi tyos a ɗama i gbya' ndai!”